ನಟಿ ಆಲಿಯಾ ಭಟ್ ಬ್ರ್ಯಾಂಡ್ ಮೌಲ್ಯಮಾಪನ 892 ಕೋಟಿ-ಪತಿ ರಣ್​​ಬೀರ್ ಕಪೂರ್ ಅನ್ನೇ ಹಿಂದಿಕ್ಕಿದ ಪತ್ನಿ

•   Thu, Aug 06 2026 05:07:24 PM



• ಮುಂಬೈ,ಆ. 06 (DaijiworldNews/AK): ಇತ್ತೀಚೆಗಿನ ನಟ, ನಟಿಯರು ಕೇವಲ ನಟನಾ ವೃತ್ತಿಗೆ ಸೀಮಿತವಾಗದೇ ದೊಡ್ಡ ದೊಡ್ಡ ಉದ್ಯಮಗಳಲ್ಲಿ ಪಾಲುದಾರಿಕೆ ಹೊಂದಿದ್ದಾರೆ. ಕೆಲವರು ವೃತ್ತಿ ಹಾಗೂ ಉದ್ಯಮದಲ್ಲಿ ಹೆಚ್ಚು ಹೆಚ್ಚು ಯಶಸ್ಸು ಗಳಿಸುತ್ತಲೂ ಈ ಬ್ರ್ಯಾಂಡ್ ಮೌಲ್ಯ ಹೆಚ್ಚುತ್ತಲೇ ಸಾಗುತ್ತದೆ. ಕೆಲ ವರ್ಷಗಳ ಹಿಂದೆ ತಮ್ಮ ಬುದ್ಧಿಪತ್ತೆಯಿಂದಾಗಿ ಪೆದ್ದಿ ಎನಿಸಿಕೊಂಡಿದ್ದ ಆಲಿಯಾ ಭಟ್ ಈಗ ಮೌಲ್ಯದಲ್ಲಿ ಹಲವು ಸ್ಟಾರ್ ನಟ, ನಟಿಯರನ್ನೇ ಹಿಂದಿಕ್ಕಿ ನಂಬರ್ 1 ಎನಿಸಿಕೊಂಡಿದ್ದಾರೆ.

  
  ಕ್ರೋಲ್ ಹೆಸರಿನ ಸಂಸ್ಥೆ ಇತ್ತೀಚೆಗೆ ಬಾಲಿವುಡ್ ಸೆಲೆಬ್ರಿಟಿಗಳ ಮೌಲ್ಯಗಳ ಕುರಿತು ಮಾಹಿತಿ ಪ್ರಕಟಿಸಿದೆ. 2025 ರ ಮಾಹಿತಿ ಆಧರಿಸಿದ ಪಟ್ಟಿ ಇದಾಗಿದ್ದು ನಟ ಶಾರುಖ್ ಖಾನ್ ನಂ. 1 ಸ್ಥಾನವನ್ನು ಪಡೆದುಕೊಂಡಿದ್ದರೆ. ದೀಪಿಕಾ ಪಡುಕೋಣೆ ಮತ್ತು ರಶ್ಮಿಕಾ ಮಂದಣ್ಣ ಅವರನ್ನು ಹಿಂದಿಕ್ಕಿ ಭಾರತದ ಅತಿ ಹೆಚ್ಚು ಮೌಲ್ಯಯುತ ಮಹಿಳಾ ಸೆಲೆಬ್ರಿಟಿ ಬ್ರ್ಯಾಂಡ್‌ ಆಗಿ ಆಲಿಯಾ ಹೊರಹೊಮ್ಮಿದ್ದಾರೆ.

  ಕ್ರೋಲ್‌ನ ಸೆಲೆಬ್ರಿಟಿ ಬ್ರ್ಯಾಂಡ್ ಮೌಲ್ಯಮಾಪನ ವರದಿ 2025 ರ ಪ್ರಕಾರ, ಆಲಿಯಾ ಭಟ್ ಅವರು 93.9 ಮಿಲಿಯನ್ ಡಾಲರ್ (ಸುಮಾರು 892 ಕೋಟಿ ರೂ.) ಬ್ರ್ಯಾಂಡ್ ಮೌಲ್ಯದೊಂದಿಗೆ ಶ್ರೇಯಾಂಕದಲ್ಲಿ ಆರನೇ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. 80 ಮಿಲಿಯನ್ ಡಾಲರ್ (ಸುಮಾರು 761 ಕೋಟಿ ರೂ.) ಮೌಲ್ಯದೊಂದಿಗೆ ಪಟ್ಟಿಯಲ್ಲಿ 10 ನೇ ಸ್ಥಾನದಲ್ಲಿರುವ ತಮ್ಮ ಪತಿ ರಣಬೀರ್ ಕಪೂರ್ ಸೇರಿದಂತೆ ಹಲವು ಪುರುಷ ನಟರಿಗಿಂತಲೂ ಉನ್ನತ ಸ್ಥಾನದಲ್ಲಿದ್ದಾರೆ.

  ಆಲಿಯಾ ಭಟ್ ಪ್ರಸ್ತುತ ಪತಿ ರಣ್​​ಬೀರ್ ಕಪೂರ್ ಜೊತೆಗೆ ‘ಲವ್ ಆಂಡ್ ವಾರ್’ ಸಿನಿಮಾನಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾ ಅನ್ನು ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನ ಮಾಡುತ್ತಿದ್ದಾರೆ. ಅದಾದ ಬಳಿಕ ಒಂದು ತೆಲುಗು ಸಿನಿಮಾನಲ್ಲಿ ಆಲಿಯಾ ಅತಿಥಿ ಪಾತ್ರದಲ್ಲಿ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ. ಇವುಗಳ ಜೊತೆಗೆ ‘ತುಂಬಾಡ್ 2’ ಸಿನಿಮಾನಲ್ಲಿ ಸಹ ನಟಿಸಲಿದ್ದಾರೆ.