ತಂದೆಯನ್ನು ಕಡಿದು ಕೊಂದ ಯುವ ವಕೀಲ - ತಾಯಿಯ ಸ್ಥಿತಿ ಗಂಭೀರ

•   Mon, Dec 01 2025 01:45:38 PM



• ಆಲಪ್ಪುಳ, ಡಿ. 01 (DaijiworldNews/TA): ಕಾಯಂಕುಲಂ ಸಮೀಪದ ಕಲರಿಕ್ಕಲ್‌ನಲ್ಲಿ ಭಾನುವಾರ ರಾತ್ರಿ ಸಂಭವಿಸಿದ ದಾರುಣ ಘಟನೆಯಲ್ಲಿ ವೃತ್ತಿಯಲ್ಲಿ ವಕೀಲನಾಗಿರುವ ಮಗನೊಬ್ಬ ತನ್ನ ತಂದೆಯನ್ನು ಮಚ್ಚಿನಿಂದ ಕಡಿದು ಕೊಂದು, ತಾಯಿಯನ್ನು ತೀವ್ರವಾಗಿ ಗಾಯಗೊಳಿಸಿದ್ದಾನೆ. ಆರೋಪಿ ನವಜಿತ್ (30) ನನ್ನು ಪೊಲೀಸರು ಬಂಧಿಸಿದ್ದು, ಪ್ರಕರಣಕ್ಕೆ ಸಂಬಂಧಿಸಿದ ತನಿಖೆ ಆರಂಭಿಸಲಾಗಿದೆ. ಮದ್ಯವ್ಯಸನಕ್ಕೆ ಒಳಗಾಗಿದ್ದ ಮಗನನ್ನು ತಂದೆ ಪ್ರಶ್ನಿಸಿದ್ದಕ್ಕಾಗಿ ವಕೀಲ ಮಗ ತನ್ನ ತಂದೆಯನ್ನೇ ಹತ್ಯೆ ಮಾಡಿದ್ದಾನೆ ಎಂದು ಸ್ಥಳೀಯ ಮೂಲಗಳು ತಿಳಿಸಿವೆ.

  

  

  

  

  ಪೀಡಿಕಚಿರಾದ ನಿವಾಸಿ ನಟರಾಜನ್ (63) ಹಾಗೂ ಅವರ ಪತ್ನಿ ಸಿಂಧು (48) ಮೇಲೆ ರಾತ್ರಿ ಸುಮಾರು 8.30ರ ವೇಳೆಗೆ ದಾಳಿ ನಡೆದಿದೆ. ಕುಟುಂಬ ಕಲಹವೇ ಹಲ್ಲೆಗೆ ಕಾರಣ ಎಂಬುದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ. ಮಚ್ಚಿನಿಂದ ಇಬ್ಬರ ಮೇಲೂ ನವಜಿತ್ ಕ್ರೂರ ದಾಳಿ ನಡೆಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

  ಕಿರುಚಾಟದ ಶಬ್ದ ಕೇಳಿ ಸ್ಥಳಕ್ಕೆ ಧಾವಿಸಿದ ಸ್ಥಳೀಯರಿಗೆ, ನವಜಿತ್ ಮನೆಯ ಹೊರಗೆ ರಕ್ತಸಿಕ್ತ ಮಚ್ಚು ಹಿಡಿದು ನಿಂತಿರುವುದು ಕಂಡುಬಂದಿದೆ. ಮನೆಯೊಳಗೆ ನಟರಾಜನ್ ಮತ್ತು ಸಿಂಧು ರಕ್ತದ ಮಡುವಿನಲ್ಲಿ ಬಿದ್ದಿರುವುದನ್ನು ನೋಡಿ ತಕ್ಷಣ ಅವರನ್ನು ಕಾಯಂಕುಲಂ ತಾಲೂಕು ಆಸ್ಪತ್ರೆಗೆ ಸಾಗಿಸಲಾಯಿತು. ನಂತರ ಚಿಕಿತ್ಸೆಗೆ ಮಾವೆಲಿಕ್ಕರದ ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಲಾಯಿತಾದರೂ ನಟರಾಜನ್ ಅವರ ಪ್ರಾಣ ಉಳಿಸಲಾಗಲಿಲ್ಲ. ಸಿಂಧು ಅವರ ಸ್ಥಿತಿ ಇನ್ನೂ ಗಂಭೀರವಾಗಿದೆ.

  ಘಟನೆಯ ನಂತರ ಪೊಲೀಸರು ನವಜಿತ್‌ನನ್ನು ವಶಕ್ಕೆ ಪಡೆದಿದ್ದಾರೆ. ಹತ್ಯೆ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ದಾಳಿಯ ನಿಖರ ಕಾರಣ, ಕುಟುಂಬ ಕಲಹದ ಸ್ವರೂಪ ಹಾಗೂ ಆರೋಪಿಯ ಮಾನಸಿಕ ಸ್ಥಿತಿ ಕುರಿತು ವಿವರವಾದ ತನಿಖೆ ನಡೆಸುತ್ತಿದ್ದಾರೆ. ಈ ಘಟನೆಯಿಂದ ಪ್ರದೇಶದಲ್ಲಿ ಆತಂಕದ ವಾತಾವರಣ ನಿರ್ಮಾಣವಾಗಿದ್ದು, ಪೊಲೀಸರು ಭದ್ರತೆ ಹೆಚ್ಚಿಸಿದ್ದಾರೆ.