ದಕ್ಷಿಣ ಕನ್ನಡ : ನದಿಯ ನಡುವೆ ದೈವಿಕ ಸನ್ನಿಧಿ - ಪ್ರಕೃತಿ ಪ್ರಿಯರ ನೆಚ್ಚಿನ ಕ್ಷೇತ್ರದ ಐತಿಹ್ಯ ಏನು?!

•   Sat, Jun 20 2026 01:47:07 PM



• ದಕ್ಷಿಣ ಕನ್ನಡ, ಜೂ. 20 (DaijiworldNews/TA): ಮೂರು ಸುತ್ತಲೂ ಹರಿಯುವ ನೇತ್ರಾವತಿ ನದಿಯ ನಡುವೆ, ಹಚ್ಚ ಹಸಿರಿನ ಪ್ರಕೃತಿ ಮಡಿಲಿನಲ್ಲಿ ಬೆಟ್ಟದ ತುದಿಯಲ್ಲಿ ಕಂಗೊಳಿಸುತ್ತಿರುವ ಇನ್ನೋಳಿ ಸೋಮನಾಥೇಶ್ವರ ದುರ್ಗಾಪರಮೇಶ್ವರಿ ಕ್ಷೇತ್ರ ಭಕ್ತರು ಹಾಗೂ ಪ್ರಕೃತಿ ಪ್ರಿಯರನ್ನು ತನ್ನತ್ತ ಸೆಳೆಯುತ್ತಿದೆ. ಮಂಗಳೂರು ತಾಲೂಕಿನ ಇನ್ನೋಳಿ ಗ್ರಾಮದಲ್ಲಿರುವ ಈ ಕ್ಷೇತ್ರ ಧಾರ್ಮಿಕ ಮಹತ್ವದ ಜೊತೆಗೆ ತನ್ನ ನೈಸರ್ಗಿಕ ಸೌಂದರ್ಯದಿಂದಲೂ ವಿಶೇಷ ಗುರುತಿಸಿಕೊಂಡಿದೆ.

  

  2 ಸಾವಿರ ವರ್ಷಗಳ ಇತಿಹಾಸ : ಸುಮಾರು 2,000 ವರ್ಷಗಳ ಇತಿಹಾಸ ಹೊಂದಿರುವ ಈ ಕ್ಷೇತ್ರಕ್ಕೆ ಐತಿಹಾಸಿಕ ಹಿನ್ನೆಲೆಯೂ ಇದೆ. ಸ್ಥಳೀಯರ ನಂಬಿಕೆಯ ಪ್ರಕಾರ, ಟಿಪ್ಪು ಸುಲ್ತಾನನ ಕಾಲದಲ್ಲಿ ನಡೆದ ಫಿರಂಗಿ ದಾಳಿಯಿಂದ ಕ್ಷೇತ್ರವು ಹಾನಿಗೊಳಗಾಗಿ ಪಾಳುಬಿದ್ದಿತ್ತು. ಫಿರಂಗಿ ಸಿಡಿಸಲಾದ ಸ್ಥಳವೇ ಬಳಿಕ ‘ಫಿರಂಗಿಪೇಟೆ’ ಎಂದು ಪ್ರಸಿದ್ಧಿ ಪಡೆದಿದ್ದು, ಕಾಲಕ್ರಮೇಣ ಅದು ‘ಪರಂಗಿಪೇಟೆ’ ಎಂದು ಕರೆಯಲ್ಪಡಲು ಆರಂಭವಾಯಿತು.

  ದೀರ್ಘಕಾಲ ನಿರ್ಲಕ್ಷ್ಯಕ್ಕೆ ಒಳಗಾಗಿದ್ದ ಕ್ಷೇತ್ರವನ್ನು ಗ್ರಾಮಸ್ಥರು ಮತ್ತು ಭಕ್ತರು ಒಗ್ಗೂಡಿ 1999ರಲ್ಲಿ ಜೀರ್ಣೋದ್ಧಾರಗೊಳಿಸಲು ಮುಂದಾದರು. ಹಲವು ವರ್ಷಗಳ ಶ್ರಮದ ಬಳಿಕ 2007ರಲ್ಲಿ ಕ್ಷೇತ್ರವು ಹೊಸ ವೈಭವದೊಂದಿಗೆ ಪುನರುಜ್ಜೀವನಗೊಂಡಿತು. ಈ ಕ್ಷೇತ್ರದಲ್ಲಿ ಮಹಾಶಿವ ಮತ್ತು ದುರ್ಗಾಪರಮೇಶ್ವರಿ ದೇವಿಯನ್ನು ಪ್ರಧಾನವಾಗಿ ಆರಾಧಿಸಲಾಗುತ್ತದೆ. ದೇವರ ದರ್ಶನದ ಜೊತೆಗೆ ದೇವಸ್ಥಾನದ ಸುತ್ತಲಿನ ಪ್ರಕೃತಿ ಸೌಂದರ್ಯವೂ ಭಕ್ತರ ಮನಸೆಳೆಯುತ್ತದೆ. ಮೂರು ಕಡೆಗಳಿಂದ ಹರಿಯುವ ನೇತ್ರಾವತಿ ನದಿ, ಹಸಿರು ಬೆಟ್ಟಗಳ ಸಾಲು ಮತ್ತು ಪ್ರಶಾಂತ ವಾತಾವರಣ ಇಲ್ಲಿನ ವಿಶೇಷ ಆಕರ್ಷಣೆಯಾಗಿದೆ.

  ವಿಶೇಷವಾಗಿ ಸಂಜೆಯ ವೇಳೆ ಬೆಟ್ಟದ ಮೇಲಿಂದ ಕಾಣುವ ಸೂರ್ಯಾಸ್ತದ ಮನಮೋಹಕ ದೃಶ್ಯ ಪ್ರವಾಸಿಗರಿಗೆ ಅಪರೂಪದ ಅನುಭವ ನೀಡುತ್ತದೆ. ಹೀಗಾಗಿ ಈ ಕ್ಷೇತ್ರ ಧಾರ್ಮಿಕ ಪ್ರವಾಸದ ಜೊತೆಗೆ ಪ್ರಕೃತಿ ಪ್ರವಾಸಕ್ಕೂ ಜನಪ್ರಿಯ ತಾಣವಾಗಿ ಬೆಳೆಯುತ್ತಿದೆ. ಮಂಗಳೂರಿನಿಂದ ಕೊಣಾಜೆ ಮಾರ್ಗವಾಗಿ ಇನ್ನೋಳಿ ಕ್ಷೇತ್ರವನ್ನು ಸುಲಭವಾಗಿ ತಲುಪಬಹುದು. ರಾಷ್ಟ್ರೀಯ ಹೆದ್ದಾರಿ-75ರ ಅಡ್ಯಾರು ಭಾಗದಲ್ಲಿ ನಿರ್ಮಾಣವಾಗಿರುವ ಹೊಸ ಸೇತುವೆಯಿಂದ ಈ ಪ್ರದೇಶಕ್ಕೆ ಸಂಪರ್ಕ ಮತ್ತಷ್ಟು ಸುಗಮಗೊಂಡಿದೆ. ಶಾಂತ ವಾತಾವರಣ, ಐತಿಹಾಸಿಕ ಹಿನ್ನೆಲೆ, ದೈವಿಕ ಸನ್ನಿಧಿ ಮತ್ತು ಪ್ರಕೃತಿಯ ಸೊಬಗು ಒಂದೇ ಕಡೆ ಸಿಗುವ ಅಪರೂಪದ ತಾಣಗಳಲ್ಲಿ ಇನ್ನೋಳಿ ಸೋಮನಾಥೇಶ್ವರ ದುರ್ಗಾಪರಮೇಶ್ವರಿ ಕ್ಷೇತ್ರವೂ ಒಂದು. ಭಕ್ತಿ ಮತ್ತು ಪ್ರಕೃತಿಯ ಸಮ್ಮಿಲನವನ್ನು ಅನುಭವಿಸಲು ಬಯಸುವವರು ಒಮ್ಮೆಯಾದರೂ ಈ ಕ್ಷೇತ್ರಕ್ಕೆ ಭೇಟಿ ನೀಡಲೇಬೇಕು.