ಹೊನ್ನಾವರದ ನೈಸರ್ಗಿಕ ಸೌಂದರ್ಯಕ್ಕೆ ಮನಸೋತ ಖ್ಯಾತ ಉದ್ಯಮಿ

•   Mon, Jun 15 2026 03:00:27 PM



• ಉತ್ತರ ಕನ್ನಡ, ಜೂ. 15 (DaijiworldNews/TA): ಪ್ರಕೃತಿ ಪ್ರಿಯರು ವಾರಾಂತ್ಯದ ಪ್ರವಾಸಕ್ಕೆ ಹೊಸ ತಾಣ ಹುಡುಕುತ್ತಿದ್ದರೆ, ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ನಿಮ್ಮ ಪಟ್ಟಿಯಲ್ಲಿ ಮೊದಲ ಸ್ಥಾನ ಪಡೆಯಬಹುದು. ದೇಶದ ಖ್ಯಾತ ಉದ್ಯಮಿ ಹಾಗೂ ಮಹೀಂದ್ರಾ ಸಮೂಹದ ಮುಖ್ಯಸ್ಥ ಆನಂದ್ ಮಹೀಂದ್ರ ಅವರು ಹೊನ್ನಾವರದ ನೈಸರ್ಗಿಕ ಸೌಂದರ್ಯವನ್ನು ಕೊಂಡಾಡಿರುವ ಪೋಸ್ಟ್‌ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

  

  ಜೂನ್ 14ರಂದು ತಮ್ಮ ‘ಎಕ್ಸ್‌’ ಖಾತೆಯಲ್ಲಿ ಹೊನ್ನಾವರದ ಅದ್ಭುತ ದೃಶ್ಯಗಳನ್ನು ಹಂಚಿಕೊಂಡಿರುವ ಅವರು, ಈ ಪ್ರದೇಶವನ್ನು “ಮಾಂತ್ರಿಕ ಭೂದೃಶ್ಯ” ಎಂದು ಬಣ್ಣಿಸಿದ್ದಾರೆ. ಕಡಿಮೆ ಜನಸಂದಣಿ ಹೊಂದಿರುವ, ಇನ್ನೂ ಸಂಪೂರ್ಣವಾಗಿ ಅನ್ವೇಷಿಸದ ನೈಸರ್ಗಿಕ ತಾಣಗಳ ಹುಡುಕಾಟದ ವೇಳೆ ಹೊನ್ನಾವರದ ಸೌಂದರ್ಯ ತಮ್ಮ ಗಮನ ಸೆಳೆದಿದೆ ಎಂದು ಅವರು ತಿಳಿಸಿದ್ದಾರೆ.

  ಕೇರಳ ಬ್ಯಾಕ್‌ವಾಟರ್ಸ್‌ಗೆ ಪೈಪೋಟಿ : ಹೊನ್ನಾವರದಲ್ಲಿ ಶರಾವತಿ ನದಿ ಅರಬ್ಬೀ ಸಮುದ್ರ ಸೇರುವ ದೃಶ್ಯ, ಅಲ್ಲಿನ ಹಿನ್ನೀರು ಪ್ರದೇಶಗಳು ಹಾಗೂ ಮ್ಯಾಂಗ್ರೋವ್ ಕಾಡುಗಳು ಕೇರಳದ ಪ್ರಸಿದ್ಧ ಬ್ಯಾಕ್‌ವಾಟರ್ಸ್‌ಗಳನ್ನು ನೆನಪಿಸುವಂತಿವೆ. ಪ್ರಕೃತಿಯ ಸಮತೋಲನ ಕಾಪಾಡುವಲ್ಲಿ ಮ್ಯಾಂಗ್ರೋವ್ ಅರಣ್ಯಗಳ ಪಾತ್ರ ಮಹತ್ವದ್ದಾಗಿದೆ ಎಂದು ಮಹೀಂದ್ರಾ ತಮ್ಮ ಪೋಸ್ಟ್‌ನಲ್ಲಿ ಉಲ್ಲೇಖಿಸಿದ್ದಾರೆ.

  ಮಂಜಿನ ನಡುವೆ ಸಾಗುವ ದೋಣಿಗಳು, ಶಾಂತ ಜಲಮಾರ್ಗಗಳು ಮತ್ತು ಹಸಿರು ಹೊದಿಕೆಯ ಸೌಂದರ್ಯವನ್ನು ಒಳಗೊಂಡ ಚಿತ್ರಗಳು ಸಾಮಾಜಿಕ ಜಾಲತಾಣ ಬಳಕೆದಾರರನ್ನೂ ಆಕರ್ಷಿಸಿದ್ದು, “ಇದು ನಿಜವಾಗಿಯೂ ಕರ್ನಾಟಕವೇ?” ಎಂಬ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿವೆ.

  ಪ್ರಕೃತಿ ಪ್ರಿಯರ ನೆಚ್ಚಿನ ತಾಣ : ಬೆಂಗಳೂರಿನಿಂದ ಸುಮಾರು ಎಂಟು ಗಂಟೆಗಳ ಪ್ರಯಾಣದ ದೂರದಲ್ಲಿರುವ ಹೊನ್ನಾವರ, ಗಿಜಿಗುಡದ ಪ್ರವಾಸಿ ತಾಣಗಳಿಂದ ದೂರವಿರುವ ಶಾಂತ ಪ್ರದೇಶವಾಗಿದೆ. ಹಿನ್ನೀರು ಪ್ರದೇಶಗಳಲ್ಲಿ ದೋಣಿ ವಿಹಾರ, ಮ್ಯಾಂಗ್ರೋವ್ ಅರಣ್ಯಗಳ ನಡುವೆ ಪ್ರಕೃತಿ ನಡಿಗೆ ಹಾಗೂ ಪಕ್ಷಿ ವೀಕ್ಷಣೆಗಾಗಿ ಇದು ಅತ್ಯುತ್ತಮ ತಾಣವಾಗಿ ಗುರುತಿಸಿಕೊಂಡಿದೆ.

  ಕರ್ನಾಟಕದೊಂದಿಗೆ ಮಹೀಂದ್ರಾ ಅವರ ವಿಶೇಷ ನಂಟು : ಆನಂದ್ ಮಹೀಂದ್ರಾ ಅವರಿಗೆ ಕರ್ನಾಟಕದೊಂದಿಗೆ ವಿಶೇಷ ಭಾವನಾತ್ಮಕ ಸಂಬಂಧವಿದೆ. ಕೊಡಗಿನ ಕುತ್ತಾ ಪ್ರದೇಶದಲ್ಲಿದ್ದ ಕುಟುಂಬದ ಕಾಫಿ ತೋಟದ ನೆನಪುಗಳನ್ನು ಅವರು ಹಲವು ಬಾರಿ ಹಂಚಿಕೊಂಡಿದ್ದಾರೆ. ಈ ಹಿಂದೆ ಕೊಡಗು, ಚಿಕ್ಕಮಗಳೂರು, ಜೋಗ್‌ ಫಾಲ್ಸ್‌, ಹಾಗೂ ಉಡುಪಿ ಜಿಲ್ಲೆಯ ವರಂಗ ಗ್ರಾಮ ಸೇರಿದಂತೆ ಕರ್ನಾಟಕದ ಹಲವು ಪ್ರವಾಸಿ ತಾಣಗಳ ಸೌಂದರ್ಯವನ್ನು ಅವರು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಶಂಸಿಸಿದ್ದರು.

  ಈಗ ಹೊನ್ನಾವರದ ನೈಸರ್ಗಿಕ ವೈಭವಕ್ಕೆ ಮೆಚ್ಚುಗೆ ಸೂಚಿಸಿರುವ ಮಹೀಂದ್ರಾ ಅವರ ಪೋಸ್ಟ್‌, ಉತ್ತರ ಕನ್ನಡದ ಈ ಸುಂದರ ತಾಣವನ್ನು ಮತ್ತೊಮ್ಮೆ ರಾಷ್ಟ್ರೀಯ ಮಟ್ಟದಲ್ಲಿ ಚರ್ಚೆಗೆ ತರುವಲ್ಲಿ ಯಶಸ್ವಿಯಾಗಿದೆ.