ತರಬೇತಿ ವಿಮಾನಗಳು ಡಿಕ್ಕಿ-ಮೂವರು ಪೈಲಟ್ ಗಳು ಸಾವು, ಓರ್ವ ಗಂಭೀರ

•   Fri, Apr 01 2022 01:57:23 PM



• ಸಿಯೋಲ್, ಏ 01 (DaijiworldNews/DB): ತರಬೇತಿ ವಿಮಾನಗಳೆರಡು ವಾಯುಮಾರ್ಗದಲ್ಲಿ ಪರಸ್ಪರ ಡಿಕ್ಕಿ ಹೊಡೆದ ಪರಿಣಾಮ ಮೂವರು ಪೈಲಟ್ ಗಳು ಸಾವನ್ನಪ್ಪಿ, ಓರ್ವ ಪೈಲಟ್ ಗಂಭೀರವಾಗಿ ಗಾಯಗೊಂಡಿರುವ ಘಟನೆ ದಕ್ಷಿಣ ಕೊರಿಯಾದಲ್ಲಿ ಶುಕ್ರವಾರ ನಡೆದಿದೆ.

  ದಕ್ಷಿಣ ಕೊರಿಯಾದ ಸಚೆನ್ ನಲ್ಲಿ ಕೆಟಿ-1 ವಿಮಾನಗಳ ನೆಲೆ ಬಳಿ ವಾಯುಮಾರ್ಗದಲ್ಲೇ ಘಟನೆ ಸಂಭವಿಸಿದೆ. ಘಟನೆಯಲ್ಲಿ ಮೂವರು ಪೈಲಟ್ ಗಳು ಮೃತಪಟ್ಟಿರುವುದು ಪ್ರಾಥಮಿಕ ತನಿಖೆ ವೇಳೆ ಗೊತ್ತಾಗಿದೆ. ಇನ್ನೂ ಎಷ್ಟು ಮಂದಿ ಜೀವಹಾನಿಯಾಗಿದೆ ಎಂಬ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದೆ. ಗಾಯಾಳು ಪೈಲಟ್ ನನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ವಾಯುಪಡೆ ಅಧಿಕಾರಿಗಳು ತಿಳಿಸಿದ್ದಾರೆ.

  ಸ್ಥಳಕ್ಕೆ 30ಕ್ಕೂ ಹೆಚ್ಚು ಅಗ್ನಿಶಾಮಕ ದಳ ಆಗಮಿಸಿದ್ದು, ರಕ್ಷಣಾ ಕಾರ್ಯ ಬಿರುಸಿನಿಂದ ನಡೆಯುತ್ತಿದೆ. ಘಟನೆಗೆ ಕಾರಣವೇನು ಎಂಬ ಕುರಿತು ತನಿಖೆ ನಡೆಸಲಾಗುತ್ತಿದೆ ಎಂದು ವರದಿಗಳು ತಿಳಿಸಿವೆ.