'ಕೊರೊನಾ ವಿರುದ್ದ ಹೋರಾಟದಲ್ಲಿ ಯಶಸ್ಸು ಸಾಧಿಸಲು ಸುದೀರ್ಘ ಸಮಯ ಬೇಕು' - ಜೋ ಬಿಡೆನ್‌‌

•   Tue, Jan 26 2021 02:16:37 PM



• ವಾಷಿಂಗ್ಟನ್, ಜ.26 (DaijiworldNews/PY): "ಕೊರೊನಾ ವಿರುದ್ದ ಹೋರಾಟದಲ್ಲಿ ಗೆಲುವು ಸಾಧಿಸಲು ಸಾಕಷ್ಟು ಸಮಯದ ಅವಶ್ಯಕತೆ ಇದೆ. ಈ ಸಲುವಾಗಿ ಕಾರ್ಯನಿರತನಾಗಿದ್ದೇನೆ" ಎಂದು ಅಮೇರಿಕಾ ಅಧ್ಯಕ್ಷ ಜೋ ಬಿಡೆನ್‌‌ ತಿಳಿಸಿದ್ದಾರೆ.

  

  ಶ್ವೇತಭವನದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, "ಕೊರೊನಾ ವಿರುದ್ದ ನಾವು ಯಶಸ್ಸು ಸಾಧಿಸುತ್ತೇವೆ. ಆದರೆ. ಈ ಹೋರಾಟದಲ್ಲಿ ಕೇವಲ ಎರಡು ತಿಂಗಳಿನಲ್ಲಿ ಯಶಸ್ಸು ಸಾಧಿಸುತ್ತೇವೆ ಎಂದು ಹೇಳಲು ಸಾಧ್ಯವಿಲ್ಲ. ಇದಕ್ಕೆ ದೀರ್ಘ ಸಮಯದ ಅವಶ್ಯಕತೆ ಇದೆ" ಎಂದಿದ್ದಾರೆ.

  "ಒಂದು ವೇಳೆ ನನ್ನ ಗ್ರಹಿಕೆಯಲ್ಲಿ ತಪ್ಪಾದಲ್ಲಿ ಸರಿಪಡಿಸಿ. ಇದೇ ಮೊದಲ ಬಾರಿಗೆ ಕೊರೊನಾದಿಂದ ಮೃತಪಟ್ಟವರ ಸಂಖ್ಯೆ ಹಾಗೂ ಸೋಂಕಿತರ ಸಂಖ್ಯೆ ಇಳಿಕೆಯಾಗುತ್ತಿದೆ" ಎಂದು ಹೇಳಿದ್ದಾರೆ.

  "ಅಮೇರಿಕಾದಲ್ಲಿ ಕೊರೊನಾದಿಂದ ಸಾವನ್ನಪ್ಪಿದವರ ಸಂಖ್ಯೆ 4.10 ಲಕ್ಷ ಆಗಿದೆ. ಆದರೆ, ಮೊದಲಿನ ಅಂದಾಜು ಪ್ರಕಾರ 6.6 ಲಕ್ಷ ಇರಬೇಕಿತ್ತು. ಅಮೇರಿಕಾದಲ್ಲಿ ಕೊರೊನಾ ವಿರುದ್ದದ ಹೋರಾಟ ಹಾಗೂ ಕೊರೊನಾ ಲಸಿಕಾ ಪ್ರಕ್ರಿಯೆಯು ಸರಿಯಾದ ದಿಕ್ಕಿನಲ್ಲಿ ಮುಂದುವರೆಯುತ್ತಿದೆ" ಎಂದಿದ್ದಾರೆ.