ಭಾರೀ ಮಳೆಗೆ ಹಿಮಾಚಲ ಪ್ರದೇಶದಲ್ಲಿ 60ಕ್ಕೂ ಅಧಿಕ ರಸ್ತೆಗಳು ಬಂದ್

•   Sun, Sep 08 2024 04:50:51 PM



• ಶಿಮ್ಲಾ, ಸೆ.8(DaijiworldNews/AA): ಭಾರಿ ಮಳೆಯಿಂದಾಗಿ ಹಿಮಾಚಲ ಪ್ರದೇಶದಲ್ಲಿ 60ಕ್ಕೂ ಅಧಿಕ ರಸ್ತೆಗಳನ್ನು ಬಂದ್ ಮಾಡಲಾಗಿದೆ ಎಂದು ಅಧಿಕಾರಿಗಳು ಇಂದು ಹೇಳಿದ್ದಾರೆ.

  ಮಂಡಿಯಲ್ಲಿ ೩೧, ಶಿಮ್ಲಾ-ಮಂಡಿಯಲ್ಲಿ 13, ಕಂಗ್ರಾದಲ್ಲಿ 10, ಕಿನ್ನರ್‌ನಲ್ಲಿ 4, ಕುಲ್ಲುವಿನಲ್ಲಿ ೨ ಮತ್ತು ಉನಾ, ಸಿರ್ಮೌರ್ ಮತ್ತು ಲಾಹೌಲ್ ಮತ್ತು ಸ್ಪಿತಿ ಜಿಲ್ಲೆಗಳಲ್ಲಿ ತಲಾ ಒಂದು ರಸ್ತೆಗಳಲ್ಲಿ ವಾಹನ ಸಂಚಾರ ನಿರ್ಬಂಧಿಸಲಾಗಿದೆ. ರಾಷ್ಟ್ರೀಯ ಹೆದ್ದಾರಿ 5ನ್ನು (ಹಿಂದೂಸ್ತಾನ್-ಟಿಬೆಟ್ ರಸ್ತೆ) ಕಿನ್ನರ್ ಜಿಲ್ಲೆಯ ನೆಗುಲ್ತಾರಿ ಬಳಿ ಬಂದ್ ಮಾಡಲಾಗಿದೆ. ರಾಜ್ಯದಲ್ಲಿ 11 ವಿದ್ಯುತ್ ಮತ್ತು ಒಂದು ನೀರು ಸರಬರಾಜು ಯೋಜನೆಯೂ ಸ್ಥಗಿತಗೊಂಡಿದೆ ಎಂದು ರಾಜ್ಯ ತುರ್ತು ಕಾರ್ಯಾಚರಣೆ ಕೇಂದ್ರ (ಎಸ್‌ಇಒಸಿ) ಮಾಹಿತಿ ನೀಡಿದೆ.

  ನಿನ್ನೆ ಸಂಜೆಯಿಂದ ರಾಜ್ಯದ ವಿವಿಧೆಡೆ ಸಾಧಾರಣ ಮಳೆಯಾಗಿದೆ. ಊನದಲ್ಲಿ 4.8 ಸೆಂ.ಮೀ,ಕುಪ್ರಿಯಲ್ಲಿ 1.9 ಸೆಂ.ಮೀ, ಸಾಂಗ್ಲಾದಲ್ಲಿ 1.7 ಸೆಂ.ಮೀ, ಜುಬ್ಬರಹಟ್ಟಿಯಲ್ಲಿ 1.5 ಸೆಂ.ಮೀ, ಮಂಡಿಯಲ್ಲಿ 1.5 ಸೆಂ. ಮೀ ಮಳೆಯಾಗಿದೆ.

  ಹಿಮಾಚಲ ಪ್ರದೇಶದಲ್ಲಿ ಜೂನ್ 27 ರಿಂದ ಸೆಪ್ಟೆಂಬರ್ 7 ರವರೆಗೆ ಮಳೆ ಸಂಬಂಧಿತ ಅವಘಡಗಳಲ್ಲಿ ಒಟ್ಟು 158 ಜನ ಮೃತಪಟ್ಟಿದ್ದಾರೆ. 30 ಜನರು ನಾಪತ್ತೆಯಾಗಿದ್ದಾರೆ. ಅಂದಾಜು 1,305 ಕೋಟಿ ನಷ್ಟವಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.