ಕಾಸರಗೋಡು : ನಗರಸಭಾ ಬಜೆಟ್ ಅಧಿವೇಶನ - 3.12 ಕೋಟಿ ರೂ. ಅನುದಾನ ಮೀಸಲು

•   Tue, Mar 03 2026 01:04:09 PM



• ಕಾಸರಗೋಡು, ಮಾ. 03 (DaijiworldNews/TA): ನಗರಸಭಾ ಬಜೆಟ್ ಅಧಿವೇಶನ ಸೋಮವಾರ ಕಾಸರಗೋಡು ನಗರಸಭಾಂಗಣದಲ್ಲಿ ಜರುಗಿತು. ನಗರಸಭೆ ಉಪಾಧ್ಯಕ್ಷ ಕೆ.ಎಂ.ಹನೀಫ್ ಮಿಗತೆ ಬಜೆಟ್ ಮಂಡಿಸಿದರು. ನಗರಸಭೆ ಅಧ್ಯಕ್ಷೆ ಶಾಹಿನಾ ಸಲೀಂ ನೇತೃತ್ವದ ಆಡಳಿತ ಮೂಲಸೌಕರ್ಯ ಸಮಿತಿಯ ಚೊಚ್ಚಲ ಬಜೆಟ್ ಇದಾಗಿದೆ. ನಗರ ಸಭೆಯ ಎಲ್ಲ ವಾರ್ಡ್ಗಳ ಮೂಲಸೌಕರ್ಯ ಅಭಿವೃದ್ಧಿಗಾಗಿ ಪ್ರತಿ ವಾರ್ಡ್ ಗೆ 8 ಲಕ್ಷ ರೂ.ನಂತೆ ಒಟ್ಟು 3.12 ಕೋಟಿ ರೂ. ಅನುದಾನ ಮೀಸಲಿರಿಸಲಾಗಿದೆ.

  

  ಕಾಸರಗೋಡು ಹೊಸ ಬಸ್ ನಿಲ್ದಾಣದ ಶಾಪಿಂಗ್ ಕಾಂಪ್ಲೆಕ್ಸ್ ಮತ್ತು ನಗರಸಭೆ ಮೀನು ಮಾರುಕಟ್ಟೆ ನವೀಕರಣಕ್ಕಾಗಿ ತಲಾ 10 ಕೋಟಿ ರೂ. ಮೀಸಲಿರಿಸಲಾಗಿದೆ. ಕಾಸರಗೋಡು ಟೌನ್ ಹಾಲ್ ಸಭಾಂಗಣ ಅತ್ಯಾಧುನಿಕ ರೀತಿಯಲ್ಲಿ ಅಭಿವೃದ್ಧಿಗೊಳಿಸಲು ನಗರಸಭೆ, ಸಂಸದ, ಶಾಸಕರ ಅನುದಾನ ಬಳಸಿಕೊಳ್ಳಲಾಗುವುದು. ನಗರಸಭೆ ವ್ಯಾಪ್ತಿಯ ಕಾಸರಗೋಡು ಹಳೇ ಬಸ್ ನಿಲ್ದಾಣ ಮತ್ತು ಶಾಪಿಂಗ್ ಕಾಂಪ್ಲೆಕ್ಸ್ ಒಳಗೊಂಡ ಎರಡಂತಸ್ತಿನ ಕಟ್ಟಡ ಅಭಿವೃದ್ಧಿಪಡಿಸಿ ಎಸಿ ಡಾರ್ಮೆಟರಿ ನಿರ್ಮಿಸಿ ಸಾರ್ವಜನಿಕರಿಗೆ ಬಾಡಿಗೆಗೆ ನೀಡಲು ವ್ಯವಸ್ಥೆ ಕಲ್ಪಿಸಲಾಗುವುದು ಎಂದು ಬಜೆಟ್ ನಲ್ಲಿ ಸೂಚಿಸಲಾಗಿದೆ.

  ಶಾಲೆಗಳಿಗೆ ಮೂಲ ಸೌಕರ್ಯ: ನಗರಸಭೆ ಅಧೀನದಲ್ಲಿರುವ ವಿದ್ಯಾಲಯಗಳ ಮೂಲಸೌಕರ್ಯ ಹೆಚ್ಚಿಸಿ, ಶಾಲೆಗಳಲ್ಲಿ 'ಶೀ ಟಾಯ್ಲೆಟ್' ವ್ಯವಸ್ಥೆ ಜಾರಿಗೊಳಿಸಲಾಗುವುದು. ನಗರಸಭೆವ್ಯಾಪ್ತಿಯಲ್ಲಿ ಟ್ರಾಫಿಕ್ ಜಾಮ್ ಪರಿಹರಿಸಲು ಅಗತ್ಯ ಕ್ರಮ ಕೈಗೊಳ್ಳಲಾಗುವುದು. ನಗರ ಪ್ರದೇಶದಲ್ಲಿ ಬಡಜನರಿಗೆ ಹಾಗೂ ಉದ್ಯೋಗರಹಿತರಿಗೆ ಕಾಯಂ ಜೀವನಮಾರ್ಗ ಕಂಡುಕೊಳ್ಳಲು ರಾಷ್ಟ್ರೀಯ ನಗರ ಉಪಜೀವನ ಮಿಷನ್ ಸಹಕಾರದೊಂದಿಗೆ ಯೋಜನೆ ತಯಾರಿಸಲಾಗುವುದು ಎಂದು ಕೆ.ಎಂ.ಹನೀಫ್ ತಿಳಿಸಿದರು.