ಟೆಕ್ಸಾಸ್‌‌ನಲ್ಲಿ ಶೂಟೌಟ್‌ - ಮೂವರು ಮೃತ್ಯು, ಓರ್ವರಿಗೆ ಗಾಯ

•   Fri, Mar 12 2021 11:18:00 AM



• ಟೆಕ್ಸಾಸ್, ಮಾ.12 (DaijiworldNews/PY): ಅಮೇರಿಕಾದ ಟೆಕ್ಸಾಸ್‌ ನಗರದ ನೈರುತ್ಯ ಹೂಸ್ಟನ್‌‌ನಲ್ಲಿ ನಡೆದ ಗುಂಡಿನ ದಾಳಿಯಲ್ಲಿ ಮೂವರು ಸಾವನ್ನಪ್ಪಿದ್ದು, ಓರ್ವ ತೀವ್ರ ಗಾಯಗೊಂಡಿದ್ದಾರೆ.

  
  ಸಾಂದರ್ಭಿಕ ಚಿತ್ರ

  "ರಾತ್ರಿ 11 ಗಂಟೆಯ ನಂತರ ನೈರುತ್ಯ ಹೂಸ್ಟನ್‌ನ ವಸತಿ ಸಂಕೀರ್ಣವೊಂದರ ಹೊರಗೆ ಶೂಟೌಟ್‌ ನಡೆದಿದೆ" ಎಂದು ಪೊಲೀಸರು ತಿಳಿಸಿದ್ದಾರೆ.

  "ಗುಂಡಿನ ದಾಳಿಯಲ್ಲಿ 18 ವರ್ಷದ ಯುವಕ, 18ರ ಯುವತಿ ಮತ್ತು 40 ವರ್ಷದ ವ್ಯಕ್ತಿ ಸಾವನ್ನಪ್ಪಿದ್ದಾರೆ. ಇನ್ನೋರ್ವ ಯುವತಿ ಗಾಯಗೊಂಡಿದ್ದು, ಆಸ್ಪತ್ರೆಯಲ್ಲಿ ಚೇತರಿಸಿಕೊಳ್ಳುತ್ತಿದ್ದಾಳೆ" ಎಂದು ಹೇಳಿದ್ದಾರೆ.

  "ಅಪಾರ್ಟ್‌ಮೆಂಟ್‌ನ ಪಾರ್ಕಿಂಗ್‌ ಪ್ರದೇಶದಲ್ಲಿ ಐದು ಮಂದಿ ಹಾಗೂ ಇತರ ಇಬ್ಬರ ನಡುವೆ ಜಗಳವಾಗಿದ್ದು, ಹತ್ಯೆಯಲ್ಲಿ ಅಂತ್ಯಗೊಂಡಿದೆ. ಐದು ಮಂದಿ ಇದ್ದ ಗುಂಪಿನತ್ತ ಇಬ್ಬರು ಹಲವು ಸುತ್ತು ಗುಂಡು ಹಾರಿಸಿದರು" ಎಂದು ಪೊಲೀಸರು ತಿಳಿಸಿದ್ದಾರೆ.

  "ಗುಂಡಿನ ದಾಳಿ ನಡೆಸಿದವರು ಸ್ಥಳದಿಂದ ಪರಾರಿಯಾಗಿದ್ದಾರೆ" ಎಂದು ಮೂಲಗಳು ತಿಳಿಸಿವೆ.