ಟ್ರಕ್ ಚಾಲಕನ ಮಗಳು ಐಎಎಸ್‌ ಆದ ಸ್ಪೂರ್ತಿದಾಯಕ ಕಥೆ

•   Tue, Feb 17 2026 08:22:49 AM



• ನವದೆಹಲಿ, ಫೆ. 17 (DaijiworldNews/TA): ಕೊರತೆ, ಆರ್ಥಿಕ ಸಂಕಷ್ಟ ಮತ್ತು ಅನಿಶ್ಚಿತತೆಯಿಂದ ಕೂಡಿದ ಬದುಕಿನಿಂದ ಶಿಖರಕ್ಕೇರಲು ಅಪಾರ ಧೈರ್ಯ ಬೇಕು. ಆ ಧೈರ್ಯವನ್ನು ಬದುಕಿನ ತತ್ತ್ವವಾಗಿಸಿಕೊಂಡವರು ಆಂಧ್ರಪ್ರದೇಶದ ತಿರುಪತಿಯ ದಾಸರಿ ಇಂದುಮತಿ. ಟ್ರಕ್ ಚಾಲಕನ ಮಗಳಾದ ಅವರು, ದೃಢನಿಶ್ಚಯ ಮತ್ತು ಶಿಸ್ತಿನ ಮೂಲಕ ತಮ್ಮ ಹಣೆಬರಹವನ್ನು ತಾವೇ ಬರೆದಿದ್ದಾರೆ.

  ತಿರುಪತಿಯಲ್ಲಿ ಜನಿಸಿ ಬೆಳೆದ ಇಂದುಮತಿ ಸರ್ಕಾರಿ ಶಾಲೆಯಲ್ಲಿ ವಿದ್ಯಾಭ್ಯಾಸ ಮಾಡಿದರು. ಸಂಪನ್ಮೂಲಗಳ ಕೊರತೆ ಇದ್ದರೂ, ಅವರ ಸಂಕಲ್ಪ ಎಂದಿಗೂ ಕುಂದಲಿಲ್ಲ. ಅವರ ತಂದೆ ತಿರುಮಲ ತಿರುಪತಿ ದೇವಸ್ಥಾನಂ (ಟಿಟಿಡಿ) ಯಲ್ಲಿ ಗುತ್ತಿಗೆ ಆಧಾರಿತ ಟ್ರಕ್ ಚಾಲಕರಾಗಿ ಕೆಲಸ ಮಾಡುತ್ತಿದ್ದರು. ಮನೆಯ ಮಾಸಿಕ ಖರ್ಚುಗಳನ್ನು ಪೂರೈಸುವುದೇ ದೊಡ್ಡ ಸವಾಲಾಗಿತ್ತು. ತಿಂಗಳ ಕೊನೆಯಲ್ಲಿ ದಿನಸಿ ಸಾಮಗ್ರಿಗಳ ಬಗ್ಗೆ ಚಿಂತೆ ಸಾಮಾನ್ಯವಾಗಿತ್ತು.

  ಆದರೂ, ಇಂತಹ ಹಿನ್ನೆಲೆಯ ನಡುವೆಯೂ ಇಂದುಮತಿ ತಮ್ಮ ಕನಸುಗಳನ್ನು ಬಿಟ್ಟುಕೊಡಲಿಲ್ಲ. ವಿದೇಶದಲ್ಲಿ ಉತ್ತಮ ಅವಕಾಶ ಸಿಕ್ಕಿದ್ದರೂ, ದೇಶದಲ್ಲೇ ಉಳಿದು ದೇಶ ಸೇವೆ ಮಾಡುವುದೇ ತಮ್ಮ ಗುರಿ ಎಂದು ನಿರ್ಧರಿಸಿದರು. ಇಂದುಮತಿಯ ಶೈಕ್ಷಣಿಕ ಪಯಣ ಟಿಟಿಡಿ ಕಪಿಲೇಶ್ವರ ಶಾಲೆಯಲ್ಲಿ ಆರಂಭವಾಯಿತು. ಬಳಿಕ ತಿರುಪತಿ ಸರ್ಕಾರಿ ಪಾಲಿಟೆಕ್ನಿಕ್ ಕಾಲೇಜು ಮತ್ತು ನಂತರ ಗುಂಟೂರಿನ ಎನ್‌ಆರ್‌ಐ ಕಾಲೇಜಿನಲ್ಲಿ ಬಿಟೆಕ್ ಪೂರ್ಣಗೊಳಿಸಿದರು. ಸೀಮಿತ ಸೌಲಭ್ಯಗಳ ನಡುವೆಯೂ ಅವರು ಚಿನ್ನದ ಪದಕದೊಂದಿಗೆ ಪದವಿ ಪಡೆದರು.

  ಬಿಟೆಕ್ ನಂತರ ಬೋಸ್ಟನ್‌ನ ಕಂಪನಿಯಿಂದ ಸುಮಾರು 10 ಲಕ್ಷ ರೂ. ಸಂಬಳದ ಆಕರ್ಷಕ ಉದ್ಯೋಗ ಪ್ರಸ್ತಾಪ ಬಂದಿತ್ತು. ಆದರೂ, ಸರ್ಕಾರಿ ಸೇವೆಯ ಮೂಲಕ ಸಮಾಜಕ್ಕೆ ಹೆಚ್ಚು ಕೊಡುಗೆ ನೀಡಬಹುದು ಎಂಬ ನಂಬಿಕೆಯಿಂದ ಅವರು ಆ ಅವಕಾಶವನ್ನು ತಿರಸ್ಕರಿಸಿದರು. ಅವರ ಪೋಷಕರು ಸದಾ ಅವರೊಂದಿಗೆ ನಿಂತು ಭಾವನಾತ್ಮಕ ಬೆಂಬಲ ನೀಡಿದರು. ತಮ್ಮ ಕಷ್ಟಗಳನ್ನೂ ಮರೆತು, ಮಗಳ ಶಿಕ್ಷಣಕ್ಕೆ ಅಡ್ಡಿಯಾಗದಂತೆ ನೋಡಿಕೊಂಡರು.

  ಇಂದುಮತಿ ದೆಹಲಿಯಲ್ಲಿ ಐಇಎಸ್ ಪರೀಕ್ಷೆಗೆ ತಯಾರಿ ನಡೆಸುವ ಇಚ್ಛೆಯನ್ನು ವ್ಯಕ್ತಪಡಿಸಿದಾಗ, ಅವರ ಮಾರ್ಗದರ್ಶಕರು ಹಿಂಜರಿಕೆಯಿಲ್ಲದೆ ಅವರನ್ನು ಪ್ರೋತ್ಸಾಹಿಸಿದರು. ಹಣಕಾಸಿನ ತೊಂದರೆಗಳು ಒಂದು ಸವಾಲಾಗಿಯೇ ಉಳಿದವು, ಆದರೆ ಸಂಬಂಧಿಕರು ಮತ್ತು ಹಿತೈಷಿಗಳು ಮುಂದೆ ಬಂದು ತರಬೇತಿ ಮತ್ತು ಜೀವನ ವೆಚ್ಚಗಳಿಗಾಗಿ ಸುಮಾರು 1.5 ಲಕ್ಷ ರೂ.ಗಳನ್ನು ನೀಡಿದರು. ಈ ಬೆಂಬಲವು ಅವರಿಗೆ ವರವಾಯಿತು.

  ಸೌಲಭ್ಯಗಳ ಕೊರತೆಯನ್ನು ಅಡ್ಡಿಯೆಂದು ನೋಡದೇ, ಮೂಲಭೂತ ಅಂಶಗಳನ್ನು ಬಲಪಡಿಸಿಕೊಂಡು ಮುಂದುವರಿದ ಅವರು, ಯುಪಿಎಸ್‌ಸಿ ಇಂಡಿಯನ್ ಎಂಜಿನಿಯರಿಂಗ್ ಸರ್ವೀಸಸ್ (ಐಇಎಸ್) ಪರೀಕ್ಷೆಯಲ್ಲಿ ಮೊದಲ ಪ್ರಯತ್ನದಲ್ಲೇ 75ನೇ ರ‍್ಯಾಂಕ್ ಗಳಿಸಿದರು. ಈ ಸಾಧನೆ ಅನೇಕರನ್ನು ಆಶ್ಚರ್ಯಚಕಿತರನ್ನಾಗಿಸಿತು.

  ಸರ್ಕಾರಿ ಶಾಲೆಯ ತರಗತಿಯಲ್ಲಿ ಚಾಪೆಯ ಮೇಲೆ ಕುಳಿತು ಓದಿದ ಹುಡುಗಿಯಿಂದ ದೇಶದ ಪ್ರಮುಖ ಸ್ಪರ್ಧಾತ್ಮಕ ಪರೀಕ್ಷೆಯಲ್ಲಿ ಯಶಸ್ಸು ಸಾಧಿಸಿದ ಅಧಿಕಾರಿ ತನಕದ ಈ ಪಯಣ ನಿಜಕ್ಕೂ ಸ್ಫೂರ್ತಿದಾಯಕ. ಇಂದುಮತಿ ಅವರ ಸಾಧನೆ ಕೇವಲ ಪರೀಕ್ಷೆಯಲ್ಲಿ ಉತ್ತೀರ್ಣರಾಗುವುದಲ್ಲ, ಅದು ಸ್ಥೈರ್ಯ, ತ್ಯಾಗ ಮತ್ತು ಆತ್ಮವಿಶ್ವಾಸದ ಪ್ರತೀಕವಾಗಿದೆ.