ನಿಶ್ಚಿತಾರ್ಥ ಮುರಿದುಕೊಂಡ ಕೆಲವೇ ವಾರಗಳಲ್ಲಿ ಮತ್ತೆ ಒಂದಾದ ಪೃಥ್ವಿ ಶಾ-ನಟಿ ಆಕೃತಿ ಅಗರ್ವಾಲ್

•   Tue, Oct 13 2026 05:21:21 PM



• ಹೈದರ್‌ಬಾದ್‌, ಅ.13 (DaijiworldNews/AK): ಟೀಂ ಇಂಡಿಯಾ ಆಟಗಾರ ಪೃಥ್ವಿ ಶಾ ಮತ್ತು ನಟಿ ಆಕೃತಿ ಅಗರ್ವಾಲ್ ನಡುವಿನ ವೈಯಕ್ತಿಕ ಜೀವನ ಮತ್ತೆ ಸುದ್ದಿಯಲ್ಲಿದೆ. ಕೆಲ ತಿಂಗಳ ಹಿಂದೆ ನಿಶ್ಚಿತಾರ್ಥ ಮುರಿದುಕೊಂಡಿದ್ದ ಈ ಜೋಡಿ ಈಗ ಒಂದಾಗಿದ್ದಾರೆ. ತಾವಿಬ್ಬರೂ ಭಿನ್ನ ಅಭಿಪ್ರಾಯಗಳನ್ನು ಮರೆತು ಮತ್ತೆ ಒಟ್ಟಿಗೆ ಜೀವನ ನಡೆಸಲು ನಿರ್ಧರಿಸಿರುವುದಾಗಿ ಖುದ್ದು ಆಕೃತಿ ಸ್ಪಷ್ಟಪಡಿಸಿದ್ದಾರೆ. ಇವರ ಈ ಅನಿರೀಕ್ಷಿತ ನಿರ್ಧಾರ ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ಸಂಚಲನ ಸೃಷ್ಟಿಸಿದೆ.

  ಈ ವರ್ಷ ಮಾರ್ಚ್ ತಿಂಗಳಲ್ಲಿ ಪೃಥ್ವಿ ಶಾ ಮತ್ತು ಆಕೃತಿ ಅದ್ಧೂರಿಯಾಗಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಆದರೆ ಸೆಪ್ಟೆಂಬರ್ ತಿಂಗಳಲ್ಲಿ ಅನಿವಾರ್ಯ ಕಾರಣಗಳಿಂದ ತಾವು ಬೇರ್ಪಡುವುದಾಗಿ ಆಕೃತಿ ಘೋಷಿಸಿದ್ದರು. ಇದು ಅವರ ಅಭಿಮಾನಿಗಳಿಗೆ ತೀವ್ರ ಬೇಸರವನ್ನು ಮಾಡಿತ್ತು. ಇವರು ಬೇರೆ ಆಗಲು ಕಾರಣಗಳೇನು ಎಂಬುದನ್ನು ಫ್ಯಾನ್ಸ್ ಹುಡಕಿದ್ದರು. ಆದರೆ ಈಗ ಇಬ್ಬರ ನಡುವಿನ ಮನಸ್ತಾಪಗಳು ದೂರವಾಗಿವೆ.

  ಈ ಕುರಿತು ಇನ್​ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಆಕೃತಿ ನಡೆದ ವಿಷಯವನ್ನು ಸ್ಪಷ್ಟಪಡಿಸಿದ್ದಾರೆ. ‘ಇತರರ ಮಾತುಗಳನ್ನು ಕೇಳಿ ಮತ್ತು ತಪ್ಪು ಗ್ರಹಿಕೆಯಿಂದ ನಾನು ಆತುರದ ನಿರ್ಧಾರ ತೆಗೆದುಕೊಂಡಿದ್ದೆ. ನಮ್ಮ ನಡುವೆ ಮುಕ್ತ ಮಾತುಕತೆ ನಡೆದ ಬಳಿಕ ನನ್ನ ನಿರ್ಧಾರ ಬದಲಿಸಿದ್ದೇನೆ’ಎಂದು ಅವರು ಬರೆದುಕೊಂಡಿದ್ದಾರೆ.

  ‘ಮತ್ತೊಬ್ಬರ ಪ್ರಭಾವದಿಂದ ತಮ್ಮ ಸಂಬಂಧದಲ್ಲಿ ಬಿರುಕು ಮೂಡಿತ್ತು. ನಾನು ತೆಗೆದುಕೊಂಡ ತಪ್ಪಾದ ನಿರ್ಧಾರಕ್ಕೆ ನಾನೇ ಜವಾಬ್ದಾರಿಯಾಗಿದ್ದೇನೆ. ಇನ್ನುಮುಂದೆ ಯಾರ ಮಾತಿಗೂ ಕಿವಿಗೊಡದೆ ಸ್ವಂತ ತಿಳಿವಳಿಕೆ ಹಾಗೂ ನಂಬಿಕೆಯ ಮೇಲೆ ಜೀವನ ನಡೆಸುತ್ತೇನೆ’ ಎಂದು ಅವರು ಪೋಸ್ಟ್​​ನಲ್ಲಿ ಬರೆದಿದ್ದಾರೆ.

  ಪೃಥ್ವಿ ಶಾ ಕ್ರಿಕೆಟ್​ನಲ್ಲಿ ಸಕ್ರಿಯರಾಗಿದ್ದರೆ. ಆಕೃತಿ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಇತ್ತೀಚೆಗೆ ತೆಲುಗು ಚಿತ್ರರಂಗದಲ್ಲೂ ಅವರು ಗುರುತಿಸಿಕೊಂಡಿದ್ದಾರೆ. ಈಗ ಈ ಜೋಡಿ ಹಳೆಯ ಕಹಿ ನೆನಪುಗಳನ್ನು ಮರೆತು ಹೊಸ ಜೀವನ ಆರಂಭಿಸುತ್ತಿರುವುದಕ್ಕೆ ಅಭಿಮಾನಿಗಳು ಸಂಭ್ರಮ ಮನೆ ಮಾಡಿದೆ.