ನುಂಗಿ ಉಗುಳಿದ ನೀರ್ಗುದುರೆ-ಸಾವಿನ ದವಡೆಯಿಂದ ಪಾರಾದ ಬಾಲಕ!

•   Sat, Dec 17 2022 09:26:44 AM



• ಕಂಪಲಾ, ಡಿ 17 (DaijiworldNews/DB): ಎರಡು ವರ್ಷದ ಬಾಲಕನನ್ನು ನೀರ್ಗುದುರೆಯೊಂದು ನುಂಗಿ ಬಳಿಕ ಉಗುಳಿದ ಘಟನೆ ಉಗಾಂಡದಲ್ಲಿ ನಡೆದಿದೆ. ಬಾಲಕ ಪವಾಡಸದೃಶ ಪಾರಾಗಿದ್ದಾನೆ.

  ಕಾಟ್ವೆ ಸರೋವರದಲ್ಲಿ ಘಟನೆ ನಡೆದಿದೆ. ಈ ಸರೋವರದ ಪಕ್ಕದಲ್ಲೇ ಬಾಲಕನ ಮನೆಯಿದ್ದು, ಆತ ಸರೋವರದ ಬಳಿ ಆಡವಾಡಲೆಂದು ಬಂದಿದ್ದ.

  ಈ ವೇಳೆ ಹಸಿವಿನಿಂದ ಬಳಲಿದ್ದ ನೀರ್ಗುದುರೆ ಸನಿಹಕ್ಕೆ ಬಂದ ಬಾಲಕನನ್ನು ಒಮ್ಮೆಲೆ ನುಂಗಿ ಬಿಟ್ಟಿದೆ. ಬಾಲಕನನ್ನು ನೀರ್ಗುದುರೆ ನುಂಗಿರುವುದನ್ನು ಸನಿಹದಲ್ಲೇ ಇದ್ದ ಯುವಕನೊಬ್ಬ ನೋಡಿದ್ದು, ಆತ ಸಮಯಪ್ರಜ್ಞೆ ಮೆರೆದು ನೀರ್ಗುದುರೆಗೆ ಮೇಲಿಂದ ಮೇಲೆ ಕಲ್ಲೆಸೆದಿದ್ದಾನೆ. ಕಲ್ಲೆಸೆತದಿಂದ ನೋವು ತಾಳಲಾರದೆ ನೀರ್ಗುದುರೆಯು ನುಂಗಿದ್ದ ಬಾಲಕನನ್ನು ಹೊರಗೆ ಉಗುಳಿದೆ. ಹೊರಗೆ ಬಂದ ಬಾಲಕ ಪವಾಡಸದೃಶ ಪಾರಾಗಿದ್ದಾನೆ.

  ಬಾಲಕನ ಕೈ ಹಾಗೂ ದೇಹದ ವಿವಿಧೆಡೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಆತನನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದೆ. ಸದ್ಯ ಆತ ಚೇತರಿಸಿಕೊಳ್ಳುತ್ತಿದ್ದು, ಮನೆಗೆ ಮರಳಿದ್ದಾನೆ.