ತಾಯ್ನಾಡಿಗೆ ಮರಳಬೇಕಿದ್ದ ಭಾರತದ ಯುವಕ ಅಮೇರಿಕಾದಲ್ಲಿ ಮೃತ್ಯು

•   Tue, Nov 30 2021 10:52:48 AM



• ಹೈದರಾಬಾದ್​, ನ. 30 (DaijiworldNews/HR): ಅಮೇರಿಕಾದ ಸಾಯಿ ಓಹಿಯೋ ರಾಜ್ಯ ವಿಶ್ವವಿದ್ಯಾಲಯದಲ್ಲಿ ಮಾಸ್ಟರ್​ ಡಿಗ್ರಿ ಓದುತ್ತಿದ್ದ ತೆಲಂಗಾಣ ಮೂಲದ ಯುವಕನೊಬ್ಬ ತಾಯ್ನಾಡಿಗೆ ಹಿಂದಿರುಗುವ ಸಂತೋಷದಿಂದ ಮನೆಯವರಿಗೆ ಉಡುಗೊರೆ ತರಲು ಶಾಪಿಂಗ್​ಗೆ ಹೋಗಿದ್ದಾಗ ಸಾವಿಗೀಡಾಗಿರುವ ಘಟನೆ ಅಮೇರಿಕಾದ ಬಕಿ ರಾಜ್ಯದ ಓಹಿಯೋದಲ್ಲಿ ನಡೆದಿದೆ.

  ಮೃತ ಯುವಕನನ್ನು ತೆಲಂಗಾಣದ ಸೂರ್ಯಪೇಟೆಯ ನಿವಾಸಿ ಚಿರು (22) ಎಂದು ಗುರುತಿಸಲಾಗಿದೆ.

  ಯುವಕನು ಓಹಿಯೋ ನಗರದಲ್ಲಿ ವಾಸವಿದ್ದು, ಡಿಸೆಂಬರ್​ 15ರಂದು ತಾಯ್ನಾಡಿಗೆ ಮರಳಲು ಸಿದ್ಧವಾಗಿದ್ದ. ಈ ಹಿನ್ನೆಲೆಯಲ್ಲಿ ಮನೆಯವರಿಗೆ ಉಡುಗೊರೆ ತರಲೆಂದು ಯುವತಿಯೊಬ್ಬಳ ಜತೆ ಶಾಪಿಂಗ್​ಗೆ ಹೋಗಿದ್ದ ಎಂದು ವರದಿಯಾಗಿದೆ.

  ಇನ್ನು ಶಾಪಿಂಗ್​ಗೆ ಹೋಗುತ್ತಿದ್ದಾಗ ಚಿರುವಿನ ಕಾರು ಸ್ಕಿಡ್​ ಆಗಿ ಎದುರಿಗೆ ಬರುತ್ತಿದ್ದ ಟ್ರಕ್​ಗೆ ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ರಭಸಕ್ಕೆ ಚಿರು ಸ್ಥಳದಲ್ಲೇ ಮೃತಪಟ್ಟಿದ್ದು, ಕಾರಿನಲ್ಲಿದ್ದ ಯುವತಿ ಗಂಭೀರವಾಗಿ ಗಾಯಗೊಂಡಿದ್ದು, ಚಿಕಿತ್ಸೆ ಪಡೆಯುತ್ತಿದ್ದಾಳೆ.