ಉಡುಪಿ, ನ.18 (DaijiworldNews/AK): ದೆಹಲಿ ಪೊಲೀಸರು ಮತ್ತು ಸಿಬಿಐ ಅಧಿಕಾರಿಗಳಂತೆ ನಟಿಸಿ ನಕಲಿ ಹಣ ವರ್ಗಾವಣೆ, ಮಾದಕವಸ್ತು ಕಳ್ಳಸಾಗಣೆ ಮತ್ತು ಮಕ್ಕಳ ಅಪಹರಣ ಪ್ರಕರಣದಲ್ಲಿ ಬಂಧಿಸುವುದಾಗಿ ಬೆದರಿಸಿ ಉಡುಪಿಯ 51 ವರ್ಷದ ವ್ಯಕ್ತಿಯಿಂದ 15,98,976.40 ರೂ. ಹಣವನ್ನು ವಗಾವಣೆ ಮಾಡಿಸಿಕೊಂಡು ವಂಚಿಸಿರುವ ಘಟನೆ ವರದಿಯಾಗಿದೆ.

ಉಡುಪಿಯ ಶೇಷಾಚಲ(51) ವಂಚನೆಗೊಳಗಾದವರು. ದೂರಿನ ಪ್ರಕಾರ, ಘಟನೆ ಅಕ್ಟೋಬರ್ 18 ರಂದು ದೂರುದಾರರಾದ ಶೇಷಾಚಲ ಅವರಿಗೆ ಬೆಳಿಗ್ಗೆ 11.25 ರ ಸುಮಾರಿಗೆ ಹಿಂದಿಯಲ್ಲಿ ಮಾತನಾಡುತ್ತಿದ್ದ ಅಪರಿಚಿತ ವ್ಯಕ್ತಿಯಿಂದ ಫೋನ್ ಕರೆ ಬಂದಿದೆ. ನಿಮ್ಮ ಹೆಸರನ್ನು ಹೊಂದಿರುವ ಐಸಿಐಸಿಐ ಬ್ಯಾಂಕ್ ಪಾಸ್ಬುಕ್ ದೆಹಲಿಯಲ್ಲಿ ಪತ್ತೆಯಾಗಿದೆ . ಅದು ಪಂಕಜ್ ಶರ್ಮಾ ಎಂಬ ವ್ಯಕ್ತಿಯ ಹಣ ವರ್ಗಾವಣೆ, ಮಾದಕವಸ್ತು ಕಳ್ಳಸಾಗಣೆ ಮತ್ತು ಮಕ್ಕಳ ಅಪಹರಣ ಪ್ರಕರಣಕ್ಕೆ ಸಂಬಂಧಿಸಿದೆ ಎಂದು ಕರೆ ಮಾಡಿದವರು ಹೇಳಿಕೊಂಡಿದ್ದಾರೆ.
ದೆಹಲಿಯ ಸಿಬಿಐ ಪೊಲೀಸ್ ಅಧಿಕಾರಿ ಎಂದು ಹೇಳಿಕೊಂಡು ಕರೆ ಮಾಡಿದ ವ್ಯಕ್ತಿ, ಶೇಷಾಚಲ ಅವರಿಗೆ ನ್ಯಾಯಾಲಯವು ತನ್ನನ್ನು ತಕ್ಷಣ ಬಂಧಿಸಲು ಆದೇಶ ಹೊರಡಿಸಿದೆ ಮತ್ತು ದೆಹಲಿಗೆ ಬರಲು ಅಥವಾ ವೀಡಿಯೊ ಕರೆಯ ಮೂಲಕ ತನಿಖೆಗೆ ಸಹಕರಿಸಲು ಸೂಚಿಸಿದ್ದಾನೆ.
ದೂರುದಾರರಿಗೆ ಹಿಂದಿಯಲ್ಲಿ ಸಂವಹನ ನಡೆಸಲು ಸಾಧ್ಯವಾಗದ ಕಾರಣ, ಅವರು ತಮ್ಮ ಪತ್ನಿಯ ಮೊಬೈಲ್ ಸಂಖ್ಯೆಯನ್ನು ನೀಡಿದರು. ನಂತರ, ಅದೇ ಸಂಖ್ಯೆಯಿಂದ ಆಕೆಗೆ ವೀಡಿಯೊ ಕರೆ ಬಂದಿದೆ. ಪೊಲೀಸ್ ಸಮವಸ್ತ್ರ ಧರಿಸಿ ಕರೆ ಮಾಡಿದ ವ್ಯಕ್ತಿ, ತಾನು ದೆಹಲಿ ಪೊಲೀಸರ ತನಿಖಾಧಿಕಾರಿ ಎಂದು ಪರಿಚಯಿಸಿಕೊಂಡಿದ್ದಾನೆ. ಶೇಷಾಚಲ ಅವರ ಹೆಸರಿನಲ್ಲಿರುವ ಪ್ರಕರಣದ ಸಂಖ್ಯೆಯನ್ನು ತೋರಿಸಿ ನಂಬಿಸಿದ್ದಾನೆ.
ವಂಚಕರು ದೂರುದಾರರ ಪತ್ನಿಗೆ ಈ ವಿಷಯವನ್ನು ಯಾರಿಗೂ ಬಹಿರಂಗಪಡಿಸಬೇಡಿ ಎಂದು ಎಚ್ಚರಿಸಿದರು ಮತ್ತು ಪ್ರತಿ ಗಂಟೆಗೊಮ್ಮೆ ಸಂದೇಶ ಕಳುಹಿಸುವಂತೆ ಸೂಚಿಸಿದ್ದಾರೆ. ನ್ಯಾಯಾಧೀಶರು, ಸಿಬಿಐ ಅಧಿಕಾರಿ ಮತ್ತು ಆರ್ಬಿಐ ಅಧಿಕಾರಿಗಳು ತನಿಖೆಯಲ್ಲಿ ಭಾಗಿಯಾಗುತ್ತಾರೆ ಎಂದು ಹೇಳಿಕೊಂಡು ಅವರು ಪ್ರತಿದಿನ ವೀಡಿಯೊ ಕರೆಗಳನ್ನು ಮಾಡುವುದನ್ನು ಮುಂದುವರೆಸಿದರು ಎಂದು ಆರೋಪಿಸಲಾಗಿದೆ.
ಇದೇ ವೇಳೆ , ಆರೋಪಿಗಳು ದೂರುದಾರರ ನಗದು, ಚಿನ್ನ ಮತ್ತು ಬ್ಯಾಂಕ್ ಖಾತೆಗಳ ವಿವರಗಳನ್ನು ಪಡೆದುಕೊಂಡಿದ್ದಾರೆ. . ಆರ್ಬಿಐ ತನಿಖೆಗೆ ವಹಿವಾಟುಗಳು ಅಗತ್ಯವಿದೆ ಎಂದು ಹೇಳಿಕೊಂಡು, ಅವರ ಬಳಿ ಲಭ್ಯವಿರುವ ಎಲ್ಲಾ ಹಣವನ್ನು ಅವರು ಒದಗಿಸಿದ ಬ್ಯಾಂಕ್ ಖಾತೆಗಳಿಗೆ ವರ್ಗಾಯಿಸಲು ಸೂಚಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ಅವರ ಹೇಳಿಕೆಗಳನ್ನು ನಂಬಿ ಬಂಧನಕ್ಕೆ ಹೆದರಿ, ಶೇಷಾಚಲ ಅಕ್ಟೋಬರ್ 31 ರಂದು ತನ್ನ ಬ್ಯಾಂಕ್ ಖಾತೆಯಿಂದ ಯೆಸ್ ಬ್ಯಾಂಕ್ ಖಾತೆಗೆ ಆರ್ಟಿಜಿಎಸ್ ಮೂಲಕ 11 ಲಕ್ಷ ರೂ.ಗಳನ್ನು ವರ್ಗಾಯಿಸಿದರು. ನಂತರ, ನವೆಂಬರ್ 5 ರಂದು, ವಂಚಕರು ಒದಗಿಸಿದ ಬ್ಯಾಂಕ್ ಆಫ್ ಇಂಡಿಯಾ ಖಾತೆಗೆ ಆರ್ಟಿಜಿಎಸ್ ಮೂಲಕ ಮತ್ತೊಂದು 4,98,976 ರೂ.ಗಳನ್ನು ವರ್ಗಾಯಿಸಿದರು.
ಪೊಲೀಸ್ ಅಧಿಕಾರಿಗಳಂತೆ ನಟಿಸಿ ದೂರುದಾರರನ್ನು ಬಂಧಿಸುವುದಾಗಿ ಬೆದರಿಸುವ ಮೂಲಕ ಆರೋಪಿಗಳು ಒಟ್ಟು 15,98,976.40 ರೂ.ಗಳನ್ನು ವಂಚಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ದೂರಿನ ಆಧಾರದ ಮೇಲೆ ಉಡುಪಿ ಸೆನ್ ಅಪರಾಧ ಪೊಲೀಸ್ ಠಾಣೆ ಯಲ್ಲಿ ಪ್ರಕರಣ ದಾಖಲಾಗಿದೆ.