ವೈಮಾನಿಕ ದಾಳಿ ನಡೆಸಿ ಸಂಭ್ರಮಾಚರಿಸಿದ ತಾಲಿಬಾನ್‌ - ಮಕ್ಕಳು ಸೇರಿ ಹಲವರು ಮೃತ್ಯು

•   Sat, Sep 04 2021 11:18:53 AM



• ಕಾಬೂಲ್, ಸೆ. 04 (DaijiworldNews/PY): ಸಂಭ್ರಮಾಚರಣೆಗಾಗಿ ತಾಲಿಬಾನ್‌ ಉಗ್ರರು ಕಾಬೂಲ್‌ನಲ್ಲಿ ವೈಮಾನಿಕ ಗುಂಡಿನ ದಾಳಿ ನಡೆಸಿದ್ದು, ಪರಿಣಾಮ ಮಕ್ಕಳು ಸೇರಿದಂತೆ ಹಲವು ಮಂದಿ ಮೃತಪಟ್ಟಿದ್ದಾರೆ ಎಂದು ಸುದ್ದಿಸಂಸ್ಥೆಯೊಂದು ವರದಿ ಮಾಡಿದೆ.

  

  ತಾಲಿಬಾನ್‌ ಪಡೆಗಳು ಪಂಜ್‌ಶೀರ್‌ ಕಣಿವೆಯ ಮೇಲೆ ಹಿಡಿತ ಸಾಧಿಸಿದ್ದು, ಅಫ್ಗಾನಿಸ್ತಾನದ ನ್ಯಾಷನಲ್‌ ರೆಸಿಸ್ಟೆನ್ಸ್‌ ಫ್ರಂಟ್‌ ಅನ್ನು ಸೋಲಿಸಲಾಗಿದೆ ಎಂದು ತಾಲಿಬಾನ್‌‌ ಹೇಳಿಕೊಂಡಿದೆ.

  ಕಾಬೂಲ್‌ನಾದ್ಯಂತ ಶುಕ್ರವಾರ ಸಂಭ್ರಮದ ಗುಂಡಿನ ಸದ್ದು ಕೇಳಿಸಿದೆ. ಈ ವೇಳೆ ಗಾಯಗೊಂಡ ತಮ್ಮ ಸಂಬಂಧಿಕರನ್ನು ಜನರು ಆಸ್ಪತ್ರೆಗೆ ಕರೆದೊಯ್ಯುತ್ತಿರುವ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಫೋಟೋ ಹಾಗೂ ವಿಡಿಯೋಗಳಲ್ಲಿ ಕಂಡುಬಂದಿದೆ.

  ‌ಅಲ್ಲಾಹನ ಕೃಪೆಯಿಂದ ನಾವು ಇಡೀ ಅಫ್ಗಾನಿಸ್ತಾನ್ ಮೇಲೆ ಹಿಡಿತ ಸಾಧಿಸಿದ್ದೇವೆ. ನಮಗೆ ತೊಂದರೆ ಮಾಡಿದವರನ್ನು ಸೋಲಿಸಲಾಗಿದೆ. ಪಂಜ್‌ಶೀರ್‌ ಇದೀಗ ನಮ್ಮ ಹಿಡಿತದಲ್ಲಿದೆ ಎಂದು ತಾಲಿಬಾನ್‌ ಕಮಾಂಡ್‌ನ ಹೇಳಿಕೆಯನ್ನು ಸುದ್ದಿಸಂಸ್ಥೆಯೊಂದು ವರದಿ ಮಾಡಿದೆ.