ಸೋಪ್ ಕಂಪನಿ ಜಾಹೀರಾತು ವಿವಾದ - ಕೋರ್ಟ್‌ನಲ್ಲಿ ನಟಿ ತಮನ್ನಾ ಭಾಟಿಯಾಗೆ ಹಿನ್ನಡೆ

•   Fri, Apr 17 2026 12:33:07 PM



• ಚೆನ್ನೈ, ಏ. 17 (DaijiworldNews/TA): ಮದ್ರಾಸ್ ಹೈಕೋರ್ಟ್‌ನಲ್ಲಿ ನಟಿ ತಮನ್ನಾ ಭಾಟಿಯಾ ಅವರಿಗೆ ಹಿನ್ನಡೆಯಾಗಿದೆ. ಖಾಸಗಿ ಸೋಪ್ ಕಂಪನಿಯ ವಿರುದ್ಧ ಅವರು ಸಲ್ಲಿಸಿದ್ದ ರೂ. 1 ಕೋಟಿ ಪರಿಹಾರ ಅರ್ಜಿಯನ್ನು ನ್ಯಾಯಾಲಯ ವಜಾಗೊಳಿಸಿದೆ.

  

  ಈ ಪ್ರಕರಣವು ಸುಮಾರು 16 ವರ್ಷಗಳ ಹಿಂದಿನದ್ದಾಗಿದ್ದು, 2008ರ ಅಕ್ಟೋಬರ್‌ನಲ್ಲಿ ತಮನ್ನಾ ಭಾಟಿಯಾ ಒಂದು ಸೋಪ್ ಕಂಪನಿಯೊಂದಿಗೆ ಬ್ರಾಂಡ್ ಅಂಬಾಸಡರ್ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ಒಪ್ಪಂದದ ಪ್ರಕಾರ, 2009ರ ಅಕ್ಟೋಬರ್ ವರೆಗೆ ಅವರು ಕಂಪನಿಯ ಉತ್ಪನ್ನಗಳಿಗೆ ಪ್ರಚಾರ ಕಾರ್ಯ ಮಾಡಬೇಕಾಗಿತ್ತು.

  ಆದರೆ ಒಪ್ಪಂದ ಅವಧಿ ಮುಗಿದ ನಂತರವೂ ತಮ್ಮ ಅನುಮತಿಯಿಲ್ಲದೆ ಕಂಪನಿ ಜಾಹೀರಾತುಗಳಲ್ಲಿ ಹಾಗೂ ಸೋಪ್ ಪ್ಯಾಕೇಜಿಂಗ್‌ನಲ್ಲಿ ತಮ್ಮ ಫೋಟೋಗಳನ್ನು ಬಳಸುತ್ತಿದೆ ಎಂದು ಅವರು ಆರೋಪಿಸಿದ್ದರು. ಇದರಿಂದ ತಮ್ಮ ಮಾರುಕಟ್ಟೆ ಮೌಲ್ಯ ಹಾಗೂ ಆರ್ಥಿಕ ಹಿತಾಸಕ್ತಿಗೆ ಹಾನಿಯಾಗಿದೆ ಎಂದು ವಾದಿಸಿ ರೂ. 1 ಕೋಟಿ ಪರಿಹಾರಕ್ಕಾಗಿ ನ್ಯಾಯಾಲಯದ ಮೊರೆ ಹೋಗಿದ್ದರು.

  ಪ್ರಕರಣದ ಆರಂಭಿಕ ವಿಚಾರಣೆಯಲ್ಲಿ ಏಕಸದಸ್ಯ ಪೀಠವು ಸಾಕ್ಷ್ಯಾಧಾರಗಳ ಕೊರತೆಯನ್ನು ಉಲ್ಲೇಖಿಸಿ ಅರ್ಜಿಯನ್ನು ವಜಾಗೊಳಿಸಿತ್ತು. ಬಳಿಕ ತಮನ್ನಾ ಭಾಟಿಯಾ ಅವರು ಮೇಲ್ಮನವಿ ಸಲ್ಲಿಸಿದ್ದರು.

  ಏಪ್ರಿಲ್ 16, 2026ರಂದು ವಿಚಾರಣೆ ನಡೆಸಿದ ಮದ್ರಾಸ್ ಹೈಕೋರ್ಟ್ ವಿಭಾಗೀಯ ಪೀಠವು, ಒಪ್ಪಂದ ಅವಧಿ ನಂತರ ಜಾಹೀರಾತು ಬಳಕೆಯಾಗಿದೆ ಎಂಬುದಕ್ಕೆ ಸ್ಪಷ್ಟ ಸಾಕ್ಷ್ಯಗಳಿಲ್ಲ ಎಂದು ಹೇಳಿ ಮೇಲ್ಮನವಿಯನ್ನು ತಿರಸ್ಕರಿಸಿದೆ. ಏಕ ನ್ಯಾಯಾಧೀಶರ ತೀರ್ಪಿನಲ್ಲಿ ಹಸ್ತಕ್ಷೇಪ ಮಾಡುವ ಅಗತ್ಯವಿಲ್ಲ ಎಂದು ನ್ಯಾಯಾಲಯ ತಿಳಿಸಿದೆ. ಈ ತೀರ್ಪಿನೊಂದಿಗೆ ದೀರ್ಘಕಾಲದ ಕಾನೂನು ಹೋರಾಟಕ್ಕೆ ಅಂತ್ಯವಾದಂತಾಗಿದೆ.