ಮಂಗಳೂರು : ಏರ್ಪೋರ್ಟ್ ಮುಖ್ಯರಸ್ತೆಯ ದುಸ್ಥಿತಿ - ವಿದ್ಯಾರ್ಥಿಗಳು, ಪ್ರಯಾಣಿಕರಿಗೆ ಸಂಕಷ್ಟ

•   Wed, Sep 03 2025 04:39:45 PM



• ಮಂಗಳೂರು, ಸೆ. 03 (DaijiworldNews/TA): ಏರ್ಪೋರ್ಟ್ ರಸ್ತೆ ಸಂಪರ್ಕಿಸುವ ಪದವಿನಂಗಡಿ – ಬೋಂದೆಲ್ ಸಂತ ಲೋರೆನ್ಸ್ ಚರ್ಚ್‌ ಬಳಿ ಇರುವ ಮುಖ್ಯರಸ್ತೆ ಅತೀವ ದುಸ್ಥಿತಿಗೆ ತಲುಪಿದ್ದು, ದೈನಂದಿನ ಸಂಚಾರಕ್ಕೆ ಬಂದೋಬಸ್ತ್ ಮಾಡುತ್ತಿರುವ ಜನಸಾಮಾನ್ಯರಿಗೆ ಗಂಭೀರ ತೊಂದರೆ ಉಂಟುಮಾಡುತ್ತಿದೆ. ಈ ರಸ್ತೆಯ ಬದಿಗಳಲ್ಲಿ ಅನೇಕ ಆಳವಾದ ಗುಂಡಿಗಳು ಉಂಟಾಗಿದ್ದು, ಮಳೆಗಾಲದಲ್ಲಿ ಅವುಗಳಲ್ಲಿ ನೀರು ತುಂಬಿ ಗುಂಡಿಗಳು ಕಾಣದಂಥ ಪರಿಸ್ಥಿತಿ ಎದುರಾಗುತ್ತಿದೆ. ಇದರಿಂದ ಬಸ್ ನಿಂದ ಇಳಿಯುವ ಪ್ರಯಾಣಿಕರು ನೇರವಾಗಿ ಹೊಂಡದೊಳಗೆ ಕಾಲಿಡುವ ಘಟನೆ ಸಾಮಾನ್ಯವಾಗಿದ್ದು, ಹಲವರು ಕೈ–ಕಾಲುಗಳಿಗೆ ಗಾಯ ಮಾಡಿಕೊಂಡಿರುವ ಉದಾಹರಣೆಗಳಿವೆ.

  

  

  

  

  

  

  ಈ ರಸ್ತೆಯ ಸುತ್ತಮುತ್ತಲಿನ ಪ್ರದೇಶದಲ್ಲಿ ಅನೇಕ ಶಾಲೆಗಳು ಕಾರ್ಯನಿರ್ವಹಿಸುತ್ತಿರುವುದರಿಂದ, ನೂರಾರು ವಿದ್ಯಾರ್ಥಿಗಳು ಪ್ರತಿದಿನ ಈ ರಸ್ತೆಯ ಮೂಲಕವೇ ಸಂಚಾರ ಮಾಡಬೇಕಾಗುತ್ತದೆ. ಗುಂಡಿ–ಗುಂಡಿ ರಸ್ತೆಯಲ್ಲಿ ನಡೆಯುವಾಗ ಮಕ್ಕಳು ಜಾರಿ ಬೀಳುವ ಅಪಾಯ ಹೆಚ್ಚಾಗಿದ್ದು, ಪೋಷಕರಲ್ಲಿ ಆತಂಕ ಹೆಚ್ಚಿಸಿದೆ.ಸ್ಥಳೀಯ ನಿವಾಸಿಗಳು, ಪ್ರಯಾಣಿಕರು ಹಾಗೂ ಶಾಲಾ ನಿರ್ವಾಹಕರು ಹಲವು ಬಾರಿ ಸಂಬಂಧಪಟ್ಟ ಅಧಿಕಾರಿಗಳಿಗೆ ರಸ್ತೆ ತುರ್ತು ದುರಸ್ತಿ ಮಾಡುವಂತೆ ಮನವಿ ಸಲ್ಲಿಸಿದರೂ, ಇದುವರೆಗೆ ಯಾವುದೇ ಸ್ಪಂದನೆ ದೊರೆತಿಲ್ಲ. ಜನಪ್ರತಿನಿಧಿಗಳಿಗೂ ವಿಷಯ ತಿಳಿಸಲಾಯಿತಾದರೂ ಸಾಕ್ಷಾತ್ ಕ್ರಮ ಕೈಗೊಳ್ಳದೇ ರಸ್ತೆ ಇನ್ನಷ್ಟು ಹದಗೆಡುತ್ತಿದೆ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

  ರಸ್ತೆಯಲ್ಲಿ ಅತಿದೊಡ್ಡ ಗುಂಡಿಗಳು ಇರುವುದರಿಂದ, ವಾಹನ ಸಂಚಾರವೂ ಅತೀ ಅಪಾಯಕಾರಿ ಸ್ಥಿತಿಗೆ ತಲುಪಿದೆ. ವಿಶೇಷವಾಗಿ ರಾತ್ರಿ ವೇಳೆಯಲ್ಲಿ ಅಥವಾ ಮಳೆಗಾಲದಲ್ಲಿ ಈ ಗುಂಡಿಗಳು ಸ್ಪಷ್ಟವಾಗಿ ಕಾಣದೆ ಅಪಘಾತ ಸಂಭವಿಸುವ ಸಾಧ್ಯತೆ ಬಹಳ ಹೆಚ್ಚಿನದು ಎಂದು ವಾಹನ ಸವಾರರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.
  ಸ್ಥಳೀಯರು ತಕ್ಷಣವೇ ರಸ್ತೆ ದುರಸ್ತಿ ಕಾರ್ಯ ಕೈಗೆತ್ತಿಕೊಳ್ಳುವಂತೆ ಸಂಬಂಧಪಟ್ಟ ಇಲಾಖೆಯ ಅಧಿಕಾರಿಗಳಿಗೆ ಒತ್ತಾಯ ವ್ಯಕ್ತಪಡಿಸಿದ್ದು, ಸಮಸ್ಯೆ ಪರಿಹಾರವಾಗದಿದ್ದರೆ ಮುಂದಿನ ದಿನಗಳಲ್ಲಿ ಸಾರ್ವಜನಿಕ ಆಂದೋಲನ ನಡೆಸುವುದಾಗಿ ಎಚ್ಚರಿಸಿದ್ದಾರೆ.

  - ಶೈಲಜಾ .ಎನ್‌