ರೈಲು ಹತ್ತುವಾಗ ಆಯತಪ್ಪಿ ಫ್ಲ್ಯಾಟ್ ಫಾರ್ಮ್ ಕೆಳಗೆ ಬಿದ್ದ ಯುವತಿ; ಅಪಾಯದಿಂದ ಪಾರು

•   Mon, Nov 04 2024 02:20:32 PM



• ಕಣ್ಣೂರು, ನ.04(DaijiworldNews/AA): ರೈಲನ್ನು ಹತ್ತುವ ವೇಳೆ ಆಯತಪ್ಪಿ ಫ್ಲ್ಯಾಟ್ ಫಾರ್ಮ್ ಕೆಳಗೆ ಬಿದ್ದಿದ್ದ ಯುವತಿಯೊಬ್ಬಳು ಅಪಾಯದಿಂದ ಪಾರಾದ ಘಟನೆ ಕೇರಳದ ಕಣ್ಣೂರು ರೈಲ್ವೇ ನಿಲ್ದಾಣದಲ್ಲಿ ನಡೆದಿದೆ.

  ಘಟನೆಯ ದೃಶ್ಯ ರೈಲು ನಿಲ್ದಾಣದ ಸಿಸಿ ಕ್ಯಾಮೆರಾದಲ್ಲಿ ದಾಖಲಾಗಿದೆ. ಯುವತಿಯು ಪುದುಚ್ಚೇರಿ-ಮಂಗಳೂರು ರೈಲು ಹತ್ತಿದ್ದು, ತಲಶ್ಶೇರಿಯಿಂದ ಮಂಗಳೂರಿಗೆ ಪ್ರಯಾಣಿಸುತ್ತಿದ್ದಳು. ಆದರೆ ರೈಲು ಕೇವಲ ಮೂರು ನಿಮಿಷ ಮಾತ್ರ ನಿಲುಗಡೆಯಾಗಲಿದೆ ಎಂಬ ಬಗ್ಗೆ ಅರಿವಿರಲಿಲ್ಲ ಎನ್ನಲಾಗಿದೆ. ಹೀಗಾಗಿ ಅಂಗಡಿಯಲ್ಲಿ ತಿಂಡಿ ಖರೀದಿಸುತ್ತಿದ್ದ 19 ರ ಹರೆಯದ ಇರಿಟ್ಟಿ ಮೂಲದ ಯುವತಿಗೆ ತಾನು ಹೋಗಬೇಕಿದ್ದ ರೈಲು ಚಲಿಸುತ್ತಿರುವುದು ಗಮನಕ್ಕೆ ಬಂದಿದೆ.

  ಕೂಡಲೇ ಓಡಿಕೊಂಡು ಹೋಗಿ ರೈಲು ಹತ್ತಲು ಯತ್ನಿಸಿದ್ದಾಳೆ. ಆದರೆ ಆಯತಪ್ಪಿ ಫ್ಲ್ಯಾಟ್ ಫಾರ್ಮ್ ಕೆಳಗೆ ಬಿದ್ದಿದ್ದಾಳೆ. ಸದ್ಯ ಅದೃಷ್ಟವಶಾತ್ ಯುವತಿ ಅಪಾಯದಿಂದ ಪಾರಾಗಿದ್ದಾಳೆ. ಯುವತಿಯನ್ನು ಸ್ಥಳೀಯ ಜಿಲ್ಲಾಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಿ, ನಂತರ ಬೇರೆ ರೈಲಿನಲ್ಲಿ ಮಂಗಳೂರಿಗೆ ಪ್ರಯಾಣ ಬೆಳೆಸಿದ್ದಾರೆ.