ಮಂಗಳೂರು: 'ಹಿಸ್ನಾ ಮಿಸ್ ದಾಯ್ಜಿವರ್ಲ್ಡ್' ಸ್ಪರ್ಧೆಗೆ ಉತ್ತಮ ಪ್ರತಿಕ್ರಿಯೆ; ಅರ್ಜಿ ಸಲ್ಲಿಕೆ ಕೊನೆಯ ದಿನಾಂಕ ಡಿ.4ರ ವರೆಗೆ ವಿಸ್ತರಣೆ

•   Tue, Nov 25 2025 05:59:47 PM



• ಮಂಗಳೂರು, ನ. 25 (DaijiworldNews/AA): ದಾಯ್ಜಿವರ್ಲ್ಡ್.ಕಾಂ 25ನೇ ವರ್ಷಕ್ಕೆ ಕಾಲಿಡುತ್ತಿರುವ ಈ ಸಂದರ್ಭದಲ್ಲಿ, ಮಾಧ್ಯಮ ಸಂಸ್ಥೆಯು ಬಹುನಿರೀಕ್ಷಿತ ಹಿಸ್ನಾ ಮಿಸ್ ದಾಯ್ಜಿವರ್ಲ್ಡ್ 2026 ಸೀಸನ್ 4 ಅನ್ನು ಅನಾವರಣಗೊಳಿಸಿದ್ದು, ಸಾರ್ವಜನಿಕರ ಉತ್ತಮ ಪ್ರತಿಕ್ರಿಯೆ ಹಿನ್ನಲೆ ಅರ್ಜಿ ಸಲ್ಲಿಕೆಯ ಕೊನೆಯ ದಿನಾಂಕವನ್ನು ಡಿಸೆಂಬರ್ 4ರವರೆಗೆ ವಿಸ್ತರಿಸಲಾಗಿದೆ.

  ಸಾರ್ವಜನಿಕರಿಂದ ಬಂದ ಅಭೂತಪೂರ್ವ ಬೇಡಿಕೆಗೆ ಹಿನ್ನೆಲೆ, ಅರ್ಜಿಗಳನ್ನು ಸಲ್ಲಿಸಲು ಕೊನೆಯ ದಿನಾಂಕವನ್ನು ಡಿಸೆಂಬರ್ 4ರವೆಗೆ ವಿಸ್ತರಿಸಲಾಗಿದೆ. ಉತ್ತಮ ಗುಣಮಟ್ಟದ ಛಾಯಾಚಿತ್ರಗಳು ಮತ್ತು ಪರಿಚಯ ವೀಡಿಯೊಗಳನ್ನು ಸಿದ್ಧಪಡಿಸಲು ಹೆಚ್ಚಿನ ಸಮಯದ ಅಗತ್ಯವಿದೆ ಎಂದು ಅನೇಕ ಸ್ಪರ್ಧಿಗಳು ಕೋರಿದ್ದರಿಂದ ಕೊನೆಯ ದಿನಾಂಕ ವಿಸ್ತರಣೆ ಮಾಡಲಾಗಿದೆ.

  ಈ ಸ್ಪರ್ಧೆಯಲ್ಲಿ ಭಾಗವಹಿಸಲು ಕರ್ನಾಟಕದ ಕರಾವಳಿ ಭಾಗಕ್ಕೆ ಸೇರಿದ ಮತ್ತು ವಿಶ್ವದ ಯಾವುದೇ ಮೂಲೆಯಲ್ಲಿ ನೆಲೆಸಿರುವ 16 ರಿಂದ 32 ವರ್ಷ ವಯಸ್ಸಿನ ಮಹಿಳೆಯರಿಗೆ ಮುಕ್ತ ಅವಕಾಶವಿದೆ. ಇದು ಸೌಂದರ್ಯ, ಆತ್ಮವಿಶ್ವಾಸ ಮತ್ತು ಪ್ರತಿಭೆಯನ್ನು ಪ್ರದರ್ಶಿಸಲು ಗೌರವಯುತ ವೇದಿಕೆಯಾಗಿದೆ. ದಾಯ್ಜಿವರ್ಲ್ಡ್ ನ 5ನೇ (2005), 10ನೇ (2010), ಮತ್ತು 15ನೇ (2015) ವಾರ್ಷಿಕೋತ್ಸವಗಳ ಸಮಯದಲ್ಲಿ ಹಿಂದಿನ ಸೀಸನ್‌ಗಳನ್ನು ನಡೆಸಲಾಗಿತ್ತು.

  ಈ ಸೀಸನ್‌ನಲ್ಲಿ, ಸೀಸನ್ 2 ಮತ್ತು 3 ರ ಪ್ರಾಯೋಜಕರಾದ ಅಬುಧಾಬಿಯ ಹಿಸ್ನಾ ಇಂಟರ್ನ್ಯಾಷನಲ್ ಎಲ್‌ಎಲ್‌ಸಿ ಮತ್ತೊಮ್ಮೆ ಪ್ರಾಯೋಜಕತ್ವ ವಹಿಸಿದೆ. ಈ ಬ್ರ‍್ಯಾಂಡ್‌ನ ನಿರಂತರ ಸಹಭಾಗಿತ್ವವು ಯುವತಿಯರನ್ನು ಸಬಲೀಕರಣಗೊಳಿಸುವ ತನ್ನ ಪರಂಪರೆಯನ್ನು ಮುಂದುವರೆಸಿದೆ.

  ಆಕರ್ಷಕ ಬಹುಮಾನಗಳು ಮತ್ತು ಗೌರವ
  ಮಿಸ್ ದಾಯ್ಜಿವರ್ಲ್ಡ್ 2026 ವಿಜೇತರಿಗೆ ಪ್ರತಿಷ್ಠಿತ ಶೀರ್ಷಿಕೆ ಮತ್ತು ರೂ. 3 ಲಕ್ಷ ನಗದು ಬಹುಮಾನ ನೀಡಲಾಗುವುದು. ಜೊತೆಗೆ ಆ ವರ್ಷಕ್ಕೆ ದಾಯ್ಜಿವರ್ಲ್ಡ್ ಗ್ರೂಪ್‌ನ ಬ್ರ‍್ಯಾಂಡ್ ಅಂಬಾಸಿಡರ್ ಆಗಿ ಸೇವೆ ಸಲ್ಲಿಸುವ ಗೌರವ ದೊರೆಯಲಿದೆ. ಮೊದಲ ಮತ್ತು ಎರಡನೇ ರನ್ನರ್-ಅಪ್‌ಗಳು ಕ್ರಮವಾಗಿ ರೂ. 2 ಲಕ್ಷ ಮತ್ತು ರೂ. 1 ಲಕ್ಷ ನಗದು ಬಹುಮಾನ ಪಡೆಯಲಿದ್ದಾರೆ. ಉಳಿದ ಅಂತಿಮ ಸ್ಪರ್ಧಿಗಳು ಆಕರ್ಷಕ ಉಡುಗೊರೆಗಳು, ವೋಚರ್‌ಗಳು ಮತ್ತು ವಿಶೇಷ ಮನ್ನಣೆಗಳನ್ನು ಪಡೆಯಲಿದ್ದಾರೆ.

  ಆಯ್ಕೆ ಪ್ರಕ್ರಿಯೆ ಮತ್ತು ಗ್ರ‍್ಯಾಂಡ್ ಫಿನಾಲೆ
  ಅರ್ಜಿದಾರರ ಪೂಲ್‌ನಿಂದ, ಡಿಸೆಂಬರ್ 14 ರಂದು ಮಂಗಳೂರಿನಲ್ಲಿ ನಡೆಯಲಿರುವ ಪ್ರಾಥಮಿಕ ಆಯ್ಕೆ ಸುತ್ತಿಗೆ 25 ಸ್ಪರ್ಧಿಗಳನ್ನು ಶಾರ್ಟ್ಲಿಸ್ಟ್ ಮಾಡಲಾಗುತ್ತದೆ. ಅದೇ ದಿನ, ಎಂಟು ಫೈನಲಿಸ್ಟ್‌ಗಳು ಗ್ರ‍್ಯಾಂಡ್ ಫಿನಾಲೆಗೆ ಆಯ್ಕೆಯಾಗಲಿದ್ದಾರೆ. ಗ್ರ‍್ಯಾಂಡ್ ಫಿನಾಲೆಯು 2026ರ ಫೆಬ್ರವರಿ 14 ರಂದು ಮಂಗಳೂರಿನಲ್ಲಿ ನಡೆಯಲಿದೆ. ಈ ಫಿನಾಲೆಯು ದಾಯ್ಜಿವರ್ಲ್ಡ್‌ನ 25ನೇ ವಾರ್ಷಿಕೋತ್ಸವದ ಆಚರಣೆಯ ಭಾಗವಾಗಿದ್ದು, ಪ್ರಪಂಚದಾದ್ಯಂತದ ಗಣ್ಯರು, ಸೆಲೆಬ್ರಿಟಿಗಳು, ಮಾಧ್ಯಮ ವೃತ್ತಿಪರರು ಮತ್ತು ಅತಿಥಿಗಳನ್ನು ಆಕರ್ಷಿಸುವ ನಿರೀಕ್ಷೆಯಿದೆ.

  ಮಿಸ್ ದಾಯ್ಜಿವರ್ಲ್ಡ್ ಸ್ಪರ್ಧೆಯು ವರ್ಷಗಳಲ್ಲಿ ಶ್ರೀಮಂತ ಪರಂಪರೆಯನ್ನು ನಿರ್ಮಿಸಿದೆ. 2005 ರ ಉದ್ಘಾಟನಾ ಸೀಸನ್‌ನಲ್ಲಿ 400 ಸ್ಪರ್ಧಿಗಳಿಂದ ಮೆಲಿಟಾ ಪಿಂಟೋ ವಿಜೇತರಾದರು. 2010 ರಲ್ಲಿ ಮಂಗಳೂರಿನ ಅಂಜಲಿ ಶೆಟ್ಟಿ 1,200 ಭಾಗವಹಿಸುವವರಲ್ಲಿ ವಿಜೇತರಾಗಿ ಹೊರಹೊಮ್ಮಿದರು. ಮತ್ತು ಜೆಸ್ಸಿಕಾ ಫರ್ನಾಂಡಿಸ್ 2015 ರಲ್ಲಿ ಪ್ರಶಸ್ತಿಯನ್ನು ಗೆದ್ದುಕೊಂಡರು. ಇದು ಕರಾವಳಿಯ ಯುವತಿಯರಿಗೆ ಗೌರವಾನ್ವಿತ ವೇದಿಕೆಯಾಗಿದ್ದು, ಸ್ಪರ್ಧೆಯ ಖ್ಯಾತಿಯನ್ನು ಹೆಚ್ಚಿಸಿದೆ.

  ಹಿಸ್ನಾ ಇಂಟರ್ನ್ಯಾಷನಲ್ ಎಲ್‌ಎಲ್‌ಸಿ ಬಗ್ಗೆ
  ಸಂಯುಕ್ತ ಅರಬ್ ಸಂಸ್ಥಾನದಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿರುವ ಹಿಸ್ನಾ ಇಂಟರ್ನ್ಯಾಷನಲ್ ಎಲ್‌ಎಲ್‌ಸಿ ಒಳಾಂಗಣ ವಿನ್ಯಾಸ ಮತ್ತು ಫಿಟ್-ಔಟ್ ಗುತ್ತಿಗೆ ಕ್ಷೇತ್ರದಲ್ಲಿ ಮೂರು ದಶಕಗಳಿಗಿಂತ ಹೆಚ್ಚು ಶ್ರೇಷ್ಠತೆ ಹೊಂದಿರುವ ಪ್ರಮುಖ ಕಂಪನಿಯಾಗಿದೆ. ವ್ಯವಸ್ಥಾಪಕ ನಿರ್ದೇಶಕ ರೊನಾಲ್ಡ್ ಪಿಂಟೋ ಅವರ ನೇತೃತ್ವದಲ್ಲಿ, ಈ ಸಂಸ್ಥೆಯು ತನ್ನ ಕರಕುಶಲತೆ, ನಾವೀನ್ಯತೆ ಮತ್ತು ವಿನ್ಯಾಸ ಪರಿಣತಿಗೆ ಹೆಸರುವಾಸಿಯಾಗಿದೆ. ಪಿಂಟೋ ಅವರು ತಮ್ಮ ಸಮಾಜಮುಖಿ ಮತ್ತು ಉದಯೋನ್ಮುಖ ಪ್ರತಿಭೆಗಳನ್ನು ಪೋಷಿಸುವ ಸಾಂಸ್ಕೃತಿಕ ಹಾಗೂ ಸಾಮಾಜಿಕ ಉಪಕ್ರಮಗಳನ್ನು ಬೆಂಬಲಿಸಿದ್ದಕ್ಕಾಗಿ ವ್ಯಾಪಕವಾಗಿ ಮೆಚ್ಚುಗೆ ಗಳಿಸಿದ್ದಾರೆ.

  ಅರ್ಜಿ ಸಲ್ಲಿಸುವುದು ಹೇಗೆ
  ಆಸಕ್ತ ಅಭ್ಯರ್ಥಿಗಳು ಈ ಅಧಿಕೃತ ಫಾರ್ಮ್ ಅನ್ನು ಭರ್ತಿ ಮಾಡುವ ಮೂಲಕ ಆನ್‌ಲೈನ್‌ನಲ್ಲಿ ನೋಂದಾಯಿಸಿಕೊಳ್ಳಬಹುದು:

  https://docs.google.com/forms/d/e/1FAIpQLSejdl_jhddYK0SGXsmYY4V4A6qFN-FIBvdj2LoYjyr5vjEtRA/viewform

  ಅಥವಾ, ಭಾಗವಹಿಸುವವರು ದಾಯ್ಜಿವರ್ಲ್ಡ್‌ನ ಸಾಮಾಜಿಕ ಮಾಧ್ಯಮ ವೇದಿಕೆಗಳು ಅಥವಾ ಪ್ರಚಾರದ ಪೋಸ್ಟರ್‌ಗಳಲ್ಲಿ ಕಾಣಿಸಿಕೊಂಡಿರುವ ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಬಹುದು.

  ನೋಂದಣಿಗೆ ಕೊನೆಯ ದಿನಾಂಕ: 2025ರ ಡಿಸೆಂಬರ್ 4

  ಹೆಚ್ಚಿನ ವಿವರಗಳಿಗಾಗಿ, ಸಂಪರ್ಕಿಸಿ: +91-824-2982023