ಮಂಗಳೂರು, ಅ.17 (DaijiworldNews/AA): ಮಂಗಳೂರು ನಗರದ ಪ್ರಮುಖ ಮಂಗಳೂರು ಸೆಂಟ್ರಲ್ ರೈಲ್ವೆ ನಿಲ್ದಾಣವು 2025-26ರ ಸಾಲಿನಲ್ಲಿ ಒಟ್ಟು 56,84,811 ಪ್ರಯಾಣಿಕರ ಸಂಚಾರವನ್ನು ನಿರ್ವಹಿಸಿದೆ. ಇದರಲ್ಲಿ 16,99,232 ಕಾಯ್ದಿರಿಸಿದ ಟಿಕೆಟ್ಗಳ ಪ್ರಯಾಣಿಕರು ಹಾಗೂ 39,85,579 ಕಾಯ್ದಿರಿಸದ ಪ್ರಯಾಣಿಕರು ಸೇರಿದ್ದಾರೆ. ಈ ಮೂಲಕ ಪ್ರಯಾಣಿಕರ ಸಂಚಾರದ ವಿಷಯದಲ್ಲಿ ಮಂಗಳೂರು ಭಾಗದ ಮೂರು ರೈಲ್ವೆ ನಿಲ್ದಾಣಗಳ ಪೈಕಿ ಅತ್ಯಂತ ಬಿಡುವಿಲ್ಲದ ರೈಲ್ವೆ ನಿಲ್ದಾಣವಾಗಿ ಹೊರಹೊಮ್ಮಿದೆ.

ಇದೇ ಅವಧಿಯಲ್ಲಿ ಮಂಗಳೂರು ಜಂಕ್ಷನ್ ರೈಲು ನಿಲ್ದಾಣವು 5,70,828 ಕಾಯ್ದಿರಿಸಿದ ಹಾಗೂ 6,61,877 ಕಾಯ್ದಿರಿಸದ ಪ್ರಯಾಣಿಕರು ಸೇರಿದಂತೆ ಒಟ್ಟು 12,32,705 ಪ್ರಯಾಣಿಕರನ್ನು ನಿರ್ವಹಿಸಿದೆ. ಇನ್ನು ಉಳ್ಳಾಲ ರೈಲು ನಿಲ್ದಾಣವು 27,978 ಕಾಯ್ದಿರಿಸಿದ ಹಾಗೂ 65,277 ಕಾಯ್ದಿರಿಸದ ಪ್ರಯಾಣಿಕರು ಸೇರಿದಂತೆ ಒಟ್ಟು 93,255 ಪ್ರಯಾಣಿಕರ ಸಂಚಾರಕ್ಕೆ ಸಾಕ್ಷಿಯಾಗಿದೆ.
ಮೂರೂ ನಿಲ್ದಾಣಗಳಿಂದ ಒಟ್ಟಾರೆಯಾಗಿ 70,10,771 ಪ್ರಯಾಣಿಕರ ಸಂಚಾರ ದಾಖಲಾಗಿದ್ದು, ಇದರಲ್ಲಿ ಶೇಕಡಾ 81 ಕ್ಕೂ ಹೆಚ್ಚು ಪಾಲು ಮಂಗಳೂರು ಸೆಂಟ್ರಲ್ ನಿಲ್ದಾಣ ಒಂದರಿಂದಲೇ ಬಂದಿದೆ. ರೈಲ್ವೆ ಸಂಘಟನೆಗಳು ಮಾಹಿತಿ ಹಕ್ಕು (ಆರ್ಟಿಐ) ಕಾಯ್ದೆಯಡಿ ಪಡೆದ ಮಾಹಿತಿಯಿಂದ ಈ ಅಂಕಿಅಂಶಗಳು ತಿಳಿದುಬಂದಿವೆ.
ವರದಿ ಅವಧಿಯಲ್ಲಿ ಮಂಗಳೂರು ಸೆಂಟ್ರಲ್ ನಿಲ್ದಾಣವು 133.06 ಕೋಟಿ ರೂಪಾಯಿ ಪ್ರಯಾಣಿಕರ ಆದಾಯ ಗಳಿಸಿದ್ದರೆ, ಮಂಗಳೂರು ಜಂಕ್ಷನ್ 62.10 ಕೋಟಿ ರೂಪಾಯಿ ಮತ್ತು ಉಳ್ಳಾಲ ನಿಲ್ದಾಣವು 32.72 ಲಕ್ಷ ರೂಪಾಯಿ ಆದಾಯ ತಂದುಕೊಟ್ಟಿವೆ. ಮೂರೂ ನಿಲ್ದಾಣಗಳ ಒಟ್ಟು ಪ್ರಯಾಣಿಕರ ಆದಾಯ ಸುಮಾರು 195.48 ಕೋಟಿ ರೂಪಾಯಿ ತಲುಪಿದ್ದು, ಮಂಗಳೂರು ರೈಲ್ವೆ ಜಾಲದ ಮಹತ್ವದ ಕೊಡುಗೆಯನ್ನು ತೋರಿಸುತ್ತದೆ.
ಸಬ್ಅರ್ಬನ್ಯೇತರ ಗುಂಪಿನ ವರ್ಗೀಕರಣದಡಿಯಲ್ಲಿ ಮಂಗಳೂರು ಸೆಂಟ್ರಲ್ ನಿಲ್ದಾಣವನ್ನು 'NSG-2', ಮಂಗಳೂರು ಜಂಕ್ಷನ್ ಅನ್ನು 'NSG-3' ಮತ್ತು ಉಳ್ಳಾಲವನ್ನು 'NSG-4' ಎಂದು ವಿಂಗಡಿಸಲಾಗಿದೆ. ಪ್ರಯಾಣಿಕರ ದಟ್ಟಣೆ, ಆದಾಯ ಮತ್ತು ಪ್ರಾದೇಶಿಕ ಭವಿಷ್ಯದ ಅಗತ್ಯಗಳನ್ನು ಪರಿಗಣಿಸಿ ಮೂಲಸೌಕರ್ಯ, ಪ್ರಯಾಣಿಕರ ಸೌಲಭ್ಯಗಳು, ರೈಲು ಸೇವೆಗಳು ಹಾಗೂ ಕಾರ್ಯಾಚರಣೆಯ ವ್ಯವಸ್ಥೆಗಳನ್ನು ಯೋಜಿಸುವಾಗ ಈ ವರ್ಗೀಕರಣಗಳನ್ನು ಮಾನದಂಡವಾಗಿ ಬಳಸಲಾಗುತ್ತದೆ. ಮಂಗಳೂರು ಸೆಂಟ್ರಲ್ ಪ್ರಮುಖ ರೈಲು ಟರ್ಮಿನಲ್ ಆಗಿರುವುದರಿಂದ, ಇದರ ನವೀಕರಣ ಮತ್ತು ಸಾಮರ್ಥ್ಯ ವಿಸ್ತರಣೆಗೆ ಸೂಕ್ತ ಆದ್ಯತೆ ನೀಡಬೇಕು ಎಂಬುದು ರೈಲ್ವೆ ಸಂಘಟನೆಗಳ ಅಭಿಪ್ರಾಯವಾಗಿದೆ.
ಮಂಗಳೂರು ಸೆಂಟ್ರಲ್ ಮತ್ತು ಉಳ್ಳಾಲ ರೈಲು ನಿಲ್ದಾಣಗಳಲ್ಲಿ ಸರಕು ಸಾಗಣೆ ವ್ಯವಹಾರವೂ ನಿರಂತರ ಬೆಳವಣಿಗೆ ಕಾಣುತ್ತಿದೆ. 2024-25 ರಲ್ಲಿ ಈ ನಿಲ್ದಾಣಗಳು 38,816 ಟನ್ ಸರಕನ್ನು ನಿರ್ವಹಿಸಿ, 13,78,416 ರೂಪಾಯಿ ಆದಾಯ ತಂದುಕೊಟ್ಟಿದ್ದವು. 2025-26 ರಲ್ಲಿ ಸರಕು ಸಾಗಣೆ ಪ್ರಮಾಣ 53,293 ಟನ್ಗೆ ಏರಿಕೆಯಾಗಿದ್ದು, ಆದಾಯವೂ 43,49,281 ರೂಪಾಯಿಗೆ ಹೆಚ್ಚಳವಾಗಿದೆ. 202-27 ರ ಏಪ್ರಿಲ್-ಸೆಪ್ಟೆಂಬರ್ ಅವಧಿಯಲ್ಲಿ ಇದುವರೆಗೆ 38,859 ಟನ್ ಸರಕು ನಿರ್ವಹಣೆಯಾಗಿದ್ದು, 25,98,729 ರೂಪಾಯಿ ಆದಾಯ ಹರಿದುಬಂದಿದೆ.