ಮಂಗಳೂರು: ಇತಿಹಾಸ ಬರೆದ ಮಾಂಡ್ ಸೊಭಾಣ್; 275 ಗಂಟೆಗಳ ಕೊಂಕಣಿ ನಿರಂತರ ಗಾಯನದ ಮೂಲಕ ಗಿನ್ನಿಸ್ ವಿಶ್ವದಾಖಲೆ
Sat, Nov 14 2026 07:36:18 PM
ಮಂಗಳೂರು, ನ.14 (DaijiworldNews/AA): ಸಂಜೆ 6 ಗಂಟೆಯಾಗುತ್ತಿದ್ದಂತೆಯೇ ಮಂಗಳೂರಿನಲ್ಲಿ ಹೊಸದೊಂದು ಇತಿಹಾಸ ನಿರ್ಮಾಣವಾಯಿತು. ಪ್ರತಿಷ್ಠಿತ ಕೊಂಕಣಿ ಸಾಂಸ್ಕೃತಿಕ ಸಂಸ್ಥೆ 'ಮಾಂಡ್ ಸೊಭಾಣ್', ಅತಿ ದೀರ್ಘಾವಧಿಯ ನಿರಂತರ ಗಾಯನ ಮ್ಯಾರಥಾನ್ನ ಹಿಂದಿನ ಗಿನ್ನಿಸ್ ವಿಶ್ವದಾಖಲೆಯನ್ನು ಯಶಸ್ವಿಯಾಗಿ ಮುರಿದು ಐತಿಹಾಸಿಕ ಸಾಧನೆ ಮಾಡಿದೆ.
ಮಂಗಳೂರಿನ ಟೌನ್ ಹಾಲ್ ನಲ್ಲಿ ಈ ದಾಖಲೆಯ ಕ್ಷಣಕ್ಕೆ ನೂರಾರು ಸಮುದಾಯದ ಸದಸ್ಯರು ಸಾಕ್ಷಿಯಾದರು. ಸಂಭ್ರಮ, ಹರ್ಷೋದ್ಗಾರಗಳ ನಡುವೆ ಈ ಸಾಧನೆ ಮೂಡಿಬಂತು. 2024ರಲ್ಲಿ ವಡ್ತಾಲ್ನ ಶ್ರೀ ಹರಿಕೃಷ್ಣ ಕೀರ್ತನ ಯಾಗ ತಂಡ ನಿರ್ಮಿಸಿದ್ದ 11 ದಿನ, 11 ಗಂಟೆ ಮತ್ತು 11 ನಿಮಿಷಗಳ (275 ಗಂಟೆ 11 ನಿಮಿಷ) ಹಿಂದಿನ ವಿಶ್ವದಾಖಲೆಯನ್ನು ಮಾಂಡ್ ಸೊಭಾಣ್ ತಂಡ ಹಿಂದಿಕ್ಕಿದೆ.
ಮಾಂಡ್ ಸೊಭಾಣ್ ಸಂಸ್ಥೆಯ 40ನೇ ವಾರ್ಷಿಕೋತ್ಸವದ ಸ್ಮರಣಾರ್ಥ ಹಾಗೂ ಸಂಸ್ಥೆಯ ದಿವಂಗತ ಸಂಸ್ಥಾಪಕ ಎರಿಕ್ ಒಝೇರಿಯೊ ಅವರ ಸವಿನೆನಪಿಗಾಗಿ ಆಯೋಜಿಸಲಾಗಿರುವ ಬೃಹತ್ ಸಂಗೀತ ಸಮ್ಮೇಳನದ ಪ್ರಮುಖ ಆಕರ್ಷಣೆಯಾಗಿ ಈ ಐತಿಹಾಸಿಕ ಪ್ರಯತ್ನವನ್ನು ಹಮ್ಮಿಕೊಳ್ಳಲಾಗಿತ್ತು.
ಈ ಅಮೋಘ ಸಾಧನೆಯ ಮೂಲಕ ಮಾಂಡ್ ಸೊಭಾಣ್ ಮತ್ತೊಮ್ಮೆ ಕೊಂಕಣಿ ಭಾಷೆ ಮತ್ತು ಸಂಸ್ಕೃತಿಯತ್ತ ಇಡೀ ವಿಶ್ವದ ಗಮನ ಸೆಳೆದಿದೆ. ಕರಾವಳಿ ಕರ್ನಾಟಕ, ಗೋವಾ ಹಾಗೂ ಮಹಾರಾಷ್ಟ್ರ ಮತ್ತು ಕೇರಳದ ವಿವಿಧ ಭಾಗಗಳಲ್ಲಿ ನೆಲೆಸಿರುವ ಕೊಂಕಣಿ ಸಮುದಾಯದವರು ಒಗ್ಗಟ್ಟಿನಿಂದ ಈ ಅಭಿಯಾನಕ್ಕೆ ಅಭೂತಪೂರ್ವ ಬೆಂಬಲ ನೀಡಿದ್ದಾರೆ.
ಮಾಂಡ್ ಸೊಭಾಣ್ ಅಧ್ಯಕ್ಷ ಲೂಯಿಸ್ ಜೆ. ಪಿಂಟೊ ಅವರ ನೇತೃತ್ವದಲ್ಲಿ ತಿಂಗಳುಗಳ ಕಾಲ ನಡೆದ ಅಚ್ಚುಕಟ್ಟಾದ ಸಿದ್ಧತೆಗೆ ಈ ಬೃಹತ್ ಯಶಸ್ಸು ಸಿಕ್ಕಿದೆ. ಈಗಾಗಲೇ 4,000ಕ್ಕೂ ಹೆಚ್ಚು ಹಾಡುಗಳು ಹಾಗೂ 6,000ಕ್ಕೂ ಅಧಿಕ ಗಾಯಕರು ಈ ಗಾಯನ ಮ್ಯಾರಥಾನ್ನಲ್ಲಿ ತಮ್ಮ ಧ್ವನಿಗೂಡಿಸುವ ಮೂಲಕ ವಿಶ್ವದಾಖಲೆಯ ಇತಿಹಾಸದಲ್ಲಿ ತಮ್ಮ ಹೆಸರನ್ನು ದಾಖಲಿಸಿದ್ದಾರೆ. ಗಾಯನ ಕಾರ್ಯಕ್ರಮವು ನಿರಂತರವಾಗಿ ಮುಂದುವರಿದಿದ್ದು, ಭಾನುವಾರ ಸಂಜೆ 5 ಗಂಟೆಗೆ 'ಟೀಮ್ ಸುಮೇಲ್' ತಂಡದ ಭವ್ಯ ಸಮಾರೋಪ ಪ್ರದರ್ಶನದೊಂದಿಗೆ ಅಧಿಕೃತವಾಗಿ ಸಂಪನ್ನಗೊಳ್ಳಲಿದೆ.
"ಒಂದು ಸಂಸ್ಥೆಯಾಗಿ ವಿಶ್ವದಾಖಲೆ ನಿರ್ಮಿಸಿರುವುದಕ್ಕೆ ನಮಗೆ ಹೆಮ್ಮೆಯಿದೆ. ಆದರೆ ಈ ಬೃಹತ್ ಯೋಜನೆಯ ಹಿಂದೆ ಶ್ರಮಿಸಿದ ಪ್ರತಿಯೊಬ್ಬರು ಮತ್ತು ಹಾಡಿದ ಗಾಯಕರೇ ಈ ದಾಖಲೆಯ ನಿಜವಾದ ಒಡೆಯರು. ವಿಶ್ವದ ಮೂಲೆಮೂಲೆಯಿಂದ ನಮಗೆ ಬೆಂಬಲ ನೀಡಿದ ಸಮಸ್ತ ಕೊಂಕಣಿ ಸಮುದಾಯಕ್ಕೆ ನಾನು ಕೃತಜ್ಞತೆ ಸಲ್ಲಿಸುತ್ತೇನೆ. ಕೇವಲ ದಾಖಲೆ ನಿರ್ಮಿಸುವುದಷ್ಟೇ ನಮ್ಮ ಉದ್ದೇಶವಾಗಿರಲಿಲ್ಲ; ಈ ಪ್ರಯತ್ನದ ಮೂಲಕ ಕೊಂಕಣಿ ಸಮುದಾಯದ ಒಗ್ಗಟ್ಟು ಮತ್ತು ಶಕ್ತಿಯನ್ನು ನಾವು ಯಶಸ್ವಿಯಾಗಿ ಜಗತ್ತಿಗೆ ತೋರಿಸಿಕೊಟ್ಟಿದ್ದೇವೆ" ಎಂದು ಮಾಂಡ್ ಸೊಭಾಣ್ ಸಂಸ್ಥೆಯ ಅಧ್ಯಕ್ಷರಾದ ಲೂಯಿಸ್ ಜೆ. ಪಿಂಟೊ ತಿಳಿಸಿದ್ದಾರೆ.