ಭಾರತದಲ್ಲಿ ಎಐ ಕ್ರಾಂತಿ - ಪ್ರಧಾನಿ ಮೋದಿಯವರ ದೃಷ್ಟಿಕೋನಕ್ಕೆ ಸ್ಯಾಮ್ ಆಲ್ಟ್‌ಮನ್ ಶ್ಲಾಘನೆ

•   Sat, Feb 21 2026 09:18:56 AM



• ನವದೆಹಲಿ, ಫೆ. 21 (DaijiworldNews/TA): ಓಪನ್‌ಎಐ ಸಂಸ್ಥೆಯ ಸಿಇಒ ಸ್ಯಾಮ್ ಆಲ್ಟ್‌ಮನ್ ಅವರು ಪ್ರಧಾನಿ ನರೇಂದ್ರ ಮೋದಿ ಅವರ ಕೃತಕ ಬುದ್ಧಿಮತ್ತೆ ಕುರಿತ ದೂರದೃಷ್ಟಿಯನ್ನು ಶ್ಲಾಘಿಸಿದ್ದಾರೆ. ಭಾರತದಲ್ಲಿ ತಂತ್ರಜ್ಞಾನ ಕ್ಷೇತ್ರದ ಮೇಲಿನ ಉತ್ಸಾಹ ಹಾಗೂ ಎಐ ಕ್ಷೇತ್ರದ ವೇಗವಾದ ಬೆಳವಣಿಗೆಯನ್ನು ಅವರು ವಿಶೇಷವಾಗಿ ಕೊಂಡಾಡಿದ್ದಾರೆ.

  

  ಭಾರತದಲ್ಲಿನ ಶಕ್ತಿ ಮತ್ತು ಇಲ್ಲಿ ಎಐ ನಿರ್ಮಾಣದಲ್ಲಿ ತೊಡಗಿರುವ ಬಿಲ್ಡರ್‌ಗಳ ಉತ್ಸಾಹ ಅದ್ಭುತವಾಗಿದೆ. ಇಂದು ಐಐಟಿ ದೆಹಲಿಯಲ್ಲಿ ಮಾತನಾಡುವ ಅವಕಾಶ ನನಗೆ ದೊರಕಿತು. ಭಾರತದಲ್ಲಿ ನಡೆಯುತ್ತಿರುವ ಬೆಳವಣಿಗೆಗಳನ್ನು ದೇಶೀಯ ಹಾಗೂ ಜಾಗತಿಕ ನಾಯಕರು ಗಮನಿಸುತ್ತಿದ್ದಾರೆ ಎಂದು ಸ್ಯಾಮ್ ಆಲ್ಟ್‌ಮನ್ ಹೇಳಿದರು. ಭಾರತ ಈಗಾಗಲೇ ಓಪನ್‌ಎಐಗೆ ಎರಡನೇ ಅತಿದೊಡ್ಡ ಮಾರುಕಟ್ಟೆಯಾಗಿದ್ದು, ವೇಗವಾಗಿ ಬೆಳೆಯುತ್ತಿರುವುದಾಗಿ ಆಲ್ಟ್‌ಮನ್ ತಿಳಿಸಿದ್ದಾರೆ. “ಇಲ್ಲಿ ಯಾವುದೋ ವಿಶೇಷವಾದುದು ಇದೆ. ಮುಂದಿನ ಹಂತದ ಬೆಳವಣಿಗೆಗೆ ಪ್ರಧಾನಿ ಮೋದಿಯವರ ನಾಯಕತ್ವ ಮಹತ್ವದ್ದಾಗಿದೆ,” ಎಂದು ಅವರು ಅಭಿಪ್ರಾಯಪಟ್ಟರು.

  ಪ್ರಧಾನಿ ಮೋದಿಯವರ ಎಐ ದೃಷ್ಟಿಕೋನವು ತಂತ್ರಜ್ಞಾನವನ್ನು ಸಾಮಾನ್ಯ ಜನರಿಗೆ ಲಭ್ಯವಾಗುವಂತೆ ಮಾಡುವುದರ ಜೊತೆಗೆ ಅದರ ಅಪಾಯಗಳನ್ನು ಸಮತೋಲನಗೊಳಿಸುವ ಉದ್ದೇಶ ಹೊಂದಿರುವುದು ಶ್ಲಾಘನೀಯ ಎಂದು ಆಲ್ಟ್‌ಮನ್ ಹೇಳಿದ್ದಾರೆ. ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಹಂಚಿಕೊಂಡಿರುವ ಪೋಸ್ಟ್‌ನಲ್ಲಿ ಆಲ್ಟ್‌ಮನ್, ಭಾರತವು ಕೋಡೆಕ್ಸ್‌ಗೆ ವೇಗವಾಗಿ ಬೆಳೆಯುತ್ತಿರುವ ಮಾರುಕಟ್ಟೆಯಾಗಿದ್ದು, ಕಳೆದ ಎರಡು ವಾರಗಳಲ್ಲಿ ವಾರದ ಬಳಕೆದಾರರ ಸಂಖ್ಯೆ ನಾಲ್ಕು ಪಟ್ಟು ಹೆಚ್ಚಾಗಿದೆ ಎಂದು ತಿಳಿಸಿದ್ದಾರೆ.