ಅಪಘಾತಕ್ಕೀಡಾದ ಹೇಮರಾಜ್ ರನ್ನು ತಯ್ನಾಡಿಗೆ ಕಳುಹಿಸಲು ಸಹಕಾರಿಯಾದ ಕೆ.ಸಿ.ಎಫ್.

•   Sat, Oct 16 2021 02:15:49 PM



• ದಮ್ಮಾಮ್ ಅ 16 (DaijiworldNews/MS): ರಾಜಸ್ಥಾನದ ನಿವಾಸಿ ಹೇಮರಾಜ್ ಎಂಬುವವರು ಅಪಘಾತಕ್ಕೀಡಾಗಿ ಕಿಂಗ್ ಫಹಾದ್ ಮಿಲಿಟರಿ ಆಸ್ಪತ್ರೆಯಲ್ಲಿ (ಧಹ್ರಾನ್, ಅಬ್ಕೈಕ್ ರಸ್ತೆ) ಪ್ರಜ್ಞಾಹೀನರಾಗಿ ಕೋಮಾ ರೋಗಿಯಾಗಿ ತಿಂಗಳುಗಳ ಹಿಂದೆ ದಾಖಲಾಗಿದ್ದರು. ಇಂತಹ ರೋಗಿಯನ್ನು ಕರ್ನಾಟಕ ಕಲ್ಚರಲ್ ಫೌಂಡೇಶನ್ (KCF) ಗೆ ಮರಳಿ ಸ್ವದೇಶಕ್ಕೆ ತರುವುದು ಒಂದು ಸವಾಲಾಗಿತ್ತು.

  

  ಹೇಮರಾಜ್ ಕೋಮಾದಿಂದ ಹೊರಬಂದು ಎರಡು ಪ್ರಮುಖ ಶಸ್ತ್ರಚಿಕಿತ್ಸೆಗಳಿಗೆ ಒಳಗಾಗಿದ್ದರು, ಆದರೆ ಇನ್ನೂ ಬದುಕಲು ಆಮ್ಲಜನಕದ ಪೂರೈಕೆಯ ಮೇಲೆ ಅವಲಂಬಿತರಾಗಿದ್ದರು. ಕೆ.ಸಿ.ಎಫ್ ಸೌದಿ ಸಾಂತ್ವನ ವಿಭಾಗದ ನಾಯಕರಾದ ಮೊಹಮ್ಮದ್ ಮಲೆಬೆಟ್ಟು ಹಾಗು ದಮ್ಮಾಮ್ ಝೋನ್ ನಾಯಕರಾದ ಬಾಷಾ ಗಂಗಾವಳಿ ಅವರ ನೇತೃತ್ವದಲ್ಲಿ ಸಂಸ್ಥೆಯ ಇತರ ಸ್ವಯಂಸೇವಕರೊಂದಿಗೆ ನಿಯಮಿತವಾಗಿ ಭೇಟಿ ನೀಡಿ ಸುಮಾರು 4 ತಿಂಗಳುಗಳಿಂದ ರೋಗಿಗೆ ತನ್ನ ಮೂಲಭೂತ ಅಗತ್ಯಗಳನ್ನು ಪೂರೈಸಲು ಸಹಾಯ ಮಾಡುತ್ತಾ ಬಂದಿದೆ.

  ಸಂಸ್ಥೆಯು ಹೇಗಾದರೂ ಮಾಡಿ ರೋಗಿಯನ್ನು ಸ್ವದೇಶಕ್ಕೆ ಹಿಂದಿರುಗಿಸುವ ಕಾರ್ಯವನ್ನು ಕೈಗೆತ್ತಿಕೊಂಡಿತು, ಆದರೆ ಸೌದಿ ಆರೋಗ್ಯ ವಿಭಾಗದ ವಿವಿಧ ನಿಯಮಾವಳಿಯ ಕಾರಣ ಎರಡು ಬಾರಿ ವೈಫಲ್ಯವನ್ನು ಎದುರಿಸಿದರು ಮತ್ತು ಅವರಿಗೆ ಆಮ್ಲಜನಕದ ಪೂರೈಕೆಯೊಂದಿಗೆ ಮಾನದಂಡಗಳನ್ನು ಪೂರೈಸುವಲ್ಲಿ ತೊಂದರೆ ಉಂಟಾಯಿತು. ಹೆಚ್ಚುವರಿಯಾಗಿ, ಆಮ್ಲಜನಕದ ಪೂರೈಕೆಯೊಂದಿಗೆ ರೋಗಿಯನ್ನು ಸ್ಟ್ರೆಚರ್‌ನಲ್ಲಿ ಸಾಗಿಸಲು ಟಿಕೆಟ್ ಹಣ ವ್ಯವಸ್ಥೆ ಮಾಡಬೇಕಿತ್ತು (ಇದರ ಬೆಲೆ ಸುಮಾರು 10 ಸಾವಿರ ರಿಯಾಲ್)

  ಈಗಾಗಲೇ ಲಕ್ಷಾಂತರ ರಿಯಾಲ್ ಖರ್ಚು ಮಾಡಿರುವ ಕಾರಣ ಹೇಮರಾಜ್ ಅವರ ಪ್ರಾಯೋಜಕರು ಮತ್ತು ಕುಟುಂಬಿಕರು ಯಾವುದೇ ಹೆಚ್ಚುವರಿ ಮೊತ್ತವನ್ನು ಖರ್ಚು ಮಾಡಲು ಸಿದ್ಧರಿರಲಿಲ್ಲ. ಇದಲ್ಲದೆ ಪೋರ್ಟಬಲ್ ಆಮ್ಲಜನಕವನ್ನು ಸ್ಟ್ರೆಚರ್‌ನಲ್ಲಿ ಆಮ್ಲಜನಕ ಪೂರೈಕೆ ಮತ್ತು ಬೆಂಗಾವಲಿಗೆ ಒಯ್ಯಬೇಕಾಗಿತ್ತು. ಇದರ ಬೆಲೆ ಸುಮಾರು 20 ಸಾವಿರ ರಿಯಾಲ್ ಕೂಡ ಭರಿಸಿದ್ದರು.

  ಆದರೆ ಕೆಸಿಎಫ್ ದೃಡವಾಗಿ ನಿಂತು ರೋಗಿಗೆ ಸಹಾಯ ಮಾಡಲು ನಿರ್ಧರಿಸಿ, ಸೌದಿಯ ಭಾರತೀಯ ರಾಯಭಾರ ಕಚೇರಿಯನ್ನು ನಿರಂತರ ಸಂಪರ್ಕದಿಂದ ಅಕ್ಟೊಬರ್ 10 ರಂದು ಕಾರ್ಯವನ್ನು ಯಶಸ್ವಿಯಾಗಿ ಮುಗಿಸುವಲ್ಲಿ ಯಶಸ್ವಿಯಾಯಿತು. ಹೇಮರಾಜ್ ರವರು ಪ್ರಸ್ತುತ ರಾಜಸ್ಥಾನ ಆಸ್ಪತ್ರೆಯಲ್ಲಿದ್ದು ಚಿಕಿತ್ಸೆಗೆ ಸಕಾರಾತ್ಮಕವಾಗಿ ಸ್ಪಂದಿಸುತ್ತಿದ್ದಾರೆ.

   ಮಾನವೀಯ ಸೇವೆಗಳಲ್ಲಿ ಮುಂಚೂಣಿಯಲ್ಲಿರುವ ಕರ್ನಾಟಕ ಕಲ್ಚರಲ್ ಫೌಂಡೇಶನ್ (ಕೆ.ಸಿ.ಎಫ್) ಯಾವುದೇ ಜಾತಿ ಬೇಧ, ರಾಜ್ಯ, ರಾಷ್ಟ್ರ ನೋಡದೆ ಮಾನವೀಯ ನೆಲೆಯಲ್ಲಿ ಭಾರತೀಯ ಹಾಗು ಇನ್ನಿತರ ವಲಸಿಗರಿಗೆ ಸಹಾಯ ಮಾಡುತ್ತ ಬಂದಿದೆ. ಇದರೊಂದಿಗೆ ದಮ್ಮಾಮ್ ಝೋನ್ ಕಾರ್ಯಕಾರಿ ಮತ್ತು ಕಾಬಿನೆಟ್ ಸದಸ್ಯರಿಗೆ ಹಾಗು ಇನ್ನಿತರ ಸಂಘ ಸಂಸ್ಥೆ ನಾಯಕರಿಗೆ ಕೆ.ಸಿ.ಎಫ್ ಅಭಿನಂದನೆ ಸಲ್ಲಿಸಿದೆ.