ಉಡುಪಿ: ಮಣಿಪಾಲದ ಮಣ್ಣಪಳ್ಳ ಕೆರೆಯನ್ನ ಪ್ರವಾಸಿ ತಾಣವನ್ನಾಗಿಸಲು ತುರ್ತು ಕ್ರಮ ಅಗತ್ಯ

•   Fri, Mar 27 2026 06:57:29 PM



• ಉಡುಪಿ, ಮಾ. 27 (DaijiworldNews/AA): ಮಣಿಪಾಲದ ಹೃದಯಭಾಗದಲ್ಲಿರುವ ರಮಣೀಯ ಮಣ್ಣಪಳ್ಳ ಕೆರೆಯು ಈ ಭಾಗದ ಅತ್ಯಂತ ಸುಂದರ ಮತ್ತು ಜನಪ್ರಿಯ ಸಾರ್ವಜನಿಕ ತಾಣವಾಗಿದೆ. ಕೆರೆಯ ಸುತ್ತಲಿನ ಹಸಿರು ದೇಹಕ್ಕೂ ಮನಸ್ಸಿಗೂ ನೆಮ್ಮದಿ ನೀಡುತ್ತದೆ. ಇದು ವಾಕಿಂಗ್, ವ್ಯಾಯಾಮ ಮಾಡುವವರ ಹಾಗೂ ಪ್ರಕೃತಿ ಪ್ರೇಮಿಗಳ ನೆಚ್ಚಿನ ತಾಣವಾಗಿದೆ.

  ಸುಮಾರು 1.9 ಕಿಲೋಮೀಟರ್ ಉದ್ದದ ವಾಕಿಂಗ್ ಟ್ರ‍್ಯಾಕ್ ಹೊಂದಿರುವ ಈ ಕೆರೆಯು ಬೆಳಗ್ಗೆ ಮತ್ತು ಸಂಜೆಯ ನಡಿಗೆ, ಜಾಗಿಂಗ್ ಹಾಗೂ ವಿಶ್ರಾಂತಿಗೆ ಪ್ರಶಸ್ತವಾದ ತಾಣವಾಗಿದೆ. ಹಕ್ಕಿಗಳ ಚಿಲಿಪಿಲಿ ಮತ್ತು ತಂಗಾಳಿಯ ನಡುವೆ ಇರುವ ಇಲ್ಲಿನ ಪ್ರಶಾಂತ ಪರಿಸರವು ಪಕ್ಷಿ ವೀಕ್ಷಕರು ಮತ್ತು ಪ್ರಕೃತಿ ಪ್ರೇಮಿಗಳನ್ನು ಕೈಬೀಸಿ ಕರೆಯುತ್ತದೆ. ಸೂರ್ಯೋದಯ ಮತ್ತು ಸೂರ್ಯಾಸ್ತದ ಸಮಯದಲ್ಲಿ ಈ ಕೆರೆಯ ಸೌಂದರ್ಯವು ಛಾಯಾಗ್ರಾಹಕರನ್ನು ಮತ್ತು ಫಿಟ್ನೆಸ್ ಪ್ರೇಮಿಗಳನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಆಕರ್ಷಿಸುತ್ತಿದೆ.

  ಇತ್ತೀಚಿನ ದಿನಗಳಲ್ಲಿ, ವಿಶೇಷವಾಗಿ ಮಳೆಗಾಲದಲ್ಲಿ ನೀರಿನ ಮಟ್ಟ ಹೆಚ್ಚಾದಾಗ ಇಲ್ಲಿನ ಬೋಟಿಂಗ್ ಚಟುವಟಿಕೆಗಳು ಪ್ರವಾಸಿಗರ ಗಮನ ಸೆಳೆಯುತ್ತಿವೆ. ಈ ಸಮಯದಲ್ಲಿ ಆಗಮಿಸುವ ವಿವಿಧ ಜಾತಿಯ ವಲಸೆ ಹಕ್ಕಿಗಳು ಈ ಪ್ರದೇಶದ ಪರಿಸರ ಮಹತ್ವವನ್ನು ಹೆಚ್ಚಿಸಿದೆ.

  ನೈಸರ್ಗಿಕ ಸೌಂದರ್ಯ ಮತ್ತು ಜನರ ಭೇಟಿ ಹೆಚ್ಚುತ್ತಿದ್ದರೂ, ಜಿಲ್ಲೆಯ ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಮಣ್ಣಪಳ್ಳ ಕೆರೆಯು ಇನ್ನೂ ಪೂರ್ಣ ಪ್ರಮಾಣದಲ್ಲಿ ಅಭಿವೃದ್ಧಿ ಹೊಂದದ ತಾಣವಾಗಿಯೇ ಉಳಿದಿದೆ. ಉಡುಪಿ ಈಗಾಗಲೇ ಒಂದು ಪ್ರಸಿದ್ಧ ಪ್ರವಾಸಿ ತಾಣವಾಗಿ ಗುರುತಿಸಿಕೊಂಡಿರುವುದರಿಂದ, ಮಣ್ಣಪಳ್ಳ ಕೆರೆಯನ್ನು ಸರಿಯಾದ ರೀತಿಯಲ್ಲಿ ಅಭಿವೃದ್ಧಿಪಡಿಸಿದರೆ ಸ್ಥಳೀಯ ಪ್ರವಾಸೋದ್ಯಮಕ್ಕೆ ದೊಡ್ಡ ಮಟ್ಟದ ಉತ್ತೇಜನ ಸಿಗಲಿದೆ.

  ಪ್ರಸ್ತುತ ಉಡುಪಿ ನಗರ ವ್ಯಾಪ್ತಿಯಲ್ಲಿ ಮಣ್ಣಪಳ್ಳಕ್ಕೆ ಸಮನಾದ ಯಾವುದೇ ತಾಣವಿಲ್ಲ. ಹೀಗಾಗಿ ಮಣ್ಣಪಳ್ಳವನ್ನು ಒಂದು ಮಾದರಿ ಪರಿಸರ ಪ್ರವಾಸೋದ್ಯಮ ತಾಣವಾಗಿ ರೂಪಿಸಲು ಅಧಿಕಾರಿಗಳಿಗೆ ಇದೊಂದು ಉತ್ತಮ ಅವಕಾಶವಾಗಿದೆ. ಸಮರ್ಪಕ ಯೋಜನೆ ಮತ್ತು ಮೂಲಸೌಕರ್ಯಗಳ ಅಭಿವೃದ್ಧಿಯೊಂದಿಗೆ, ಈ ಕೆರೆಯು ಕೇವಲ ಸ್ಥಳೀಯರನ್ನು ಮಾತ್ರವಲ್ಲದೆ, ಸಮೀಪದ ಧಾರ್ಮಿಕ ಮತ್ತು ಕರಾವಳಿ ಪ್ರವಾಸಿ ತಾಣಗಳಿಗೆ ಭೇಟಿ ನೀಡುವ ಪ್ರವಾಸಿಗರನ್ನೂ ಹೆಚ್ಚಿನ ಸಂಖ್ಯೆಯಲ್ಲಿ ಆಕರ್ಷಿಸಬಲ್ಲದು.

  ಕೆರೆಯ ಸುತ್ತಮುತ್ತಲಿನ ಪರಿಸರ ಮತ್ತು ಸೌಲಭ್ಯಗಳನ್ನು ಸುಧಾರಿಸಲು ಜಿಲ್ಲಾಡಳಿತವು ವಿಶೇಷ ಆಸಕ್ತಿ ವಹಿಸಬೇಕಿದೆ. ನಗರಸಭೆಯು ತ್ಯಾಜ್ಯ ವಿಲೇವಾರಿಯನ್ನು ಉತ್ತಮವಾಗಿ ನಿರ್ವಹಿಸುತ್ತಿದ್ದರೂ, ಕೆಲವು ಪ್ರಮುಖ ಅಂಶಗಳ ಕಡೆಗೆ ತಕ್ಷಣದ ಗಮನಹರಿಸುವ ಅಗತ್ಯವಿದೆ. ವಿಶೇಷವಾಗಿ, ವಾಕಿಂಗ್ ಟ್ರ‍್ಯಾಕ್‌ನಲ್ಲಿ ಒಣಗಿದ ಎಲೆಗಳು ರಾಶಿ ಬೀಳುತ್ತಿದ್ದು, ಇದರಿಂದ ಹಾದಿಯು ಜಾರುವಂತಾಗಿ ಇಲ್ಲಿ ನಡೆದಾಡುವವರಿಗೆ ತೊಂದರೆಯಾಗುತ್ತಿದೆ. ಇದನ್ನು ಸ್ವಚ್ಛಗೊಳಿಸಲು ಪ್ರತ್ಯೇಕ ಸಿಬ್ಬಂದಿಯನ್ನು ನೇಮಿಸುವುದು ಅಗತ್ಯ. ಇದರೊಂದಿಗೆ, ಮುಂಜಾನೆ ಮತ್ತು ಸಂಜೆಯ ಅವಧಿಯಲ್ಲಿ ಭೇಟಿ ನೀಡುವವರ ಸುರಕ್ಷತೆಯ ದೃಷ್ಟಿಯಿಂದ ಬೀದಿ ದೀಪಗಳ ನಿಯಮಿತ ನಿರ್ವಹಣೆ ಅತೀ ಮುಖ್ಯವಾಗಿದೆ.

  ಮಂಗಳೂರಿನ ಕದ್ರಿ ಪಾರ್ಕ್ ಮಾದರಿಯಲ್ಲಿ ವಾಕಿಂಗ್ ಟ್ರ‍್ಯಾಕ್ ಉದ್ದಕ್ಕೂ ಪುಟ್ಟ ರೈಲು, ಉದ್ಯಾನವನಗಳು, ಕುಳಿತುಕೊಳ್ಳಲು ಆಸನಗಳು, ಪ್ರತ್ಯೇಕ ಪಕ್ಷಿ ವೀಕ್ಷಣಾ ಸ್ಥಳಗಳು, ಜೈವಿಕ ವೈವಿಧ್ಯತೆಯ ಬಗ್ಗೆ ಮಾಹಿತಿ ನೀಡುವ ಫಲಕಗಳನ್ನು ಅಳವಡಿಸುವುದರಿಂದ ಪ್ರವಾಸಿಗರಿಗೆ ಉತ್ತಮ ಅನುಭವ ಸಿಗುವುದಲ್ಲದೆ, ಈ ಕೆರೆಯು ಪ್ರವಾಸಿಗರು ಭೇಟಿ ನೀಡಲು ಸೂಕ್ತವಾದ ತಾಣವಾಗಿ ಬದಲಾಗಲಿದೆ.

  ಕೆರೆಯ ಪರಿಸರ ಸಮತೋಲನವನ್ನು ಕಾಯ್ದುಕೊಳ್ಳಲು ಹತ್ತಿರದ ಕಟ್ಟಡಗಳಿಂದ ಹೊರಬರುವ ತ್ಯಾಜ್ಯ ನೀರು ಕೆರೆಗೆ ಸೇರದಂತೆ ಅಧಿಕಾರಿಗಳು ಎಚ್ಚರ ವಹಿಸಬೇಕು. ಬೇಸಿಗೆಯಲ್ಲಿ ನೀರಿನ ಮಟ್ಟ ಕುಸಿಯುವುದರಿಂದ, ವರ್ಷಪೂರ್ತಿ ನೀರನ್ನು ಕಾಯ್ದುಕೊಳ್ಳುವ ಸುಸ್ಥಿರ ಕ್ರಮಗಳನ್ನು ಜಾರಿಗೊಳಿಸಬೇಕು. ಪ್ರಸ್ತುತ ಬಳಕೆಯಿಲ್ಲದೆ ಹದಗೆಟ್ಟಿರುವ ಮೆಟ್ಟಿಲುಗಳು, ಪೊದೆಗಳಿಂದ ಮುಚ್ಚಿಹೋಗಿರುವ ಹಾದಿಗಳು, ಆಸನ ವ್ಯವಸ್ಥೆ ಮತ್ತು ಒಣ ಎಲೆಗಳಿಂದ ತುಂಬಿರುವ ಬ್ಯಾಡ್ಮಿಂಟನ್ ಕೋರ್ಟ್‌ಗಳನ್ನು ದುರಸ್ತಿಗೊಳಿಸಿದರೆ ಸಾಂಸ್ಕೃತಿಕ ಮತ್ತು ಕ್ರೀಡಾ ಚಟುವಟಿಕೆಗಳಿಗೆ ಇದನ್ನು ಬಳಸಿಕೊಳ್ಳಬಹುದು.

  ಈ ಕೆರೆಯು ಒಂದು ಪ್ರಮುಖ ಪ್ರವಾಸಿ ತಾಣವಾಗಿ ಬದಲಾಗುವುದು ಕೇವಲ ಆಡಳಿತಾತ್ಮಕ ಪ್ರಯತ್ನಗಳಿಂದ ಮಾತ್ರವಲ್ಲದೆ, ಸಾರ್ವಜನಿಕರ ಜವಾಬ್ದಾರಿಯ ಮೇಲೂ ಅವಲಂಬಿತವಾಗಿದೆ. ಇಂತಹ ಸ್ಥಳಗಳ ಅಭಿವೃದ್ಧಿ ಮತ್ತು ನಿರ್ವಹಣೆಯ ಹೊಣೆಗಾರಿಕೆ ಅಧಿಕಾರಿಗಳ ಮೇಲಿದ್ದರೂ, ಅವುಗಳ ಸ್ವಚ್ಛತೆ ಮತ್ತು ಪರಿಸರವನ್ನು ಕಾಪಾಡುವುದು ಪ್ರತಿಯೊಬ್ಬ ನಾಗರಿಕನ ಕರ್ತವ್ಯವಾಗಿದೆ.

  ಸಮರ್ಪಕ ಯೋಜನೆ ಮತ್ತು ಸುಸ್ಥಿರ ನಿರ್ವಹಣೆಯೊಂದಿಗೆ ಮಣ್ಣಪಳ್ಳ ಕೆರೆಯು ಕರಾವಳಿಯ ಒಂದು ಪ್ರಮುಖ ಪ್ರವಾಸಿ ತಾಣವಾಗಿ ಬೆಳೆಯುವ ಎಲ್ಲಾ ಸಾಧ್ಯತೆಗಳನ್ನು ಹೊಂದಿದೆ. ನಗರೀಕರಣ ಹೆಚ್ಚುತ್ತಿರುವ ಈ ಕಾಲದಲ್ಲಿ ಇಂತಹ ನೈಸರ್ಗಿಕ ತಾಣಗಳನ್ನು ಉಳಿಸಿ ಬೆಳೆಸುವುದು ಅತ್ಯಂತ ಅವಶ್ಯಕವಾಗಿದೆ.