ಮಾಜಿ ಸಂಸದೆಯ ಹೆಸರಿನಲ್ಲಿ ಮಂಡ್ಯ ಅಭಿಮಾನಿಯ 'ರಮ್ಯಾ ಕ್ಯಾಂಟೀನ್ '

•   Sun, Dec 03 2017 01:10:50 PM



• 
  ಮಂಡ್ಯ ಡಿ 3: ಇಂದಿರಾ ಕ್ಯಾಂಟೀನ್, ಅಮ್ಮ ಕ್ಯಾಂಟೀನ್, ಅಪ್ಪಾಜಿ ಕ್ಯಾಂಟೀನ್ ಹೀಗೆ ಇತ್ತೀಚೆಗೆ ಯಾಕೋ ಕ್ಯಾಂಟೀನ್ ಗಳೇ ಸದ್ದು ಮಾಡಲಾರಂಭಿಸಿದೆ.ಇದಕ್ಕೆ ಈಗ ಹೊಸ ಸೇರ್ಪಡೆ ರಮ್ಯಾ ಕ್ಯಾಂಟೀನ್.ಯಾವ ರಮ್ಯಾ ಅಂತ ಗೊತ್ತಾಗಿಲ್ಲ ಅಂದರೆ ಮಾಜಿ ಸಂಸದೆ, ಚಿತ್ರನಟಿ, ರಮ್ಯಾ ಅಲಿಯಾಸ್ ದಿವ್ಯಸ್ಪಂದನ ಅವರ ಹೆಸರಲ್ಲೊಂದು ಕ್ಯಾಂಟೀನ್ ಶುರುವಾಗಿದೆ. ಇವರ ಕಟ್ಟಾ ಅಭಿಮಾನಿಯಾದ ರಘು ಮಂಡ್ಯದಲ್ಲಿ ಇವರ ಹೆಸರಲ್ಲೊಂದು ಕ್ಯಾಂಟೀನ್ ಪ್ರಾರಂಭಿಸಿದ್ದಾರೆ. ಮಂಡ್ಯದ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಆತ್ಮಾನಂದ ಅವರು ಈ ನೂತನ ಕ್ಯಾಂಟೀನ್ ಗೆ ಡಿ.3 ರ ಭಾನುವಾರ ಚಾಲನೆ ನೀಡಿದ್ದಾರೆ. ಇವರ ಕಳೆದ ಹಲವು ವರ್ಷಗಳಿಂದ ಹೋಟೆಲ್ ಉದ್ಯಮದಲ್ಲಿ ತೊಡಗಿಸಿಕೊಂಡಿದ್ದರು. ಇದೀಗ ಅವರು ಚಿತ್ರನಟಿ ರಮ್ಯಾ ಹೆಸರಿನಲ್ಲಿ ಜನಸೇವೆ ಮಾಡಲು ನಿರ್ಧರಿಸಿ ಅವರ ಹೆಸರಿನಲ್ಲಿ ರಿಯಾಯಿತಿ ದರದಲ್ಲಿ ಊಟ, ಉಪಹಾರಗಳನ್ನು ಒದಗಿಸುವ ಕ್ಯಾಂಟೀನ್ ಪ್ರಾರಂಭಿಸಿದ್ದಾರೆ.

  ಮಂಡ್ಯದ ಅಶೋಕ ನಗರದಲ್ಲಿರುವ ತ್ರಿವೇಣಿ ರಸ್ತೆಯಲ್ಲಿ ಈ ನೂತನ ಕ್ಯಾಂಟೀನ್ ಪ್ರಾರಂಭಿಸಿದ್ದು 10 ರೂ.ಗೆ ಇಡ್ಲಿ, ವಡೆ, ದೋಸೆ, ರವೆ ಇಡ್ಲಿ, ಸೇರಿದಂತೆ ತರಹೇವಾರಿ ತಿಂಡಿ, ಊಟ ದೊರೆಯುತ್ತಿದೆ. ಅಲ್ಲದೆ ಪಾರ್ಸಲ್ ಸೌಲಭ್ಯವೂ ಇದೆ.
  ಇದರೊಡನೆ ರಾಜ್ಯದಲ್ಲಿ ಇದಾಗಲೇ ಪ್ರಾರಂಭ ಕ್ಯಾಂಟೀನ್ ಗಳ ಲಿಸ್ಟ್ ಗೆ ಇದೀಗ ರಮ್ಯಾ ಕ್ಯಾಂಟೀನ್ ಸೇರಿಕೊಂಡಿದೆ. ರಾಜ್ಯ ವಿಧಾನ ಸಭೆ ಚುನಾವಣೆ ಇನ್ನೇನು ಸನಿಹದಲ್ಲೇ ಬರುತ್ತಿರುವುದರಿಂದ ರಾಜ್ಯ ಕಾಂಗ್ರೆಸ್ ಗೆ ಇದರಿಂದ ಯಾವ ಬಗೆಯಲ್ಲಿ ಲಾಭ ಆಗತ್ತೆ ಅನ್ನೋದನ್ನ ಚುನಾವಣೆಯವರೆಗೆ ಕಾದು ನೋಡಬೇಕಷ್ಟೇ.