ಹೈದರಾಬಾದ್ ಬಿರಿಯಾನಿ ರೆಸ್ಟೋರೆಂಟ್‌ಗಳ ಆಡಿಟ್‌ನಲ್ಲಿ 70,000 ಕೋಟಿ ತೆರಿಗೆ ವಂಚನೆ

•   Fri, Feb 20 2026 02:58:13 PM



• ಹೈದರಾಬಾದ್, ಫೆ. 20 (DaijiworldNews/AA): ಎಐ ಸಹಾಯದಿಂದಾಗಿ ದೇಶದಲ್ಲಿ ರೆಸ್ಟೋರೆಂಟ್‌ಗಳು ನಡೆಸುತ್ತಿದ್ದ ಭಾರೀ ಅಕ್ರಮವನ್ನು ಆದಾಯ ತೆರಿಗೆ ಇಲಾಖೆ ಬಯಲಿಗೆಳೆದಿದೆ. 60,000 ಜಿಬಿ ಡೇಟಾವನ್ನು ಪರಿಶೀಲಿಸಿದ ಎಐ 70,000 ಕೋಟಿ ರೂ. ಅಕ್ರಮವನ್ನು ಪತ್ತೆ ಮಾಡಿದೆ.

  ಕಳೆದ ವರ್ಷದ ಕೊನೆಯಲ್ಲಿ ಆದಾಯ ತೆರಿಗೆ ಇಲಾಖೆಯ ಅಧಿಕಾರಿಗಳು ಹೈದರಾಬಾದ್‌ನ ಕೆಲವು ಜನಪ್ರಿಯ ಬಿರಿಯಾನಿ ರೆಸ್ಟೋರೆಂಟ್‌ಗಳಿಗೆ ನಿಯಮಿತ ತಪಾಸಣೆಗೆಂದು ತೆರಳಿದ್ದಾರೆ. ಈ ರೆಸ್ಟೋರೆಂಟ್‌ಗಳಲ್ಲಿ ಗ್ರಾಹಕರು ಆಹಾರ ಸೇವಿಸುತ್ತಿದ್ದರು ಮತ್ತು ಬಿಲ್ಲಿಂಗ್ ಕೌಂಟರ್ ಎಂದಿನಂತೆ ಕಾರ್ಯನಿರ್ವಹಿಸುತ್ತಿತ್ತು. ಮೇಲ್ನೋಟಕ್ಕೆ ಎಲ್ಲ ವ್ಯವಹಾರ ಸರಿಯಾಗಿ ನಡೆಯುವಂತೆ ತೋರಿದರೂ ಬಿಲ್ಲಿಂಗ್ ವ್ಯವಸ್ಥೆಯಲ್ಲಿ ದೋಷ ಇದ್ದಂತೆ ಕಾಣಿಸಿದೆ. ರೆಸ್ಟೋರೆಂಟ್ ಗೆ ಬರುವ ಗ್ರಾಹಕರ ಸಂಖ್ಯೆಗೂ ಬಿಲ್ಲಿಂಗ್‌ಗೂ ಹೊಂದಾಣಿಕೆಯಾಗುತ್ತಿರಲಿಲ್ಲ.

  ಬಿಲ್‌ನಲ್ಲಿ ಅಕ್ರಮ ಮಾಡುತ್ತಿರುವ ಅನುಮಾನ ಬಂದ ಬೆನ್ನಲ್ಲೇ ಈ ಒಂದು ರೆಸ್ಟೋರೆಂಟ್ ಈ ರೀತಿ ವಂಚನೆ ಮಾಡುತ್ತಿರಬಹುದು ಎಂದು ಅಧಿಕಾರಿಗಳು ಆರಂಭದಲ್ಲಿ ಅನುಮಾನ ವ್ಯಕ್ತಪಡಿಸಿದ್ದರು. ಆದರೆ ಮತ್ತಷ್ಟು ರೆಸ್ಟೋರೆಂಟ್‌ಗಳಿಗೆ ತೆರಳಿ ಪರಿಶೀಲಿಸಿದಾಗ ಎಲ್ಲರೂ ವಂಚನೆ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ. ಹೆಚ್ಚಿನ ತನಿಖೆ ನಡೆಸಿದಾಗ ಈ ರೆಸ್ಟೋರೆಂಟ್‌ಗಳು ಒಂದೇ ಬಿಲ್ಲಿಂಗ್ ಸಾಫ್ಟ್‌ವೇರ್‌ ಬಳಸುತ್ತಿರುವುದು ತಿಳಿದುಬಂದಿದೆ.

  ಒಂದೇ ಬಿಲ್ಲಿಂಗ್ ಸಾಫ್ಟ್‌ವೇರ್‌ ಬಳಸಿ ತೆರಿಗೆ ವಂಚನೆ ಮಾಹಿತಿ ಬೆಳಕಿಗೆ ಬರುತ್ತಿದ್ದಂತೆ 2019-20 ರಿಂದ ಹಿಡಿದು ಕಳೆದ 6 ವರ್ಷದ ಎಲ್ಲಾ ಬಿಲ್‌ಗಳನ್ನು ಅಧಿಕಾರಿಗಳು ಪರಿಶೀಲಿಸಲು ಮುಂದಾಗಿದ್ದಾರೆ. ಅಹಮದಾಬಾದ್‌ನಲ್ಲಿರುವ ಬಿಲ್ಲಿಂಗ್ ಸಾಫ್ಟ್‌ವೇರ್‌ ಪೂರೈಕೆದಾರರನಿಂದ ಸಾಫ್ಟ್‌ವೇರ್‌ ಪಡೆದಿದ್ದಾರೆ. ಈ ಸಾಫ್ಟ್‌ವೇರ್‌ ಬಳಸಿ ಎಷ್ಟು ಬಿಲ್ ಡಿಲೀಟ್ ಮಾಡಲಾಗಿದೆ ಎಂಬ ಲೆಕ್ಕ ತೆಗೆಯಲು ಆದಾಯ ತೆರಿಗೆ ಇಲಾಖೆ ವಿಧಿ ವಿಜ್ಞಾನ ಇಲಾಖೆಯ ಸಹಾಯ ಪಡೆಯಲಾಗಿದೆ.

  ವಿಧಿವಿಜ್ಞಾನ ಇಲಾಖೆಯು ಡಿಲೀಟ್ ಮಾಡಲಾದ ಎಲ್ಲಾ ಬಿಲ್‌ಗಳ ಡೇಟಾವನ್ನು ಮತ್ತೆ ತೆಗೆದಿದೆ. ಈ ವೇಳೆ ಸುಮಾರು 2.43 ಲಕ್ಷ ಬಿಲ್‌ಗಳು ಜನರೇಟ್ ಆದವು. ಎಲ್ಲಾ 2.43 ಲಕ್ಷ ಬಿಲ್‌ಗಳನ್ನು ಪರಿಶೀಲನೆ ಮಾಡಲು ಸಾಧ್ಯವಾಗದ ಕಾರಣ ಆದಾಯ ತೆರಿಗೆ ಇಲಾಖೆ ಎಐ ಮೊರೆ ಹೋಗಿದೆ.

  60 ಟೆರಾಬೈಟ್‌ಗಳ ಬಿಲ್ಲಿಂಗ್ ಡೇಟಾವವನ್ನು ಸುಧಾರಿತ ವಿಶ್ಲೇಷಣೆ, ಜನರೇಟಿವ್ ಎಐ ಪರಿಕರ ಮತ್ತು ರೆಸ್ಟೋರೆಂಟ್‌ಗಳ ಜಿಎಸ್‌ಟಿ ನಂಬರ್ ಬಳಸಿ ದಾಖಲೆಗಳನ್ನು ಸ್ಕ್ಯಾನ್ ಮಾಡಿದ್ದಾರೆ. ಈ ವೇಳೆ ಕನಿಷ್ಠ 70 ಸಾವಿರ ಕೋಟಿ ತೆರಿಗೆ ವಂಚನೆ ನಡೆದಿರುವುದು ಬಯಲಾಗಿದೆ.

  ರೆಸ್ಟೋರೆಂಟ್‌ಗಳು ಗ್ರಾಹಕರಿಗೆ ಬಿಲ್‌ನಲ್ಲಿ 18% ಜಿಎಸ್‌ಟಿ ಹಾಕುತ್ತಿದ್ದವು. ಜನರು ಯುಪಿಐ ಅಥವಾ ನಗದು ಪಾವತಿಸಿದ ಬಳಿಕ ಆ ಬಿಲ್ ಸಿಸ್ಟಮ್‌ನಿಂದಲೇ ಡಿಲೀಟ್ ಆಗುತ್ತಿತ್ತು. ರೆಸ್ಟೋರೆಂಟ್‌ಗಳು ರಿಟರ್ನ್ಸ್ ಸಲ್ಲಿಸುವ ಮೊದಲು ತಮ್ಮ ಆದಾಯವನ್ನು ಕಡಿಮೆ ತೋರಿಸಲು ನಗದು ಇನ್‌ವಾಯ್ಸ್ ಎಷ್ಟು ಬೇಕೋ ಅಷ್ಟನ್ನು ಉಳಿಸಿ ಉಳಿದವುಗಳನ್ನು ಡಿಲೀಟ್ ಮಾಡುತ್ತಿದ್ದವು. ಕೆಲವು ರೆಸ್ಟೋರಂಟ್‌ಗಳು ಒಂದು, ಎರಡು ದಿನದ್ದು ಡಿಲೀಟ್ ಮಾಡಿದ್ದರೆ ಕೆಲ ರೆಸ್ಟೋರೆಂಟ್‌ಗಳು ಪೂರ್ತಿ ತಿಂಗಳ ಬಿಲ್ಲಿಂಗ್ ಡೇಟಾವನ್ನು ಡಿಲೀಟ್ ಮಾಡುತ್ತಿದ್ದವು.

  ರಾಜ್ಯವಾರು ದತ್ತಾಂಶದ ಪ್ರಕಾರ ಕರ್ನಾಟಕವು ಸುಮಾರು 2,000 ಕೋಟಿ ರೂ.ಗಳ ಬಿಲ್ ಡಿಲೀಟ್ ಮಾಡಿ ಮೊದಲ ಸ್ಥಾನ ಗಳಿಸಿದೆ. ತೆಲಂಗಾಣವು ಸುಮಾರು 1,500 ಕೋಟಿ ರೂ. ಗಳ ಬಿಲ್ ಡಿಲೀಟ್ ಮಾಡಿ ಎರಡನೇ ಸ್ಥಾನದಲ್ಲಿ ಹಾಗೂ 1,200 ಕೋಟಿರೂ. ಗಳ ಬಿಲ್ ಡಿಲೀಟ್ ಮಾಡಿ ತಮಿಳುನಾಡು ಮೂರನೇ ಸ್ಥಾನ ಪಡೆದಿದೆ.