ಕ್ಯಾಲಿಫೋರ್ನಿಯಾ: ನದಿಯಲ್ಲಿ ಮುಳುಗುತ್ತಿದ್ದ ಮಕ್ಕಳನ್ನು ರಕ್ಷಿಸಿ ನೀರು ಪಾಲಾದ ಭಾರತೀಯ ಯುವಕ

•   Sun, Aug 09 2020 03:35:25 PM



• ಕ್ಯಾಲಿಫೋರ್ನಿಯಾ, ಆ 09 (DaijiworldNews/PY): ಭಾರತೀಯ ಮೂಲದ ಸಿಖ್‌ ಯುವಕನೋರ್ವ ನದಿಯಲ್ಲಿ ಸಿಲುಕಿದ್ದ ಮೂರು ಮಕ್ಕಳನ್ನು ರಕ್ಷಿಸುವ ಸಂದರ್ಭ ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ.

  

  ಮೃತಪಟ್ಟ ಯುವಕನನ್ನು ಪಂಜಾಬ್‌ನ ಗುರುದಾಸ್‌ಪುರ ಜಿಲ್ಲೆಯ ಮಂಜೀತ್‌ ಸಿಂಗ್‌ (28) ಎನ್ನಲಾಗಿದೆ.

  ಮೂರು ಮಕ್ಕಳು ಕ್ಯಾಲಿಫೋರ್ನಿಯಾದ ಕಿಂಗ್ಸ್‌ ನದಿ ತೀರದಲ್ಲಿ ಆಟವಾಡುತ್ತಿದ್ದರು. ಈ ವೇಳೆ ನೀರಿನ ಸೆಳೆತಕ್ಕೆ ಸಿಲುಕಿದ ಮೂರು ಮಕ್ಕಳು ನದಿಯಲ್ಲಿ ಮುಳುತ್ತಿದ್ದರು. ಮೂರು ಮಕ್ಕಳು ಸಹಾಯಕ್ಕಾಗಿ ಅಂಗಲಾಚುತ್ತಿರುವುದನ್ನು ಕಂಡ ಮಂಜೀತ್‌ ಸಿಂಗ್‌‌ ಕೂಡಲೇ ನೀರಿಗೆ ಜಿಗಿದಿದ್ದಾರೆ. ತನ್ನ ತಲೆಯಲ್ಲಿರುವ ಪೇಟವನ್ನು ತೆಗೆದು ಅದನ್ನು ಹಗ್ಗವಾಗಿ ಉಪಯೋಗಿಸಿ ಮಕ್ಕಳನ್ನು ರಕ್ಷಿಸಲು ಪ್ರಯತ್ನಿಸಿದ್ದು, ಬಳಿಕ ಮೂವರು ಮಕ್ಕಳನ್ನು ದಡಕ್ಕೆ ಸೇರಿಸಿದ್ದಾರೆ. ಆದರೆ, ದುರಾದೃಷ್ಟವಶಾತ್‌‌ ಮಂಜೀತ್‌‌‌ ಸಿಂಗ್‌ ಅವರು ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

  ಮೂವರು ಮಕ್ಕಳ ಪೈಕಿ 8 ವರ್ಷದ ಬಾಲಕಿ ಹಾಗೂ 10 ಬಾಲಕ ಸುರಕ್ಷಿತವಾಗಿದ್ದು, 8 ವರ್ಷದ ಬಾಲಕಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ತಿಳಿದುಬಂದಿದೆ.

  2 ವರ್ಷಗಳ ಹಿಂದೆ ಮಂಜೀತ್‌ ಸಿಂಗ್‌ ಅವರು ಭಾರತದಿಂದ ಅಮೇರಿಕಕ್ಕೆ ಹೋಗಿದ್ದರು.