ಉಡುಪಿ: 57 ನೇ ವಯಸ್ಸಿನಲ್ಲಿ ಮಹಿಳೆಯ ಸಾಧನೆ- ಸಿಯಾಚಿನ್‌ನಲ್ಲಿ ತ್ರಿವರ್ಣ ಧ್ವಜ ಹಾರಿಸಲು 1,300 ಕಿ.ಮೀ ದೂರ ಬೈಕ್‌ ಸವಾರಿ ಮಾಡಿ ಸಾಹಸ !

•   Mon, Aug 18 2025 11:38:39 AM



• ಉಡುಪಿ, ಆ.17 (Daijiworld News/AK): ಸಾಹಸಕ್ಕೆ ವಯಸ್ಸು ಅಡ್ಡಿಯಾಗಲ್ಲ ಎಂದು ಕುಂದಾಪುರದ 57 ವರ್ಷದ ವಿಲ್ಮಾ ಕ್ರಾಸ್ತಾ ಕಾರ್ವಾಲ್ಹೋ ಮತ್ತೊಮ್ಮೆ ಅದನ್ನು ಸಾಬೀತುಪಡಿಸಿದ್ದಾರೆ.

  2023 ರಲ್ಲಿ ವಿಶ್ವದ ಅತಿ ಎತ್ತರದ ಪ್ರದೇಶವಾದ ಪಾಸ್ ಉಮ್ಲಿಂಗ್ ಗೆ ತನ್ನ ಮಗಳು ಚೆರಿಶ್ ಕರ್ವಾಲೋ ಜೊತೆ ಧೈರ್ಯಶಾಲಿಯಾಗಿ ಬೈಕ್‌ ಸವಾರಿ ಮೂಲಕ ಗಮನ ಸೆಳೆದ ನಂತರ, ವಿಲ್ಮಾ ಈಗ ಮತ್ತೊಂದು ಗಮನಾರ್ಹ ಸಾಧನೆ ಮಾಡಿದ್ದಾರೆ.

   ಆಗಸ್ಟ್‌ 15 ಸ್ವಾತಂತ್ರ್ಯ ದಿನದಂದು, ವಿಶ್ವದ ಅತ್ಯಂತ ಸವಾಲಿನ ಭೂಪ್ರದೇಶಗಳಲ್ಲಿ ಒಂದಾದ ಸಿಯಾಚಿನ್ ಹಿಮನದಿಯಲ್ಲಿ ಚೀನಾ ಗಡಿಯ ಬಳಿ ರಾಷ್ಟ್ರಧ್ವಜವನ್ನು ಹಾರಿಸಲು ಎಂಟು ದಿನಗಳಲ್ಲಿ 1,300 ಕಿಲೋಮೀಟರ್ ಸವಾರಿ ಮಾಡಿ ಸಾಧನೆ ಮಾಡಿದ್ದಾರೆ. ವೃತ್ತಿಯಲ್ಲಿ ಕಾರ್ಪೊರೇಟ್ ತರಬೇತುದಾರರಾಗಿರುವ ವಿಲ್ಮಾ, ಬಹಳ ಹಿಂದಿನಿಂದಲೂ ಬೈಕ್‌ ಸವಾರಿಯ ಬಗ್ಗೆ ಉತ್ಸಾಹ ಹೊಂದಿದ್ದಾರೆ. ಆಗಾಗ್ಗೆ ತಮ್ಮ ಮಗಳು ಚೆರಿಶ್ ಜೊತೆಗೆ ಪ್ರಯಾಣಿಸಿದ್ದಾರೆ.

  ವಿಲ್ಮಾ ಪ್ರಯಾಣದ ಬಗ್ಗೆ ಮಾತನಾಡುತ್ತಾ, ಸಿಯಾಚಿನ್ ಯಾತ್ರೆ ಇದುವರೆಗಿನ ಪ್ರಯಾಣದಲ್ಲಿ ತನ್ನ ಕಠಿಣವಾದ ಸವಾರಿ ಎಂದು ಅವರು ಹೇಳಿದರು. ಧ್ವಜ ಹಾರಿಸಲು ನನ್ನ ಕನಸು ಆಗಿತ್ತು . ನಾನು ಯೋಜಿಸಿದಂತೆ ಬೆಳಿಗ್ಗೆ ತಲುಪಲು ಸಾಧ್ಯವಾಗದಿದ್ದರೂ, ನಾನು ಅಂತಿಮವಾಗಿ ಮಧ್ಯಾಹ್ನದ ಹೊತ್ತಿಗೆ ಸ್ಥಳವನ್ನು ತಲುಪಿದೆ ಮತ್ತು ಸವಾರಿಯನ್ನು ಪೂರ್ಣಗೊಳಿಸಿದ ಕುರಿತು ಸಂತೋಷವನ್ನು ವ್ಯಕ್ತಪಡಿಸಿದರು.

  ಈ ಯಾತ್ರೆ ಆರು ಸದಸ್ಯರ ತಂಡದ ಭಾಗವಾಗಿ ವಿಲ್ಮಾ ಇದ್ದರು. ಅವರ ಮಾರ್ಗವು ಲೇಹ್‌ನಿಂದ ರಮಣೀಯವಾದ ಝನ್ಸ್ಕರ್ ಕಣಿವೆಯ ಮೂಲಕ ಹಾದು ಹೋಗಿ ಕಾರ್ಗಿಲ್ ಬಳಿಯ ಗುರ್ಖಾನ್ ಕಣಿವೆಯ ಕಡೆಗೆ ಸಾಗಿ ಅಂತಿಮವಾಗಿ ಸಿಯಾಚಿನ್ ತಲುಪಿದರು. ಒಂದು ಹಂತದಲ್ಲಿ, ಕೇವಲ 60 ಕಿಮೀ ಉಳಿದಿರುವಾಗ, ಅವರು ನಿಲ್ಲಿಸುವ ಬಗ್ಗೆ ಯೋಜನೆ ಹಾಕಿಕೊಂಡರಂತೆ , ಆದರೆ ಸಂಪೂರ್ಣ ದೃಢ ನಿಶ್ಚಯದೊಂದಿಗೆ ಅವರು ಸವಾರಿಯನ್ನು ಮುಂದುವರಿಸಿದರು.

  ಇದು ಲಡಾಖ್‌ಗೆ ವಿಲ್ಮಾ ಅವರ ಮೂರನೇ ಬೈಕಿಂಗ್ ಯಾತ್ರೆಯಾಗಿತ್ತು. 2023 ರ ಆರಂಭದಲ್ಲಿ, ಅವರು ಮತ್ತು ಅವರ ಮಗಳು ಭಾರತ-ಚೀನಾ ಗಡಿಯಲ್ಲಿರುವ ಲಡಾಖ್‌ನಲ್ಲಿ ಸಮುದ್ರ ಮಟ್ಟದಿಂದ 19,024 ಅಡಿ ಎತ್ತರದಲ್ಲಿರುವ ಉಮ್ಲಿಂಗ್ ಲಾವನ್ನು ಯಶಸ್ವಿಯಾಗಿ. 55 ನೇ ವಯಸ್ಸಿನಲ್ಲಿ, ಅವರು ವಿಶ್ವದ ಅತಿ ಎತ್ತರದ ಮೋಟಾರು ಪಾಸ್ ಅನ್ನು ತಲುಪಿದ್ದರು, ಇದು ಕೆಲವೇ ಸವಾರರು ಪ್ರಯತ್ನಿಸಲು ಧೈರ್ಯ ಮಾಡುವ ಸಾಧನೆಯಾಗಿದೆ.

  ಯೋಗ, ಪ್ರಾಣಾಯಾಮ ಮತ್ತು ಧ್ಯಾನದಲ್ಲಿ ಬಲವಾದ ನಂಬಿಕೆಯುಳ್ಳ ವಿಲ್ಮಾ, ತನ್ನ ಸಹಿಷ್ಣುತೆ ಮತ್ತು ಸಾಹಸ ಮನೋಭಾವ ಶಿಸ್ತುಬದ್ಧ ಜೀವನಶೈಲಿಗೆ ಕಾರಣವೆಂದು ಹೇಳುತ್ತಾರೆ. ಅವರ ಸವಾರಿಯ ಉತ್ಸಾಹವು ಅನೇಕರಿಗೆ ಸ್ಫೂರ್ತಿ ನೀಡುತ್ತಲೇ ಇದೆ, ಕನಸುಗಳನ್ನು ಬೆನ್ನಟ್ಟುವಲ್ಲಿ ವಯಸ್ಸು ಎಂದಿಗೂ ಮಿತಿಯಲ್ಲ ಎಂಬುದನ್ನು ಸಾಬೀತುಪಡಿಸಿದ್ದಾರೆ.