ಲಂಡನ್ ನಲ್ಲಿ'ಐಗಿರಿ ನಂದಿನಿ' ಹಾಡಿಗೆ ಕೂಚಿಪುಡಿ ನೃತ್ಯ ಮಾಡಿದ ರಿಷಿ ಸುನಕ್ ಪುತ್ರಿ

•   Sat, Nov 26 2022 10:17:49 AM



• ಲಂಡನ್ , ನ 26 (DaijiworldNews/MS): ಬ್ರಿಟನ್ ಪ್ರಧಾನಿ ರಿಷಿ ಸುನಕ್ ಅವರ ಪುತ್ರಿ ಅನೌಷ್ಕಾ ಸುನಕ್ ಶುಕ್ರವಾರ ಲಂಡನ್‌ನಲ್ಲಿ ಶುಕ್ರವಾರ ಆಯೋಜನೆ ಮಾಡಿದ್ದ ಕಾರ್ಯಕ್ರಮವೊಂದರಲ್ಲಿ ಇತರ ಮಕ್ಕಳೊಂದಿಗೆ “ಐಗಿರಿ ನಂದಿನಿ” ಹಾಡಿಗೆ ಕೂಚಿಪುಡಿ ನೃತ್ಯ ಮಾಡಿದ್ದಾರೆ.

  ರಂಗ್ - ಇಂಟರ್ನ್ಯಾಷನಲ್ ಕೂಚಿಪುಡಿ ಡ್ಯಾನ್ಸ್ ಫೆಸ್ಟಿವಲ್ 2022 ರ ಕಾರ್ಯಕ್ರಮ ಇದಾಗಿದ್ದು, 9 ವರ್ಷದ ಅನೌಷ್ಕಾ ಮುದ್ದಾಗಿ ಹೆಜ್ಜೆ ಹಾಕಿದ್ದಾರೆ.

  ಸಂಗೀತಗಾರರು, ಹಿರಿಯ ಸಮಕಾಲೀನ ನೃತ್ಯ ಕಲಾವಿದರು (65+ ವರ್ಷಗಳ ಪ್ರದರ್ಶನದ ಗುಂಪು), ಕಲಿಕೆಯಲ್ಲಿ ಅಸಮರ್ಥತೆ ಹೊಂದಿರುವ ಗಾಲಿಕುರ್ಚಿ ನೃತ್ಯಗಾರ್ತಿ, ಪೋಲೆಂಡ್‌ ನ ನಟರಂಗ್ ಗ್ರೂಪ್‌ ನ ಅಂತಾರಾಷ್ಟ್ರೀಯ ಬರ್ಸರಿ ವಿದ್ಯಾರ್ಥಿಗಳು ಸೇರಿದಂತೆ 4-85 ವರ್ಷ ವಯಸ್ಸಿನ ಸುಮಾರು 100 ಕಲಾವಿದರು ಕಾರ್ಯಕ್ರಮದ ಭಾಗವಾಗಿದ್ದರು.

  ತಮ್ಮ ಮಗಳ ನೃತ್ಯವನ್ನು ಸವಿಯಲು ಅನೌಷ್ಕಾ ಅವರ ತಾಯಿಯಾದ ಇನ್ಫೋಸಿಸ್ ಸಹ-ಸಂಸ್ಥಾಪಕ ನಾರಾಯಣ ಮೂರ್ತಿ ಅವರ ಪುತ್ರಿ ಅಕ್ಷತಾ ಮೂರ್ತಿ, ರಿಷಿ ಸುನಕ್ ಅವರ ಪೋಷಕರು ಆಗಮಿಸಿದ್ದರು

  ಇಂಗ್ಲೆಂಡ್ ನ 57ನೇ ಪ್ರಧಾನ ಮಂತ್ರಿಯಾಗಿರುವ ರಿಷಿ ಸುನಾಕ್ ಅವರು ಭಾರತೀಯ ಮೂಲದವರು. ಅವರು ಇನ್ಫೋಸಿಸ್ ಸಂಸ್ಥಾಪಕ ನಾರಾಯಣ ಮೂರ್ತಿ ಅವರ ಪುತ್ರಿ ಅಕ್ಷತಾ ಅವರನ್ನು ವರಿಸಿದ್ದಾರೆ. ಈ ದಂಪತಿಗೆ ಕೃಷ್ಣ ಮತ್ತು ಅನೌಷ್ಕಾ ಎಂಬಿಬ್ಬರು ಮಕ್ಕಳಿದ್ದಾರೆ.

  ಅನೌಷ್ಕಾ ನೃತ್ಯ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಈಕೆಯ ನೃತ್ಯ ಕಂಡ ಭಾರತೀಯರು ಸಂತಸ ವ್ಯಕ್ತಪಡಿಸಿದ್ದಾರೆ.