'ಭಾರತದಲ್ಲಿನ ಸುಧಾರಣೆಗಳು ಎಕ್ಸ್​ಪ್ರೆಸ್​ ರೈಲಿನ ವೇಗದಲ್ಲಿ ಓಡುತ್ತಿವೆ' - ಪ್ರಧಾನಿ ಮೋದಿ

•   Tue, Dec 09 2025 03:15:04 PM



• ನವದೆಹಲಿ, ಡಿ. 09 (DaijiworldNews/ TA): ಭಾರತದಲ್ಲಿ ನಡೆಯುತ್ತಿರುವ ಸುಧಾರಣೆಗಳ ವೇಗ ಈಗ ಎಕ್ಸ್‌ಪ್ರೆಸ್ ರೈಲಿನಂತೆ ಜೋರಾಗಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಎನ್‌ಡಿಎ ಸಂಸದೀಯ ಪಕ್ಷದ ಸಭೆಯಲ್ಲಿ ಹೇಳಿದ್ದಾರೆ. ನಡೆಯುತ್ತಿರುವ ಪರಿವರ್ತನೆಯನ್ನು ಅವರು ‘ರಿಫಾರ್ಮ್ ಎಕ್ಸ್‌ಪ್ರೆಸ್’ ಎಂದು ವರ್ಣಿಸಿದ್ದು, ಈ ಎಕ್ಸ್‌ಪ್ರೆಸ್ ದೇಶದ ಪ್ರತಿಯೊಂದು ಮನೆ ಬಾಗಿಲಿಗೂ ತಲುಪಿ ನಾಗರಿಕರ ನಿತ್ಯಕಷ್ಟಗಳನ್ನು ನಿವಾರಿಸುವ ಗುರಿಯೊಂದಿಗೆ ಚಲಿಸುತ್ತಿದೆ ಎಂದು ತಿಳಿಸಿದ್ದಾರೆ.

  

  ಸರ್ಕಾರದ ಸುಧಾರಣೆಗಳು ಕೇವಲ ಆರ್ಥಿಕ ವೃದ್ಧಿಯತ್ತ ಮಾತ್ರ ಕೇಂದ್ರೀಕೃತವಾಗಿಲ್ಲ, ಅವು ಸಂಪೂರ್ಣವಾಗಿ ನಾಗರಿಕ ಕೇಂದ್ರಿತವಾಗಿವೆ ಎಂದು ಪ್ರಧಾನಿ ಸ್ಪಷ್ಟಪಡಿಸಿದರು. “ಸಾಮಾನ್ಯ ನಾಗರಿಕರ ದೈನಂದಿನ ತೊಂದರೆಗಳನ್ನು ಕಡಿಮೆ ಮಾಡುವುದು ನಮ್ಮ ಅತ್ಯಂತ ಪ್ರಮುಖ ಗುರಿ” ಎಂದು ಸಂಸದರಿಗೆ ಹಿತವಚನ ನೀಡಿದರು. ಜನರ ನೈಜ ಸಮಸ್ಯೆಗಳನ್ನು ಪರಿಹರಿಸಿ, ಅವರ ಸಾಮರ್ಥ್ಯವನ್ನು ಹೆಚ್ಚು ಪರಿಣಾಮಕಾರಿ ದಿಕ್ಕಿನಲ್ಲಿ ಬಳಸುವಂತೆ ಸುಧಾರಣೆಗಳು ರೂಪಗೊಳ್ಳುತ್ತಿವೆ ಎಂದರು.

  ಪ್ರಧಾನಿ ಮೋದಿ ಸಂಸದರಿಗೆ ತಮ್ಮ ಕ್ಷೇತ್ರಗಳಲ್ಲಿ ಜನರು ಎದುರಿಸುತ್ತಿರುವ ನಿಜವಾದ ಸಮಸ್ಯೆಗಳನ್ನು ನೇರವಾಗಿ ಆಲಿಸುವಂತೆ ಸೂಚಿಸಿ, ಅದನ್ನಾಧರಿಸಿ ನೀತಿಗಳನ್ನು ರೂಪಿಸುವುದು ಸರ್ಕಾರದ ಮುಂದಿನ ಹಂತವಾಗಲಿದೆ ಎಂದು ತಿಳಿಸಿದರು. ಸಭೆಯಲ್ಲಿ ಹಾಜರಾದ ನಾಯಕರು, ಮೋದಿಯವರ ಭಾಷಣವನ್ನು ಮೂರನೇ ಅವಧಿಯ ಸರ್ಕಾರದ ಸ್ಪಷ್ಟ ಮಾರ್ಗಸೂಚಿ ಮತ್ತು ಭವಿಷ್ಯದ ಸುಧಾರಣಾ ದೃಷ್ಟಿಕೋನ ಎಂದು ವಿವರಿಸಿದರು. ಮುಂಬರುವ ದಿನಗಳಲ್ಲಿ ಮತ್ತಷ್ಟು ಡಿಜಿಟಲೀಕರಣ, ಅಧಿಕಾರಶಾಹಿಯ ಶಿಥಿಲೀಕರಣ ಮತ್ತು ಪ್ರಜಾಕೇಂದ್ರಿತ ಆಡಳಿತ ವಿಧಾನಗಳನ್ನು ಕಾಣಬಹುದಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.

  ಸಭೆಯಲ್ಲಿ ಕೇಂದ್ರ ಸಚಿವ ಅಶ್ವಿನಿ ವೈಷ್ಣವ್, ಎಸ್‌. ಜೈಶಂಕರ್, ಎಲ್. ಮುರುಗನ್, ಜಿಡಿಯು ಸಂಸದ ಸಂಜಯ್ ಝಾ, ಎನ್‌ಸಿಪಿ ನಾಯಕ ಪ್ರಫುಲ್ ಪಟೇಲ್ ಸೇರಿದಂತೆ ಹಲವು ಹಿರಿಯ ನಾಯಕರು ಹಾಜರಿದ್ದರು.