20 ವರ್ಷದಿಂದ ಒಂದೇ ಒಂದು ದಿನ ರಜೆ ತೆಗೆದುಕೊಳ್ಳದೇ ಮೋದಿ ದೇಶಕ್ಕಾಗಿ ದುಡಿದಿದ್ದಾರೆ - ಶಾ

•   Sat, May 25 2019 10:47:56 PM



• ಹೊಸದಿಲ್ಲಿ, ಮೇ25(Daijiworld News/SS): ಕಳೆದ 20 ವರ್ಷದಿಂದಲೂ ಒಂದೇ ಒಂದು ದಿನ ರಜೆ ತೆಗೆದುಕೊಳ್ಳದೇ ಮೋದಿ ದೇಶಕ್ಕಾಗಿ ದುಡಿದಿದ್ದಾರೆ ಎಂದು ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ತಿಳಿಸಿದರು.

  

  ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ಮತ್ತು ಎನ್‌ಡಿಎಗೆ ಜಯ ತಂದುಕೊಟ್ಟಿರುವ ನರೇಂದ್ರ ಮೋದಿ ಅವರು ದಣಿವಿಲ್ಲದೇ ದುಡಿಯುವ ನಾಯಕ. ಅವರನ್ನು ಅತಿ ಹತ್ತಿರದಿಂದ ನೋಡಿದ್ದೇನೆ. ಇಡೀ ದೇಶದಲ್ಲಿ ಇಷ್ಟೊಂದು ಮಟ್ಟದಲ್ಲಿ ಬಿಜೆಪಿ, ಎನ್‌ಡಿಎಗೆ ಜನರ ಬೆಂಬಲ ಸಿಗಬೇಕಾದರೆ ಅದು ಮೋದಿ ಅವರ ಐದು ವರ್ಷದ ಸ್ಪಷ್ಟ, ನಿಖರ, ಪಾರದರ್ಶಕ, ಭ್ರಷ್ಟಾಚಾರ ಮುಕ್ತ ಆಡಳಿತವೇ ಕಾರಣ ಎಂದು ಹರ್ಷ ವ್ಯಕ್ತಪಡಿಸಿದರು.

  2019ರಲ್ಲಿ ಮೋದಿ ಅಲೆ ಅಲ್ಲ, ಸುನಾಮಿಯೇ ಎದ್ದಿತು. ನಮ್ಮನ್ನು ತುಳಿಯಲು ಒಂದಾಗಿದ್ದ ಎಲ್ಲ ಪ್ರತಿಪಕ್ಷ ನಾಯಕರು ಕೊಚ್ಚಿ ಹೋದರು. ಇಲ್ಲಿ ಜನರು ಬೆಂಬಲ ಕೊಟ್ಟಿದ್ದು ಪ್ರಾಮಾಣಿಕ ನಾಯಕನಿಗೆ, ಆತನ ದೂರದೃಷ್ಟಿಯುಳ್ಳ, ಕೆಚ್ಚೆದೆಯ ನಿಲುವಿನ ಆಡಳಿತಕ್ಕೆ ಎಂದು ತಿಳಿಸಿದರು.

  ಯಾವುದೇ ಕಠಿಣ ನಿರ್ಧಾರ ತೆಗೆದುಕೊಳ್ಳಲು ಮೋದಿ ಹಿಂದೆ ಮುಂದೆ ನೋಡುವುದಿಲ್ಲ. ದೇಶದ ಅಭಿವೃದ್ಧಿಗೆ ಅಥವಾ ದೇಶ ರಕ್ಷಣೆ, ಭದ್ರತೆಗೆ ಸಂಬಂಧಿಸಿದ್ದಾದರೆ ಯಾವುದೇ ಸಮಯದಲ್ಲೂ ಹಿಂದೆ ಹೆಜ್ಜೆ ಇಡುವುದಿಲ್ಲ. ಗುಜರಾತ್ ಮುಖ್ಯಮಂತ್ರಿಯಾದಾಗಿನಿಂದ ನಾನು ಅವರನ್ನು ನೋಡಿದ್ದೇನೆ. ಒಂದೇ ಒಂದು ದಿನ ರಜೆ ತೆಗೆದುಕೊಳ್ಳದೇ ಮೋದಿ ತಮ್ಮ ಕರ್ತವ್ಯ ನಿಭಾಯಿಸಿದ್ದಾರೆ ಎಂದು ಹೇಳಿದರು.