ಚಿಕ್ಕಮಗಳೂರು: ಭೀಕರ ಅಪಘಾತದಲ್ಲಿ ಮಂಗಳೂರಿನ ಮಹಿಳೆ ಸಾವು - 6 ಮಂದಿಗೆ ಗಾಯ

•   Mon, Jul 08 2019 08:39:49 AM



• ಚಿಕ್ಕಮಗಳೂರು, ಜು08(Daijiworld News/SS): ಕಾರೊಂದು ಬಾಬಾ ಬುಡನ್‍ಗಿರಿಯ ಸಮೀಪ ರಸ್ತೆ ಬದಿಯ ಕಂದಕಕ್ಕೆ ಉರುಳಿದ್ದು, ಘಟನೆಯಲ್ಲಿ ಓರ್ವ ಮಹಿಳೆ ಮೃತಪಟ್ಟು, ಆರು ಮಂದಿ ಗಾಯಗೊಂಡಿರುವ ದಾರುಣ ಘಟನೆಯೊಂದು ವರದಿಯಾಗಿದೆ.

  

  

   

  ಮೃತ ಮಹಿಳೆಯನ್ನು ಮಂಗಳೂರಿನ ಮಂಜನಾಡಿ ಸಮೀಪದ ತೌಡುಗೋಳಿ ನಿವಾಸಿ ಸಮೀರಾ ಬಾನು(35) ಎಂದು ಗುರುತಿಸಲಾಗಿದೆ.

  ಕುಟುಂಬಸ್ಥರು ಮಂಗಳೂರಿನಿಂದ ಮಾರುತಿ ಸ್ವಿಪ್ಟ್ ಕಾರಿನಲ್ಲಿ ಚಿಕ್ಕಮಗಳೂರಿನ ಬಾಬಾ ಬುಡನ್‍ಗಿರಿಗೆ ಪ್ರವಾಸಕ್ಕೆ ತೆರಳಿದ್ದು, ಪ್ರವಾಸ ಮುಗಿಸಿ ಹಿಂದಿರುಗುತ್ತಿದ್ದ ವೇಳೆ ಕಾರು ಗಿರಿ ಸಮೀಪದ ಮಾಣಿಕ್ಯಧಾರಾ ಎಂಬಲ್ಲಿನ ತಿರುವಿನಲ್ಲಿ ಕಂದಕಕ್ಕೆ ಉರುಳಿ ಬಿದ್ದು ಅಪಘಾತ ಸಂಭವಿಸಿದೆ ಎಂದು ತಿಳಿದು ಬಂದಿದೆ. ಘಟನೆಯಲ್ಲಿ ಸಮೀರಾ ಮೃತಪಟ್ಟರೆ, ಸಮೀರಾ ಪತಿ ಅಬೂಬಕರ್, ಪುತ್ರ ಬಾಸಿತ್, ಪುತ್ರಿಯರಾದ ಸಲ್ವಾ, ಆಯಿಷಾ, ಅಬೂಬಕರ್ ಸಹೋದರಿ ಜಲಾನಿ ಹಾಗೂ ಫಾತಿಮಾ ಅಪಘಾತದಲ್ಲಿ ಗಾಯಗೊಂಡಿದ್ದಾರೆ.

  ಘಟನೆಯಲ್ಲಿ ಗಾಯಗೊಂಡವರನ್ನು ಚಿಕ್ಕಮಗಳೂರು ನಗರದ ಜಿಲ್ಲಾಸ್ಪತ್ರೆಗೆ ದಾಖಲಿಸಿ, ನಂತರ ಹೆಚ್ಚಿನ ಚಿಕಿತ್ಸೆಗೆ ಮಂಗಳೂರಿಗೆ ಕರೆದೊಯ್ಯಲಾಗಿದೆ.

  ಚಿಕ್ಕಮಗಳೂರು ಗ್ರಾಮಾಂತರ ಠಾಣೆಯ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.