ಜರ್ಮನಿಯ ಮಹತ್ವದ ಘೋಷಣೆ - ಭಾರತೀಯರಿಗೆ ವೀಸಾ ಮುಕ್ತ ಟ್ರಾನ್ಸಿಟ್ ಸೌಲಭ್ಯ

•   Mon, Jan 12 2026 05:07:31 PM



• ಅಹಮ್ಮದಾಬಾದ್, ಜ. 12 (DaijiworldNews/TA): ಜರ್ಮನಿ ಫೆಡರಲ್ ಚಾನ್ಸಿಲರ್ ಫೆಡ್ರಿಕ್ ಮೆರ್ಜ್ ಅವರ ಭಾರತ ಪ್ರವಾಸದ ಸಂದರ್ಭದಲ್ಲಿ ಭಾರತ ಮತ್ತು ಜರ್ಮನಿ ನಡುವಿನ ದ್ವಿಪಕ್ಷೀಯ ಸಂಬಂಧಗಳು ಮತ್ತಷ್ಟು ಬಲಗೊಂಡಿವೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಚಾನ್ಸಿಲರ್ ಮೆರ್ಜ್ ಇಂದು ಅಹಮ್ಮದಾಬಾದ್‌ನಲ್ಲಿ ಭೇಟಿಯಾಗಿ ದೀರ್ಘಕಾಲದ ದ್ವಿಪಕ್ಷೀಯ ಮಾತುಕತೆ ನಡೆಸಿದ್ದು, ವ್ಯಾಪಾರ, ಭದ್ರತೆ, ಮಾನವ ಸಂಪನ್ಮೂಲ ವಿನಿಮಯ ಸೇರಿದಂತೆ ಹಲವು ಮಹತ್ವದ ಒಪ್ಪಂದಗಳಿಗೆ ಸಹಿ ಹಾಕಲಾಗಿದೆ.

  

  ಈ ಮಾತುಕತೆಗಳಲ್ಲಿ ಉಭಯ ರಾಷ್ಟ್ರಗಳು ಜಂಟಿಯಾಗಿ ಕೈಗೊಳ್ಳಬೇಕಾದ ಹಲವು ತಂತ್ರಾತ್ಮಕ ನಿರ್ಣಯಗಳ ಕುರಿತು ಚರ್ಚೆ ನಡೆಸಿವೆ. ಈ ಒಪ್ಪಂದಗಳ ಪೈಕಿ ಭಾರತೀಯರ ಗಮನಸೆಳೆದ ಪ್ರಮುಖ ನಿರ್ಣಯವೆಂದರೆ ಜರ್ಮನಿಯ ಮೂಲಕ ಇತರ ದೇಶಗಳಿಗೆ ಪ್ರಯಾಣಿಸುವ ಭಾರತೀಯರಿಗೆ ವೀಸಾ ಮುಕ್ತ ಟ್ರಾನ್ಸಿಟ್ ಸೌಲಭ್ಯ ಒದಗಿಸುವ ಒಪ್ಪಂದವಾಗಿದೆ.

  ಈ ಹೊಸ ಒಪ್ಪಂದದಂತೆ, ಭಾರತೀಯರು ಜರ್ಮನಿ ವಿಮಾನ ನಿಲ್ದಾಣಗಳ ಮೂಲಕ ಅಮೆರಿಕ, ಕೆನಡಾ ಸೇರಿದಂತೆ ಇತರ ದೇಶಗಳಿಗೆ ಪ್ರಯಾಣಿಸುವಾಗ ಪ್ರತ್ಯೇಕವಾಗಿ ಜರ್ಮನಿಯ ಟ್ರಾನ್ಸಿಟ್ ವೀಸಾ ಪಡೆಯುವ ಅಗತ್ಯವಿರುವುದಿಲ್ಲ. ಇದರಿಂದ ಜರ್ಮನಿಯನ್ನು ಟ್ರಾನ್ಸಿಟ್ ಹಬ್ ಆಗಿ ಬಳಸುವ ಭಾರತೀಯ ಪ್ರಯಾಣಿಕರಿಗೆ ಸಮಯ ಮತ್ತು ವೆಚ್ಚ ಎರಡೂ ಉಳಿಯಲಿದೆ. ಈ ಸೌಲಭ್ಯ ವಿಶೇಷವಾಗಿ ಭಾರತೀಯ ಪ್ರಯಾಣಿಕರಿಗೆ ಮಾತ್ರ ಅನ್ವಯವಾಗಲಿದೆ.

  ಆದರೆ, ಟ್ರಾನ್ಸಿಟ್ ವೀಸಾ ಮುಕ್ತ ಪ್ರಯಾಣ ಮಾಡುವ ಭಾರತೀಯರು ಜರ್ಮನಿಯ ಅಂತಾರಾಷ್ಟ್ರೀಯ ಟ್ರಾನ್ಸಿಟ್ ವಲಯದಲ್ಲೇ ಉಳಿಯಬೇಕು. ಆ ವಲಯದ ಹೊರಗೆ ತೆರಳುವ ಅವಕಾಶ ಇರುವುದಿಲ್ಲ. ಜೊತೆಗೆ, ಪ್ರಯಾಣದ ಅಂತಿಮ ಗಮ್ಯಸ್ಥಾನದ ಮಾನ್ಯ ವೀಸಾ ಮತ್ತು ಸಂಬಂಧಿಸಿದ ಪ್ರಯಾಣ ದಾಖಲೆಗಳು ಕಡ್ಡಾಯವಾಗಿರಬೇಕು. ಉದಾಹರಣೆಗೆ ಅಮೆರಿಕಕ್ಕೆ ಪ್ರಯಾಣಿಸುವವರಾದರೆ, ಅಮೆರಿಕ ವೀಸಾ ಹಾಗೂ ಟಿಕೆಟ್ ಸೇರಿದಂತೆ ಎಲ್ಲಾ ದಾಖಲೆಗಳು ಸಿದ್ಧವಾಗಿರಬೇಕು.

  ಇದೇ ವೇಳೆ, ಜರ್ಮನಿ ಎದುರಿಸುತ್ತಿರುವ ಕಾರ್ಮಿಕ ಕೊರತೆಯನ್ನು ನೀಗಿಸುವ ಉದ್ದೇಶದಿಂದ ಭಾರತ ಜತೆಗೆ ಮತ್ತೊಂದು ಮಹತ್ವದ ಒಪ್ಪಂದಕ್ಕೂ ಸಹಿ ಹಾಕಲಾಗಿದೆ. ಈ ಒಪ್ಪಂದದಡಿ ಜರ್ಮನಿ ಭಾರತದ ಐಟಿ ಎಂಜಿನಿಯರ್‌ಗಳು, ಆರೋಗ್ಯ ಕ್ಷೇತ್ರದ ಕಾರ್ಯಕರ್ತರು ಸೇರಿದಂತೆ ನಿಪುಣ ವೃತ್ತಿಪರರನ್ನು ನೇಮಕ ಮಾಡಿಕೊಳ್ಳಲು ಉತ್ಸುಕವಾಗಿದೆ. ಇದರಿಂದ ಭಾರತೀಯ ವಿದ್ಯಾರ್ಥಿಗಳು ಹಾಗೂ ವೃತ್ತಿಪರರಿಗೆ ಯಾವುದೇ ಅಡೆತಡೆ ಇಲ್ಲದೆ ಜರ್ಮನಿಗೆ ತೆರಳುವ ಅವಕಾಶಗಳು ಹೆಚ್ಚಾಗಲಿವೆ.

  ಒಟ್ಟಿನಲ್ಲಿ, ಪ್ರಧಾನಿ ಮೋದಿ ಮತ್ತು ಚಾನ್ಸಿಲರ್ ಮೆರ್ಜ್ ನಡುವಿನ ಈ ದ್ವಿಪಕ್ಷೀಯ ಭೇಟಿಯು ಭಾರತ–ಜರ್ಮನಿ ಸಂಬಂಧಗಳಿಗೆ ಹೊಸ ಆಯಾಮ ನೀಡಿದ್ದು, ವ್ಯಾಪಾರ, ಪ್ರಯಾಣ, ಉದ್ಯೋಗ ಹಾಗೂ ತಂತ್ರಾತ್ಮಕ ಸಹಕಾರ ಕ್ಷೇತ್ರಗಳಲ್ಲಿ ಮಹತ್ವದ ಮುನ್ನಡೆಯಾಗಿ ಪರಿಗಣಿಸಲಾಗುತ್ತಿದೆ.