ವಿಶ್ವದಲ್ಲೇ ಅತಿ ವೇಗದ ಇಂಟರ್ನೆಟ್ ಇರೋದು ಈ ದೇಶದಲ್ಲಿ?!

•   Fri, Dec 19 2025 12:01:46 PM



• ಯುಎಇ, ಡಿ. 19 (DaijiworldNews/TA): ಇದು ಇಂಟರ್ನೆಟ್ ಯುಗ. ಇಲ್ಲಿ ಇಂಟರ್ನೆಟ್ ಬಹುಮುಖ್ಯ, 2G, 3G, 4G ನಂತರ 5G ಯುಗ ಶುರುವಾಗಿದೆ. ಸದ್ಯ, ಇಂಟರ್ನೆಟ್ ಇಲ್ಲಾ ಅಂದ್ರೆ ಯಾವುದೇ ಕೆಲಸ ಆಗೋದಿಲ್ಲ ಅನ್ನೋ ರೇಂಜ್ಗೆ ನಾವು ಇಂಟರ್ನೆಟ್ ಅವಲಂಭಿಸಿದ್ದೇವೆ. ಮೊಬೈಲ್, ಕಚೇರಿ ಹೀಗೆ ಎಲ್ಲಾ ಕಡೆ ಇಂಟರ್ನೆಟ್ ಬಳಕೆ ಬಹುಮುಖ್ಯವಾಗಿದೆ. ಒಂದು ಕ್ಷಣ ಇಂಟರ್ನೆಟ್ ಇಲ್ಲ ಎಂದ್ರೇ ಅಲ್ಲೋಲ ಕಲ್ಲೋಲ ಸೃಷ್ಟಿಯಾಗುವ ಮಟ್ಟಕ್ಕೆ ತಲುಪಿದೆ.

  

  ಇಂಟರ್ನೆಟ್ ಬಳಕೆಯ ಜೊತೆ ಇಂಟರ್ನೆಟ್ ಸ್ಪೀಡ್ ಕೂಡ ಬಹಳ ಮುಖ್ಯವಾಗಿದೆ. ಇದ್ದಕ್ಕಂತಾನೆ ಹಲವು ಪ್ಲಾನ್ ಕೂಡ ಇದೆ. ಅಂದ್ಹಾಗೇ ಇಡೀ ವಿಶ್ವದಲ್ಲಿ ಅತ್ಯಂತ ವೇಗವಾದ ಇಂಟರ್ನೆಟ್ ಹೊಂದಿರುವ ದೇಶ ಯಾವುದು, ಅಲ್ಲಿ ಇಂಟರ್ನೆಟ್​​ನ ಸ್ಪೀಡ್ ಎಷ್ಟಿದೆ ಅನ್ನೋದ್ರ ಕುರಿತು ನಿಮಗೇನಾದ್ರು ಗೊತ್ತಾ? ಇಲ್ಲಿದೆ ಒಂದಷ್ಟು ಮಾಹಿತಿ.

  ತಂತ್ರಜ್ಞಾನದ ವಿಷಯದಲ್ಲಿ ಒಂದು ದೇಶ ಮುಂದಿದೆ ಎಂಬುದಕ್ಕೆ ಪ್ರಮುಖ ಉದಾಹರಣೆಯೆಂದರೆ ಆ ದೇಶದಲ್ಲಿ ಇಂಟರ್ನೆಟ್ ವೇಗ. ವೆಬ್‌ಸೈಟ್‌ಗಳನ್ನು ಬ್ರೌಸ್ ಮಾಡಲು, ವೀಡಿಯೊಗಳನ್ನು ಸ್ಟ್ರೀಮಿಂಗ್ ಮಾಡಲು, ದೊಡ್ಡ ಫೈಲ್‌ಗಳನ್ನು ಸೆಕೆಂಡುಗಳಲ್ಲಿ ಡೌನ್‌ಲೋಡ್ ಮಾಡಲು, ಆನ್‌ಲೈನ್ ಕಲಿಕೆಯಲ್ಲಿ ಭಾಗವಹಿಸಲು ಮತ್ತು ವರ್ಚುವಲ್ ಸಭೆಗಳಿಗೆ ವೇಗದ ಇಂಟರ್ನೆಟ್ ಅತ್ಯಗತ್ಯ. ಇದು ದೈನಂದಿನ ಅಗತ್ಯಗಳನ್ನು ಪೂರೈಸುವುದಲ್ಲದೆ ವ್ಯಾಪಾರ ಉತ್ಪಾದಕತೆ ಮತ್ತು ಡಿಜಿಟಲ್ ನಾವೀನ್ಯತೆಯನ್ನು ಸಹ ಬೆಂಬಲಿಸುತ್ತದೆ. ಅದಕ್ಕಾಗಿಯೇ ದೇಶಗಳು ಬ್ರಾಡ್‌ಬ್ಯಾಂಡ್ ಮತ್ತು ಮೊಬೈಲ್ ಡೇಟಾದಲ್ಲಿ ವೇಗದ ನೆಟ್‌ವರ್ಕ್‌ಗಳನ್ನು ಒದಗಿಸಲು ಸ್ಪರ್ಧಿಸುತ್ತಿವೆ.

  ಸ್ಪೀಡ್‌ಟೆಸ್ಟ್ ಗ್ಲೋಬಲ್ ಇಂಡೆಕ್ಸ್ ಮತ್ತು ಸ್ಟ್ಯಾಟಿಸ್ಟಾ ವರದಿಗಳ ಪ್ರಕಾರ, ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) 2025ರಲ್ಲಿ ವಿಶ್ವದ ಅತ್ಯಂತ ವೇಗದ ಮೊಬೈಲ್ ಇಂಟರ್ನೆಟ್ ಹೊಂದಿರುವ ದೇಶವಾಗಿ ಹೊರಹೊಮ್ಮಿದೆ. ಇತರ ದೇಶಗಳಿಗೆ ಹೋಲಿಸಿದರೆ ಇಲ್ಲಿ ಇಂಟರ್ನೆಟ್ ವೇಗ ಸ್ಥಿರವಾಗಿ ಹೆಚ್ಚಾಗಿದೆ. ಇಲ್ಲಿ ಸರಾಸರಿ ಇಂಟರ್ನೆಟ್ ವೇಗವು ಪ್ರತಿ ಸೆಕೆಂಡಿಗೆ 546 ರಿಂದ 600 ಮೆಗಾಬೈಟ್‌ಗಳ ನಡುವೆ ಇದೆ ಎಂದು ತಿಳಿದು ಬಂದಿದೆ.

  ಇಂಟರ್​ನೆಟ್ ವೇಗದಲ್ಲಿ ಮೊದಲ ಸ್ಥಾನದಲ್ಲಿದ್ದ ಕತಾರ್ ಎರಡನೇ ಸ್ಥಾನಕ್ಕೆ ಕುಸಿತ ಕಂಡಿದೆ. ಕತಾರ್ನಲ್ಲಿ ಮೊಬೈಲ್ ಇಂಟರ್ನೆಟ್ ವೇಗ 500 ರಿಂದ 517 ಎಂಬಿಪಿಎಸ್‌ ವರೆಗೆ ಇದೆ. ಮತ್ತೊಂದೆಡೆ, ಕುವೈತ್ 370 ರಿಂದ 400 ಎಂಬಿಪಿಎಸ್‌ ವೇಗದೊಂದಿಗೆ ಮೂರನೇ ಸ್ಥಾನದಲ್ಲಿದೆ. ಇದರ ನಂತರ ಬ್ರೆಜಿಲ್ 229 ರಿಂದ 252 ಎಂಬಿಪಿಎಸ್‌ , ಬಹ್ರೇನ್ 228-237ಎಂಬಿಪಿಎಸ್‌ , ಬಲ್ಗೇರಿಯಾ 224 ರಿಂದ 237 ಎಂಬಿಪಿಎಸ್‌ , ದಕ್ಷಿಣ ಕೊರಿಯಾ 218-231 ಎಂಬಿಪಿಎಸ್‌ ವೇಗದೊಂದಿಗೆ ನಂತರದ ಸ್ಥಾನದಲ್ಲಿದೆ. ಚೀನಾ 201 ರಿಂದ 202 ಎಂಬಿಪಿಎಸ್‌ , ಸೌದಿ ಅರೇಬಿಯಾ 191-198 ಎಂಬಿಪಿಎಸ್‌ ಮತ್ತು ಡೆನ್ಮಾರ್ಕ್ 178-196 ಎಂಬಿಪಿಎಸ್‌ ಇಂಟರ್ನೆಟ್ ವೇಗವನ್ನು ಹೊಂದಿವೆ.

  ಬ್ರಾಡ್‌ಬ್ಯಾಂಡ್ ಇಂಟರ್ನೆಟ್: ಬ್ರಾಡ್‌ಬ್ಯಾಂಡ್ ಇಂಟರ್ನೆಟ್ ಎಂದರೆ ಮನೆಗಳು ಮತ್ತು ಕಚೇರಿಗಳಲ್ಲಿ ಬಳಸುವ ಫೈಬರ್, ಕೇಬಲ್ ಅಥವಾ DSL ನಂತಹ ವೈರ್ಡ್ ಇಂಟರ್ನೆಟ್ ಸಂಪರ್ಕಗಳು. ಡೇಟಾ ಪ್ರಕಾರ, ಸಿಂಗಾಪುರವು ವಿಶ್ವದಲ್ಲೇ ಅತಿ ವೇಗದ ಸ್ಥಿರ ಬ್ರಾಡ್‌ಬ್ಯಾಂಡ್ ಇಂಟರ್ನೆಟ್ ಅನ್ನು ಹೊಂದಿದೆ. ಸಿಂಗಾಪುರ ಅತಿ ಹೆಚ್ಚು ಸರಾಸರಿ ಡೌನ್‌ಲೋಡ್ ವೇಗವನ್ನು ಹೊಂದಿದೆ. ಇಲ್ಲಿ ಸರಾಸರಿ ಇಂಟರ್ನೆಟ್ ವೇಗ 387 ಮತ್ತು 406 ಎಂಬಿಪಿಎಸ್‌ ನಡುವೆ ಇದೆ.

  ಚಿಲಿ 332 ರಿಂದ 361 ಎಂಬಿಪಿಎಸ್‌ ವೇಗದೊಂದಿಗೆ ಎರಡನೇ ಸ್ಥಾನವನ್ನ ಪಡೆದುಕೊಂಡಿದೆ. ಅದರ ನಂತರ ಹಾಂಗ್ ಕಾಂಗ್ (325- 343 ಎಂಬಿಪಿಎಸ್‌ ), ಯುನೈಟೆಡ್ ಅರಬ್ ಎಮಿರೇಟ್ಸ್ (318- 343), ಫ್ರಾನ್ಸ್ (318- 330), ಮಕಾವು (290- 318 ಎಂಬಿಪಿಎಸ್‌ ), ಯುನೈಟೆಡ್ ಸ್ಟೇಟ್ಸ್ (285- 297 ಎಂಬಿಪಿಎಸ್‌ ), ಐಸ್ಲ್ಯಾಂಡ್ (270- 291 ಎಂಬಿಪಿಎಸ್‌ ), ದಕ್ಷಿಣ ಕೊರಿಯಾ (259- 288 ಎಂಬಿಪಿಎಸ್‌ ), ಮತ್ತು ಥೈಲ್ಯಾಂಡ್ (256- 273 ಎಂಬಿಪಿಎಸ್‌ ) ಹೊಂದಿದೆ.

  ಭಾರತಕ್ಕೆ ಎಷ್ಟನೇ ಸ್ಥಾನ?: ನಮ್ಮ ದೇಶದಲ್ಲಿ 5G ನೆಟ್‌ವರ್ಕ್ ಬಹುತೇಕ ಸಂಪೂರ್ಣವಾಗಿ ನಿಯೋಜಿಸಲ್ಪಟ್ಟಿರುವುದರಿಂದ, ಭಾರತೀಯ ಬಳಕೆದಾರರು ಅತ್ಯುತ್ತಮ ಇಂಟರ್ನೆಟ್ ವೇಗವನ್ನು ಪಡೆಯಲು ಸಮರ್ಥರಾಗಿದ್ದಾರೆ. ಆದಾಗ್ಯೂ, ವಿಶ್ವಾದ್ಯಂತ ಶ್ರೇಯಾಂಕಕ್ಕೆ ಹೋಲಿಸಿದರೆ, ಇಂಟರ್ನೆಟ್ ವೇಗದಲ್ಲಿ ಭಾರತವು ತುಂಬಾ ಹಿಂದುಳಿದಿದೆ. ಭಾರತದಲ್ಲಿ ಮೊಬೈಲ್ ಇಂಟರ್ನೆಟ್ ವೇಗವು ತುಂಬಾ ಕಡಿಮೆಯಾಗಿದೆ. 131 ರಿಂದ 133 ಎಂಬಿಪಿಎಸ್‌ ವೇಗದೊಂದಿಗೆ ಇದು ಈ ಪಟ್ಟಿಯಲ್ಲಿ 25 ಅಥವಾ 26ನೇ ಸ್ಥಾನದಲ್ಲಿದೆ. ಏತನ್ಮಧ್ಯೆ, ಬ್ರಾಡ್‌ಬ್ಯಾಂಡ್ ಇಂಟರ್ನೆಟ್ ವೇಗವು 61 ರಿಂದ 120 ಎಂಬಿಪಿಎಸ್‌ ನಡುವೆ ಇದೆ.