ಉಡುಪಿ, ಅ.22 (DaijiworldNews/AA): ಮಣಿಪಾಲ ಉನ್ನತ ಶಿಕ್ಷಣ ಅಕಾಡೆಮಿ (ಮಾಹೆ) ಪ್ರಸ್ತುತಪಡಿಸಿದ ಹಾಗೂ ಕಿಶೂ ಎಂಟರ್ಪ್ರೈಸಸ್ ಬ್ಯಾನರ್ನಡಿ ದಾಯ್ಜಿವರ್ಲ್ಡ್ ಉಡುಪಿ ಸ್ಟುಡಿಯೋ ಆಯೋಜಿಸಿದ್ದ ವಿನೂತನ ಮಾದರಿಯ ಭಾಷಣ ಸ್ಪರ್ಧೆ 'ಅಭಿವ್ಯಕ್ತ' ಸೀಸನ್ ೧ರಲ್ಲಿ ಯುಕ್ತ ಆರ್ ಭಟ್ ವಿಜೇತೆಯಾಗಿ ಹೊರಹೊಮ್ಮಿದ್ದಾರೆ. ಅವರಿಗೆ 30,000 ರೂ. ನಗದು ಬಹುಮಾನ, ಟ್ರೋಫಿ ಹಾಗೂ ಪ್ರಶಸ್ತಿ ಪತ್ರವನ್ನು ನೀಡಿ ಗೌರವಿಸಲಾಯಿತು.































ಪ್ರತೀತಿ ಪಿ ಎಸ್ ದ್ವಿತೀಯ ಬಹುಮಾನದೊಂದಿಗೆ 20,000 ರೂ. ನಗದು, ಟ್ರೋಫಿ ಮತ್ತು ಪ್ರಶಸ್ತಿ ಪತ್ರ ಪಡೆದರು. ಆದೀಶ್ ಎ ಶೆಣೈ ತೃತೀಯ ಬಹುಮಾನದೊಂದಿಗೆ 10,000 ರೂ. ನಗದು, ಟ್ರೋಫಿ ಹಾಗೂ ಪ್ರಶಸ್ತಿ ಪತ್ರವನ್ನು ತಮ್ಮದಾಗಿಸಿಕೊಂಡರು.
ಸುಶ್ರಾವ್ಯ ಎಂ, ಮಾನಸ್ವಿ ಕುಲಾಲ್ ಮತ್ತು ದಶಮಿ ಶೆಟ್ಟಿ ತಲಾ 5,000 ರೂ. ನಗದು, ಟ್ರೋಫಿ ಹಾಗೂ ಪ್ರಶಸ್ತಿ ಪತ್ರಗಳೊಂದಿಗೆ ಸಮಾಧಾನಕರ ಬಹುಮಾನ ಪಡೆದರು. ಮಾನಸ್ವಿ ಕುಲಾಲ್ ಅವರು 'ಪರ್ಫಾರ್ಮರ್ ಆಫ್ ದಿ ಡೇ' ಪ್ರಶಸ್ತಿಗೂ ಭಾಜನರಾದರು.
ಈ ಸ್ಪರ್ಧೆಯು ಪ್ರೌಢಶಾಲಾ ವಿದ್ಯಾರ್ಥಿಗಳಿಗೆ ತಮ್ಮ ಸಾರ್ವಜನಿಕ ಭಾಷಣ ಹಾಗೂ ಸಂವಹನ ಕೌಶಲ್ಯಗಳನ್ನು ಪ್ರದರ್ಶಿಸಲು ಉತ್ತಮ ವೇದಿಕೆಯನ್ನು ಕಲ್ಪಿಸಿಕೊಟ್ಟಿತ್ತು. ನಗರದ ಗಣ್ಯರು, ತೀರ್ಪುಗಾರರು, ಪೋಷಕರು ಸಮ್ಮುಖದಲ್ಲಿ ನಡೆದ ಗ್ರಾಂಡ್ ಫಿನಾಲೆ ಸ್ಪರ್ಧೆಯಲ್ಲಿ ಫೈನಲಿಸ್ಟ್ಗಳು ಅತ್ಯುತ್ತಮ ಪ್ರದರ್ಶನ ನೀಡಿದರು.
ಅಕಾಡೆಮಿ ಆಫ್ ಜನರಲ್ ಎಜುಕೇಶನ್ನ ಆಡಳಿತಾಧಿಕಾರಿ ಡಾ. ಕೆ ಶ್ರೀಧರ್ ರಂಗನಾಥ ಪೈ ಅವರು ಮುಖ್ಯ ಅತಿಥಿಯಾಗಿದ್ದರು. ಆಲ್ವಿನ್ ದಾಂತಿ ಪೆರ್ನಾಲ್ ಮುಖ್ಯ ತೀರ್ಪುಗಾರರಾಗಿದ್ದರೆ, ನೀತಾ ಪ್ರಭು ಮತ್ತು ಶ್ರೇಯಸ್ ಕೋಟ್ಯಾನ್ ತೀರ್ಪುಗಾರರಾಗಿ ಸೇವೆ ಸಲ್ಲಿಸಿದರು. 'ದಾಯ್ಜಿವರ್ಲ್ಡ್ ಸ್ವರ ಸಾಗರ' ಸೀಸನ್ 1 ಮತ್ತು 2ರ ತೀರ್ಪುಗಾರ ವಿದ್ವಾನ್ ಯಶವಂತ್ ಎಂ ಜಿ, ಸಮಾಜ ಸೇವಕ ಜೋಸೆಫ್ ಮಿನೇಜಸ್, ಕಿಶೂ ಎಂಟರ್ಪ್ರೈಸಸ್ ನಿರ್ದೇಶಕ ಕಿಶೋರ್ ಗೊನ್ಸಾಲ್ವಿಸ್ ಹಾಗೂ ದಾಯ್ಜಿವರ್ಲ್ಡ್ ಉಡುಪಿ ವಿಭಾಗದ ಕಾರ್ಯಚರಣೆ ವ್ಯವಸ್ಥಾಪಕ ಕೆವಿನ್ ರೋಡ್ರಿಗಸ್ ಉಪಸ್ಥಿತರಿದ್ದರು.
ಸೆಮಿಫೈನಲಿಸ್ಟ್ಗಳಾದ ಅಸೀಲ್ ಡಿಸೋಜಾ, ಸಾನ್ವಿ ಕೆ ಎಲ್, ಸಾನ್ವಿ ಜಿ ಎಸ್ ಮತ್ತು ಸಾಕ್ಷಿ ಶೆಟ್ಟಿ ಅವರನ್ನು ಕಾರ್ಯಕ್ರಮದಲ್ಲಿ ಸನ್ಮಾನಿಸಲಾಯಿತು.
ಕಾರ್ಯಕ್ರಮದಲ್ಲಿ ಮಾತನಾಡಿದ ಪೋಷಕ ಸಂತೋಷ್ ಕುಲಾಲ್, 'ಅಭಿವ್ಯಕ್ತ' ಕಾರ್ಯಕ್ರಮವು ಮಕ್ಕಳಿಗೆ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಲು ಅತ್ಯುತ್ತಮ ಅವಕಾಶವನ್ನು ನೀಡಿದೆ. ರಾಜ್ಯ ಮಟ್ಟದ ಟಿವಿ ರಿಯಾಲಿಟಿ ಶೋಗಳಲ್ಲಿ ಭಾಗವಹಿಸುವುದು ಹಲವು ಕುಟುಂಬಗಳಿಗೆ ಕಷ್ಟಕರವಾಗಿರುವ ಈ ದಿನಗಳಲ್ಲಿ, ದಾಯ್ಜಿವರ್ಲ್ಡ್ ಸ್ಥಳೀಯವಾಗಿಯೇ ರಾಜ್ಯ ಮಟ್ಟದ ವೇದಿಕೆಯನ್ನು ಒದಗಿಸಿರುವುದನ್ನು ಅವರು ಶ್ಲಾಘಿಸಿದರು.
ವಿಜೇತೆ ಯುಕ್ತ ಆರ್ ಭಟ್ ಅವರ ತಾಯಿ ಅನುರಾಧ ಭಟ್ ಮಾತನಾಡಿ, 'ಅಭಿವ್ಯಕ್ತ' ಒದಗಿಸಿದ ಅವಕಾಶ ಅನನ್ಯವಾಗಿದ್ದು, ಸ್ಪರ್ಧಿಗಳನ್ನು ಬೆಳೆಸಲು ತೆಗೆದುಕೊಂಡ ಶ್ರಮವನ್ನು ಅಭಿನಂದಿಸಿದರು. ಫೈನಲ್ ತಲುಪಿದ ಆರೂ ಸ್ಪರ್ಧಿಗಳೂ ತಮ್ಮದೇ ರೀತಿಯಲ್ಲಿ ವಿಜೇತರು ಎಂದು ಅವರು ಹೇಳಿದರು.
ತೀರ್ಪುಗಾರ್ತಿ ನೀತಾ ಪ್ರಭು ಕಾರ್ಯಕ್ರಮ ಆಯೋಜಿಸಿದ ದಾಯ್ಜಿವರ್ಲ್ಡ್ ಉಡುಪಿ ಸ್ಟುಡಿಯೋ ತಂಡಕ್ಕೆ ಶುಭಾಶಯ ಕೋರಿದರು. ಪರದೆಯ ಹಿಂದೆ ಶ್ರಮಿಸಿದ ಸಿಬ್ಬಂದಿಯ ಶ್ರಮವನ್ನು ಶ್ಲಾಘಿಸಿದ ಅವರು, ಜೀವನದಲ್ಲಿ ಇನ್ನೂ ಅನೇಕ ಸ್ಪರ್ಧೆಗಳು ಬರಲಿದ್ದು, ಮಾನಸಿಕವಾಗಿ ಮತ್ತು ದೈಹಿಕವಾಗಿ ಸಿದ್ಧರಾಗಿರಬೇಕು ಎಂದು ಸ್ಪರ್ಧಿಗಳಿಗೆ ಕರೆ ನೀಡಿದರು.
ತೀರ್ಪುಗಾರ ಶ್ರೇಯಸ್ ಕೋಟ್ಯಾನ್ ಸಂವಹನ ಕೌಶಲ್ಯದ ಮಹತ್ವವನ್ನು ಎತ್ತಿಹಿಡಿಯುತ್ತಾ, ಇದನ್ನು ಕೇವಲ ಪಠ್ಯೇತರ ಚಟುವಟಿಕೆಯಾಗಿ ನೋಡದೆ, ಸಹ-ಪಠ್ಯ ಕೌಶಲ್ಯವಾಗಿ ಸ್ವೀಕರಿಸಬೇಕು. ಬಹುಮಾನಗಳನ್ನು ಲೆಕ್ಕಿಸದೆ ತಮ್ಮ ಸಾಮರ್ಥ್ಯವನ್ನು ಅಭಿವೃದ್ಧಿಪಡಿಸಿಕೊಳ್ಳುವುದನ್ನು ಮುಂದುವರಿಸುವಂತೆ ಅವರು ಸ್ಪರ್ಧಿಗಳಿಗೆ ಮನವಿ ಮಾಡಿದರು.
ವಿದ್ವಾನ್ ಯಶವಂತ್ ಎಂ ಜಿ ಮಾತನಾಡಿ, 'ಅಭಿವ್ಯಕ್ತ' ಕಾರ್ಯಕ್ರಮವು ಭಾಷಣ ಆಧಾರಿತ ಕಿರುತೆರೆ ಕಾರ್ಯಕ್ರಮಗಳ ಅಪರೂಪದ ಹಾಗೂ ವಿಶಿಷ್ಟ ಶೈಲಿಯನ್ನು ಪರಿಚಯಿಸಿದೆ. ಮುಂದಿನ ದಿನಗಳಲ್ಲಿ ಈ ಸ್ಪರ್ಧಿಗಳು ರಾಷ್ಟ್ರಮಟ್ಟದ ವೇದಿಕೆಗಳನ್ನು ತಲುಪಲಿ ಎಂದು ಆಶಿಸಿದರು.
ಮುಖ್ಯ ತೀರ್ಪುಗಾರ ಆಲ್ವಿನ್ ದಾಂತಿ ಅವರು ಮುಂಬರುವ 'ಅಭಿವ್ಯಕ್ತ' ಸೀಸನ್ನಲ್ಲಿ ಭಾಗವಹಿಸುವಂತೆ ವಿದ್ಯಾರ್ಥಿಗಳಿಗೆ ಪ್ರೋತ್ಸಾಹ ನೀಡಿದರು. ಸ್ಪರ್ಧಿಗಳ ಪಯಣದಲ್ಲಿ ಪೋಷಕರ ಸಕ್ರಿಯ ಭಾಗವಹಿಸುವಿಕೆಗೆ ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು.
ಡಾ. ಕೆ ಶ್ರೀಧರ್ ರಂಗನಾಥ ಪೈ ಅವರು ಮಾತನಾಡಿ, ಪ್ರೌಢಶಾಲಾ ದಿನಗಳನ್ನು ಪ್ರತಿ ಮಗುವಿನ ಜೀವನದ ಸುವರ್ಣ ಹಂತ. ಸುಪ್ತ ಪ್ರತಿಭೆಗಳನ್ನು ಹೊರತರುವಲ್ಲಿ 'ಅಭಿವ್ಯಕ್ತ'ದಂತಹ ಸ್ಪರ್ಧೆಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಭಾಷಣವು ಬುದ್ಧಿವಂತಿಕೆ ಮತ್ತು ವಾಕ್ಚಾತುರ್ಯವನ್ನು ಬೆಳೆಸುವ ಶಕ್ತಿಶಾಲಿ ವ್ಯಕ್ತಪಡಿಸುವ ಮಾಧ್ಯಮವಾಗಿದೆ ಎಂದು ಹೇಳಿದರು. ಆಯೋಜಕರು, ಸ್ಪರ್ಧಿಗಳು ಹಾಗೂ ಪೋಷಕರಿಗೆ ಅವರು ಅಭಿನಂದನೆ ಸಲ್ಲಿಸಿದರು.
'ಅಭಿವ್ಯಕ್ತ' ಪ್ರೌಢಶಾಲಾ ವಿದ್ಯಾರ್ಥಿಗಳಿಗೆ ತಮ್ಮ ವಾಕ್ಚಾತುರ್ಯವನ್ನು ಮರುರೂಪಿಸಿಕೊಳ್ಳಲು ಸಿಕ್ಕ ಅನನ್ಯ ವೇದಿಕೆಯಾಗಿದೆ. ಕರಾವಳಿ ಕರ್ನಾಟಕದಲ್ಲಿ ಸ್ಥಳೀಯ ಕಿರುತೆರೆ ಸ್ಟುಡಿಯೋವೊಂದು ಆಯೋಜಿಸಿದ ಇಂತಹ ಮೊದಲ ಸ್ಪರ್ಧೆ ಇದಾಗಿದೆ. ಈ ಸ್ಪರ್ಧೆಯಲ್ಲಿ ಪಿಕ್ ಆಂಡ್ ಸ್ಪೀಕ್, ರೋಲ್ ಮಾಡೆಲ್ಗಳ ಕುರಿತು ಭಾಷಣ, ಸಂವಾದಗಳು ಮತ್ತು ಪ್ರಸಿದ್ಧ ವ್ಯಕ್ತಿಗಳ ವೇಷಭೂಷಣ ತೊಟ್ಟು ಮಾತನಾಡುವ ವಿವಿಧ ಸುತ್ತುಗಳಿದ್ದವು. ವಿದ್ಯಾರ್ಥಿಗಳಿಗೆ ಸಾರ್ವಜನಿಕ ಭಾಷಣದಲ್ಲಿ ತರಬೇತಿ ನೀಡಲಾಯಿತು ಮತ್ತು ತೀರ್ಪುಗಾರರ ಪ್ರಶ್ನೆಗಳನ್ನು ಎದುರಿಸುವ ಅವರ ಸಾಮರ್ಥ್ಯವನ್ನು ಮೌಲ್ಯಮಾಪನ ಮಾಡಲಾಯಿತು.
ದಾಯ್ಜಿವರ್ಲ್ಡ್ ಉಡುಪಿ ಸ್ಟುಡಿಯೋ ವರ್ಷಪೂರ್ತಿ ಪ್ರೌಢಶಾಲಾ ವಿದ್ಯಾರ್ಥಿಗಳಿಗಾಗಿ ವಿವಿಧ ರಿಯಾಲಿಟಿ ಶೋಗಳನ್ನು ಆಯೋಜಿಸುತ್ತದೆ. ಇದರ ಮುಂದಿನ ಶೋ 'ಚಾಣಕ್ಷ ಚಾಲೆಂಜ್' ಸೀಸನ್ 4, ನವೆಂಬರ್ 5ರಿಂದ ಪ್ರತಿ ಗುರುವಾರ ಪ್ರಸಾರವಾಗಲಿದೆ.
'ಅಭಿವ್ಯಕ್ತ' ಕಾರ್ಯಕ್ರಮವನ್ನು ಮಾಹೆ ಪ್ರಸ್ತುತಪಡಿಸಿದ್ದು, ಮೂಡ್ಲಕಟ್ಟೆಯ ಐಎಮ್ಜೆ ಸಂಸ್ಥೆಗಳು, ಭೀಮಾ ಜ್ಯುವೆಲ್ಲರಿ ಉಡುಪಿ, ಸಿಎಸ್ಐ ಲೊಂಬಾರ್ಡ್ ಮೆಮೋರಿಯಲ್ ಆಸ್ಪತ್ರೆ ಉಡುಪಿ ಮತ್ತು ಗಿರಿಜಾ ಹೆಲ್ತ್ಕೇರ್ ಆಂಡ್ ಸರ್ಜಿಕಲ್ಸ್ ಸಹ-ಪ್ರಾಯೋಜಕತ್ವ ವಹಿಸಿದ್ದವು.
ತೇಜೇಶ್ ಜೆ ಬಂಗೇರ ಕಾರ್ಯಕ್ರಮ ನಿರೂಪಿಸಿದರು ಮತ್ತು ಮಿಥಾಲಿ ಶೆಟ್ಟಿ ಧನ್ಯವಾದ ಸಲ್ಲಿಸಿದರು.