ಮಂಗಳೂರು : 'ವಂಶಾವಳಿ ತಿಳಿಯುವುದು ಕುತೂಹಲ ತಣಿಸುವುದಕ್ಕೆ ಮಾತ್ರ' - ತಜ್ಞ ಡಾ. ಮೈಕಲ್ ಲೋಬೊ ಅಭಿಮತ

•   Sun, Mar 08 2026 07:07:38 PM



• ಮಂಗಳೂರು, ಮಾ. 08 (DaijiworldNews/TA): ಕ್ರೈಸ್ತ ಸಮುದಾಯದ ವಂಶಾವಳಿ ತಿಳಿದುಕೊಳ್ಳಲು ಚರ್ಚ್ ದಾಖಲೆಗಳನ್ನು ಪರಿಶೀಲಿಸಿದರೆ ಸಾಕಾಗುತ್ತದೆ. ಆದರೆ ಅದು ಮುಖ್ಯವಾಗಿ ಕುತೂಹಲ ತಣಿಸುವ ಕೆಲಸವಾಗಿದ್ದು, ಅದನ್ನು ಬಿಟ್ಟರೆ ಹೆಚ್ಚಿನ ಉಪಯೋಗ ಇರುವುದಿಲ್ಲ ಎಂದು ವಂಶಾವಳಿ ತಜ್ಞ ಮೈಕೆಲ್ ಲೋಬೋ ಹೇಳಿದರು.

  

  

  

  

  

  

  

  

  

  ಅವರು ಕೊಂಕಣಿ ಭಾಷಾ ಮಂಡಲ ಕರ್ನಾಟಕ ಸಂಸ್ಥೆಯ 52ನೇ ವರ್ಷದ ಸ್ಥಾಪನಾ ದಿನದ ಅಂಗವಾಗಿ ಬಿಇಎಂ ಶಾಲೆಯ ಕಾರ್‌ಸ್ಟ್ರೀಟ್ ಸಭಾಂಗಣದಲ್ಲಿ ತೌರೊ ಕುಟುಂಬದ ಸಹಯೋಗದಲ್ಲಿ ನಡೆದ ವಂಶಾವಳಿ ಕುರಿತು ಆಯೋಜಿಸಲಾದ ಕಾರ್ಯಕ್ರಮದಲ್ಲಿ ಮುಖ್ಯ ಭಾಷಣಕಾರರಾಗಿ ಮಾತನಾಡಿದರು. ವಂಶಾವಳಿ ಕುರಿತು ದೀರ್ಘಕಾಲ ಸಂಶೋಧನೆ ನಡೆಸಿ ಹತ್ತು ಸಾವಿರಕ್ಕೂ ಹೆಚ್ಚು ಪುಟಗಳ ಗ್ರಂಥಗಳನ್ನು ರಚಿಸಿರುವ ಡಾ. ಲೋಬೊ ಅವರಿಗೆ ವಿದೇಶಿ ವಿಶ್ವವಿದ್ಯಾಲಯದಿಂದ ಡಾಕ್ಟರೇಟ್ ಪದವಿಯೂ ಲಭಿಸಿದೆ.

  ಕಾರ್ಯಕ್ರಮವನ್ನು ವಜ್ರೋದ್ಯಮಿ ಎಸ್. ಎಲ್. ಪ್ರಶಾಂತ್ ಶೇಟ್ ದೀಪ ಬೆಳಗಿಸುವ ಮೂಲಕ ಉದ್ಘಾಟಿಸಿದರು. ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ವಿಭಿನ್ನ ಕಾರ್ಯಕ್ರಮಗಳನ್ನು ಆಯೋಜಿಸುವ ಮೂಲಕ ಕೊಂಕಣಿ ಭಾಷಾ ಮಂಡಳ್ ಕರ್ನಾಟಕ ಸಂಸ್ಥೆ ಕೊಂಕಣಿ ಸಮುದಾಯದ ಅಗತ್ಯಗಳನ್ನು ಪೂರೈಸಲು ಪ್ರಯತ್ನಿಸುತ್ತಿರುವುದು ಸಂತಸದ ಸಂಗತಿ ಎಂದು ಹೇಳಿದರು.

  ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ರೇಮಂಡ್ ಡಿ'ಕುನ್ಹಾ ಟಕೋಡ್ ಮಾತನಾಡಿ, ಕರ್ನಾಟಕ, ಕೇರಳ, ಗೋವಾ ಮತ್ತು ಮಹಾರಾಷ್ಟ್ರ ರಾಜ್ಯಗಳಲ್ಲಿ ಕೊಂಕಣಿ ಭಾಷಾ ಮಂಡಳಗಳು ಕಾರ್ಯನಿರ್ವಹಿಸುತ್ತಿದ್ದು, ಅವುಗಳ ಕಾರ್ಯ ಕೊಂಕಣಿ ಭಾಷಾ ಚಳುವಳಿಗೆ ಬಲ ನೀಡುತ್ತಿದೆ ಎಂದು ಹೇಳಿದರು. ಹಿಂದೆ ಕೊಂಕಣಿ ಭಾಷೆಗೆ ಅಕಾಡೆಮಿ ಸ್ಥಾನಮಾನ ಹಾಗೂ ಸಂವಿಧಾನದ ಎಂಟನೇ ಪರಿಚ್ಛೇದದಲ್ಲಿ ಮಾನ್ಯತೆ ಪಡೆಯಲು ಹೋರಾಟ ನಡೆಸಿದ್ದೇವೆ. ಮುಂದಿನ ದಿನಗಳಲ್ಲಿ ಕೊಂಕಣಿ ಭವನ ನಿರ್ಮಾಣ ಹಾಗೂ ಸ್ನಾತಕೋತ್ತರ ಅಧ್ಯಯನ ಆರಂಭಿಸುವ ಉದ್ದೇಶದಿಂದ ಚಳುವಳಿಯನ್ನು ಮುಂದುವರಿಸುತ್ತೇವೆ ಎಂದರು.

  ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ ಜಾನ್ ಎ. ತೌರೊ ಕಾಮತ್ ಶುಭಾಶಯಗಳನ್ನು ತಿಳಿಸಿದರು. ತೌರೊ ಕುಟುಂಬದ ವಂಶಾವಳಿ ಕುರಿತು ಸಂಶೋಧನೆ ನಡೆಸಿದ ಮನ್ವೆಲ್ ತೌರೊ ತಮ್ಮ ಅಧ್ಯಯನದ ಆಧಾರದಲ್ಲಿ ಕುಟುಂಬದ ವಂಶಪಾರಂಪರ್ಯದ ವಿವರಗಳನ್ನು ಹಂಚಿಕೊಂಡರು. ಇದೇ ವೇಳೆ ಪ್ರವೀಣ್ ತೌರೋ, ತಮ್ಮ ತೌರೊ ಕಾಮತ್ ಕುಟುಂಬದ ವಂಶಾವಳಿ ಕುರಿತು ವಿವರಿಸಿದರು.

  ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಅನೇಕರು ವಂಶಾವಳಿ ಕುರಿತು ತಮ್ಮ ಅನುಭವ ಹಾಗೂ ಮಾಹಿತಿಯನ್ನು ಹಂಚಿಕೊಂಡರು. ಖಜಾಂಜಿ ವಸಂತ ರಾವ್, ಗೀತಾ ಸಿ ಕಿಣಿ ಮತ್ತು ಜೂಲಿಯೆಟ್ ಫೆರ್ನಾಂಡಿಸ್ ಪ್ರಶ್ನೋತ್ತರ ಕಾರ್ಯಕ್ರಮವನ್ನು ನಡೆಸಿಕೊಟ್ಟರು. ಉಪಾಧ್ಯಕ್ಷೆ ಮೀನಾಕ್ಸಿ ಎನ್ ಪೈ ಮತ್ತು ರಾಜ್ಯ ಶಿಕ್ಷಕರ ಸಂಘದ ಮಾಜಿ ಉಪಾಧ್ಯಕ್ಷ ಸ್ಟ್ಯಾನಿ ತಾವ್ರೊ ಸಮಾರೋಪ ಭಾಷಣ ಮಾಡಿದರು. ಕಾರ್ಯಕ್ರಮದ ಆರಂಭದಲ್ಲಿ ಕಾರ್ಯಕಾರಿ ಸದಸ್ಯ ರಾಬರ್ಟ್ ಮೆನೆಜಸ್ ಸ್ವಾಗತಿಸಿದರು. ಕಾರ್ಯದರ್ಶಿ ಲಿಸ್ಟನ್ ಡಿ'ಸೋಜಾ ವಂದಿಸಿದರು. ಜೋಸ್ಸಿ ಪಿಂಟೊ ಕಾರ್ಯಕ್ರಮ ನಿರೂಪಿಸಿದರು.