ಕಿನ್ನಿಗೋಳಿ, ಅ.15 (DaijiworldNews/AK): ಮೆನ್ನಬೆಟ್ಟುವಿನಲ್ಲಿ ಹೊಸದಾಗಿ ನಿರ್ಮಿಸಲಾದ ಹಸಿತ್ಯಾಜ್ಯ ವಿಲೇವಾರಿ ಕೇಂದ್ರವನ್ನು ತಕ್ಷಣ ಮುಚ್ಚುವಂತೆ ಒತ್ತಾಯಿಸಿ ಸ್ಥಳಿಯ ನಿವಾಸಿಗಳು ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಕಚೇರಿಯ ಹೊರಗೆ ಸಾಮೂಹಿಕ ಪ್ರತಿಭಟನೆ ನಡೆಸಿದರು.









ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಕಚೇರಿಯ ಎದುರು ಜಮಾಯಿಸಿದ ನೂರಾರು ನಿವಾಸಿಗಳು ಮತ್ತು ಸಾರ್ವಜನಿಕರು ಆಡಳಿತ ಮಂಡಳಿಯ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿ, ಅಧಿಕಾರಿಗಳಿಗೆ ಅಧಿಕೃತ ಮನವಿ ಪತ್ರವನ್ನು ಸಲ್ಲಿಸಿದರು.
ಸಭೆಯನ್ನುದ್ದೇಶಿಸಿ ಮಾತನಾಡಿದ ಕರ್ನಾಟಕ ಪರಿಸರ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿಯ ಅಧ್ಯಕ್ಷೆ ಶಾಲೆಟ್ ಪಿಂಟೊ, ಸಾರ್ವಜನಿಕರೊಂದಿಗೆ ಸಮಾಲೋಚಿಸದೆ ಈ ಸೌಲಭ್ಯವನ್ನು ಸ್ಥಾಪಿಸಿದ್ದಕ್ಕಾಗಿ ಸ್ಥಳೀಯ ಅಧಿಕಾರಿಗಳನ್ನು ತೀವ್ರವಾಗಿ ಟೀಕಿಸಿದರು.
"ಈ ಡಂಪ್ ಯಾರ್ಡ್ ಅನ್ನು ಸ್ಥಳೀಯ ನಿವಾಸಿಗಳು ಅಥವಾ ಸಾರ್ವಜನಿಕ ಪ್ರತಿನಿಧಿಗಳನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ರಹಸ್ಯವಾಗಿ ಸ್ಥಾಪಿಸಲಾಗಿದೆ. ಇದು ದೇವಾಲಯ, ದೈವಸ್ಥಾನ, ಶಿಕ್ಷಣ ಸಂಸ್ಥೆ ಮತ್ತು ನೂರಾರು ನಿವಾಸಿಗಳಿಗೆ ಹತ್ತಿರದಲ್ಲಿದೆ, ನೈಸರ್ಗಿಕವಾಗಿ ಭಾರೀ ಮಳೆ ನೀರು ಹರಿಯುವ ಪ್ರದೇಶದಲ್ಲಿದೆ. ಆಡಳಿತ ಅಧಿಕಾರಿಗಳು ವಸತಿ ವಲಯದ ಮಧ್ಯದಲ್ಲಿ ತ್ಯಾಜ್ಯ ಸೌಲಭ್ಯಕ್ಕೆ ಸೂಕ್ತ ಮುಂಜಾಗ್ರತೆ ವಹಿಸದೆ ಹೇಗೆ ಅನುಮತಿ ನೀಡಲು ಸಾಧ್ಯ? ಇದನ್ನು ತಕ್ಷಣ ನಿಲ್ಲಿಸದಿದ್ದರೆ, ಅಧಿಕಾರಿಗಳು ವ್ಯಾಪಕ ಸಾರ್ವಜನಿಕ ಹೋರಾಟವನ್ನು ಎದುರಿಸಬೇಕಾಗುತ್ತದೆ ಎಂದು ಪಿಂಟೋ ಹೇಳಿದರು.
ಡಂಪ್ ಯಾರ್ಡ್ ವಿರೋಧಿ ಸಮಿತಿಯ ಅಧ್ಯಕ್ಷ ಸಂದೀಪ್ ಶೆಟ್ಟಿ, ಸಾರ್ವಜನಿಕ ಆರೋಗ್ಯದ ಮೇಲೆ ತೀವ್ರ ಪರಿಣಾಮ ಬೀರಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು.
ಸ್ಥಳೀಯ ಅಧಿಕಾರಿಗಳು ಮತ್ತು ಪಂಚಾಯತ್ ಆರೋಗ್ಯ ಅಧಿಕಾರಿಗಳು ಸಾರ್ವಜನಿಕರಿಂದ ಸತ್ಯವನ್ನು ಮರೆಮಾಚಿ ಏಕಪಕ್ಷೀಯವಾಗಿ ಈ ನಿರ್ಧಾರ ಕೈಗೊಂಡಿದ್ದಾರೆ ಎಂದು ಗ್ರಾಮಸ್ಥರು ದೂರಿದ್ದು, ತಕ್ಷಣವೇ ಕಾಮಗಾರಿ ನಿಲ್ಲಿಸಿ ಘಟಕವನ್ನು ಸ್ಥಳಾಂತರಿಸದಿದ್ದರೆ ಮುಂದಿನ ದಿನಗಳಲ್ಲಿ ಉಗ್ರ ಪ್ರತಿಭಟನೆ ನಡೆಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ. "ಅಧಿಕಾರಿಗಳು ಈ ತ್ಯಾಜ್ಯ ಘಟಕವನ್ನು ನಿರ್ಮಿಸಲು ಪೂರ್ವ ಸೂಚನೆ ನೀಡಿಲ್ಲ ಅಥವಾ ಸಮುದಾಯದ ಅಭಿಪ್ರಾಯ ಪಡೆಯಲು ಗ್ರಾಮ ಸಭೆಯನ್ನು ಕರೆದಿಲ್ಲ. ಈ ಅಜಾಗರೂಕ ನಿರ್ಧಾರಕ್ಕೆ ಆಡಳಿತವನ್ನು ಹೊಣೆಗಾರರನ್ನಾಗಿ ಮಾಡಬೇಕು" ಎಂದು ಅವರು ಹೇಳಿದರು.
ರಾಬರ್ಟ್ ರೊಸಾರಿಯೋ, ಸುಧಾಕರ್ ಮತ್ತು ಹೇಮಾಚಾರ್ಯ ಸೇರಿದಂತೆ ಇತರ ಸಮುದಾಯದ ಮುಖಂಡರು ಸಭೆಯನ್ನುದ್ದೇಶಿಸಿ ಮಾತನಾಡಿದರು. ಪಟ್ಟಣ ಪಂಚಾಯತ್ ಸದಸ್ಯರಾದ ಸುನಿತಾ ರೊಡ್ರಿಗಸ್, ಕೋಕಿಲಾ ಮತ್ತು ಸಂತನ್ ಡಿಸೋಜಾ, ಸ್ಥಳೀಯ ನಿವಾಸಿಗಳಾದ ದಿನೇಶ್ ಆಚಾರ್ಯ, ಹರೀಶ್, ಸಂತೋಷ್ ಆಚಾರ್ಯ, ರಾಜನ್ ಡಿ'ಕೋಸ್ಟಾ, ಹಿಲ್ಡಾ ಡಿ'ಸೋಜಾ ಮತ್ತು ಶಯಾನ್ ಕುಮಾರ್ ಅವರ ನೇತೃತ್ವದಲ್ಲಿ ಪ್ರತಿಭಟನೆ ನಡೆಯಿತು. ಪ್ರಕಾಶ್ ಆಚಾರ್ಯ ಅವರ ವಂದನಾರ್ಪಣೆಯೊಂದಿಗೆ ಪ್ರತಿಭಟನೆ ಮುಕ್ತಾಯವಾಯಿತು.