ಜೊ ಬಿಡೆನ್‌‌ ಪತ್ನಿ ಜಿಲ್‌‌ರ ನೀತಿ ನಿರ್ದೇಶಕರಾಗಿ ಭಾರತ ಮೂಲದ ಅಮೆರಿಕನ್‌ ಮಾಲಾ ಅಡಿಗ ನೇಮಕ

•   Sat, Nov 21 2020 11:29:58 AM



• ವಾಷಿಂಗ್ಟನ್‌, ನ.21 (DaijiworldNews/PY): ಅಮೇರಿಕಾದ ನಿಯೋಜಿತ ಅಧ್ಯಕ್ಷ ಜೊ ಬಿಡೆನ್‌‌ ಅವರು ತಮ್ಮ ಪತ್ನಿ ಜಿಲ್‌‌ ಬಿಡೆನ್‌ ಅವರ ನೀತಿ ನಿರ್ದೇಶಕ ಸ್ಥಾನಕ್ಕೆ ಭಾರತ ಮೂಲದ ಅಮೆರಿಕನ್‌ ಮಾಲಾ ಅಡಿಗ ಅವರನ್ನು ಶುಕ್ರವಾರ ನೇಮಕ ಮಾಡಲಾಗಿದೆ.

  

  ಸದ್ಯ ಮಾಲಾ ಅಡಿಗ ಅವರು ಅಮೇರಿಕಾ ಶಿಕ್ಷಣ ಹಾಗೂ ಸಾಂಸ್ಕೃತಿಕ ವ್ಯವಹಾರಗಳ ಅಡಿ ಬರುವ ರಾಷ್ಟ್ರೀಯ ಶಿಕ್ಷಣ ಯೋಜನೆಯಲ್ಲಿ ಉಪಸಹಾಯಕ ಕಾರ್ಯದರ್ಶಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಈ ಹಿಂದೆ ಬಿಡೆನ್‌ ಅವರ ಫೌಂಡೇಶನ್‌ನಲ್ಲಿ ಉನ್ನತ ಶಿಕ್ಷಣ ಹಾಗೂ ಮಿಲಿಟರಿ ಕುಟುಂಬಗಳ ನಿರ್ದೇಶಕರಾಗಿ ಮಾಲಾ ಅಡಿಗ ಅವರು ಕಾರ್ಯ ನಿರ್ವಹಿಸುತ್ತಿದ್ದರು.

  ಮಾಲಾ ಅಡಿಗ ಅವರು ಗ್ರಿನ್ನೆಲ್ ಕಾಲೇಜಿನಲ್ಲಿ ಪದವಿ ಪಡೆದಿದ್ದಾರೆ. ಚಿಕಾಗೊ ಕಾನೂನು ಶಾಲೆಯಿಂದ ಕಾನೂನು ಶಾಸ್ತ್ರದಲ್ಲಿ ಪದವಿ ಕೂಡಾ ಪಡೆದುಕೊಂಡಿದ್ದಾರೆ. ಅಲ್ಲದೇ ಇವರೂ ವಕೀಲರೂ ಆಗಿದ್ದು, 2008ರಲ್ಲಿ ಮಾಜಿ ಅಧ್ಯಕ್ಷ ಒಬಾಮಾ ಅವರ ಪ್ರಚಾರ ಅಭಿಯಾನಕ್ಕೆ ಸೇರುವ ಮುನ್ನ ಚಿಕಾಗೊ ಕಾನೂನು ಸಂಸ್ಥೆಯಲ್ಲಿ ಸೇವೆ ಸಲ್ಲಿಸಿದ್ದರು.