ಜಗತ್ತಿನ ಮೋಸ್ಟ್ ವಾಂಟೆಡ್ ಡ್ರಗ್ ಲಾರ್ಡ್ ‘ಎಲ್ ಮೆಂಚೊ’ ಸಾವು - ಭುಗಿಲೆದ್ದ ಹಿಂಸಾಚಾರ

•   Mon, Feb 23 2026 09:19:26 AM



• ಮೆಕ್ಸಿಕೊ, ಫೆ. 23 (DaijiworldNews/TA): ಜಗತ್ತಿನ ಅತ್ಯಂತ ಮೋಸ್ಟ್ ವಾಂಟೆಡ್ ಮಾದಕವಸ್ತು ಕಳ್ಳಸಾಗಣೆದಾರರಲ್ಲಿ ಒಬ್ಬನಾಗಿದ್ದ ಎಲ್ ಮೆಂಚೊ ಎಂದೇ ಪರಿಚಿತನಾದ ನೆಮೆಸಿಯೋ ರುಬೆನ್ ಒಸೆಗುರಾ ಸರ್ವಾಂಟೆಸ್ ಮಿಲಿಟರಿ ಕಾರ್ಯಾಚರಣೆಯಲ್ಲಿ ಮೃತಪಟ್ಟಿದ್ದಾನೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

  

  59 ವರ್ಷದ ಈ ಕುಖ್ಯಾತ ಡ್ರಗ್ ಲಾರ್ಡ್, ಮೆಕ್ಸಿಕೊದ ಪ್ರಮುಖ ಅಪರಾಧ ಸಂಘಟನೆಯ ನಾಯಕರಾಗಿದ್ದು, ದೀರ್ಘಕಾಲದಿಂದ ಪರಾರಿಯಾಗಿದ್ದ. ಜಾಲಿಸ್ಕೊ ರಾಜ್ಯದಲ್ಲಿ ಮೆಕ್ಸಿಕನ್ ಭದ್ರತಾ ಪಡೆಗಳು ನಡೆಸಿದ ವಿಶೇಷ ಕಾರ್ಯಾಚರಣೆಯ ವೇಳೆ ಗಂಭೀರವಾಗಿ ಗಾಯಗೊಂಡು ಬಳಿಕ ಸಾವನ್ನಪ್ಪಿದ್ದಾನೆ ಎನ್ನಲಾಗಿದೆ.

  ಎಲ್ ಮೆಂಚೊ ಬಂಧನಕ್ಕೆ ಅಮೆರಿಕ ಸೇರಿದಂತೆ ಹಲವು ದೇಶಗಳು ತೀವ್ರ ಹುಡುಕಾಟ ನಡೆಸುತ್ತಿದ್ದು, ಆತನನ್ನು ಹಿಡಿದುಕೊಟ್ಟವರಿಗೆ 15 ಮಿಲಿಯನ್ ಡಾಲರ್ (ಸುಮಾರು ರೂ.120 ಕೋಟಿ) ಬಹುಮಾನ ಘೋಷಿಸಲಾಗಿತ್ತು. ಆತನು ಜಾಗತಿಕ ಮಟ್ಟದಲ್ಲಿ ಮಾದಕವಸ್ತು ಸಾಗಣೆ ಜಾಲವನ್ನು ನಡೆಸುತ್ತಿದ್ದ ಪ್ರಮುಖ ವ್ಯಕ್ತಿಯಾಗಿದ್ದನು. ಇದೀಗ ಒಸೆಗುರಾ ಸಾವಿನ ಸುದ್ದಿ ಹೊರಬಿದ್ದ ನಂತರ ಮೆಕ್ಸಿಕೊದ ವಿವಿಧ ಭಾಗಗಳಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಹಿಂಸಾಚಾರ ಭುಗಿಲೆದ್ದ ಭೀತಿ ಎದುರಾಗಿದೆ. ಭದ್ರತಾ ಪಡೆಗಳು ಹೈ ಅಲರ್ಟ್ ಘೋಷಿಸಿದ್ದು, ಸೂಕ್ಷ್ಮ ಪ್ರದೇಶಗಳಲ್ಲಿ ಹೆಚ್ಚುವರಿ ಪಡೆಗಳನ್ನು ನಿಯೋಜಿಸಲಾಗಿದೆ.