ಆಸ್ಪತ್ರೆಯ ಎಡವಟ್ಟಿಗೆ ಎರಡು ಕುಟುಂಬಗಳು ಕಂಗಾಲು - ಮರಣೋತ್ತರ ಪರೀಕ್ಷೆಯ ಬಳಿಕ ಶವಗಳೇ ಅದಲು-ಬದಲು!

•   Tue, Jun 16 2026 03:01:44 PM



• ಅಸ್ಸಾಂ, ಜೂ. 16 (DaijiworldNews/TA): ಅಸ್ಸಾಂನ ಅತ್ಯಂತ ಹಳೆಯ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳಲ್ಲಿ ಒಂದಾದ ಅಸ್ಸಾಂ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆ (AMCH)ಯಲ್ಲಿ ನಡೆದ ಗಂಭೀರ ಎಡವಟ್ಟೊಂದು ಎರಡು ಕುಟುಂಬಗಳನ್ನು ಆಘಾತಕ್ಕೆ ದೂಡಿದೆ. ಮರಣೋತ್ತರ ಪರೀಕ್ಷೆಯ ಬಳಿಕ ಇಬ್ಬರು ಮೃತರ ಶವಗಳನ್ನು ತಪ್ಪಾಗಿ ಬೇರೆ ಕುಟುಂಬಗಳಿಗೆ ಹಸ್ತಾಂತರಿಸಿರುವ ಆರೋಪ ಕೇಳಿಬಂದಿದೆ.

  

  ಸೋನಾರಿ ಪ್ರದೇಶದ ಖಮ್ಲುಂಗ್ ಲೈನ್ ನಿವಾಸಿ ಮನೋಜ್ ಬೌರಿ ಅವರು ಜೂನ್ 7ರಂದು ನಡೆದ ರಸ್ತೆ ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡಿದ್ದರು. ಅವರನ್ನು ದಿಬ್ರುಗಢದ ಅಸ್ಸಾಂ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಭಾನುವಾರ ಅವರು ಮೃತಪಟ್ಟಿದ್ದರು. ಮರಣೋತ್ತರ ಪರೀಕ್ಷೆ ಪೂರ್ಣಗೊಂಡ ಬಳಿಕ ಆಸ್ಪತ್ರೆ ಸಿಬ್ಬಂದಿ ಮನೋಜ್ ಬೌರಿ ಅವರ ಕುಟುಂಬಕ್ಕೆ ಶವ ಹಸ್ತಾಂತರಿಸಿದ್ದರು. ಕುಟುಂಬ ಸದಸ್ಯರು ಅದನ್ನು ತಮ್ಮ ಸಂಬಂಧಿಯ ದೇಹವೆಂದು ನಂಬಿ ಮನೆಗೆ ಕೊಂಡೊಯ್ದಿದ್ದರು. ಆದರೆ ಅಂತ್ಯಸಂಸ್ಕಾರಕ್ಕೂ ಮುನ್ನ ಶವಪೆಟ್ಟಿಗೆಯನ್ನು ತೆರೆದಾಗ ಆಘಾತಕಾರಿ ಸತ್ಯ ಬಯಲಾಗಿದೆ. ಒಳಗಿದ್ದ ದೇಹ ಮನೋಜ್ ಬೌರಿ ಅವರದ್ದಲ್ಲ ಎಂಬುದು ಗೊತ್ತಾಗಿದೆ.

  ತಕ್ಷಣವೇ ಈ ವಿಷಯವನ್ನು ಪೊಲೀಸರಿಗೆ ಹಾಗೂ ಆಸ್ಪತ್ರೆ ಆಡಳಿತಕ್ಕೆ ತಿಳಿಸಲಾಯಿತು. ನಂತರ ನಡೆದ ಪರಿಶೀಲನೆಯಲ್ಲಿ ಮನೋಜ್ ಕುಟುಂಬಕ್ಕೆ ಹಸ್ತಾಂತರಿಸಲಾದ ಶವವು ಡೂಮ್‌ಡೂಮಾ ನಿವಾಸಿ ಸುನಿಲ್ ನಾಯಕ್ ಅವರದ್ದಾಗಿತ್ತು ಎಂಬುದು ಬೆಳಕಿಗೆ ಬಂದಿದೆ. ಇದೇ ವೇಳೆ, ಮನೋಜ್ ಬೌರಿ ಅವರ ದೇಹವನ್ನು ತಪ್ಪಾಗಿ ಸುನಿಲ್ ನಾಯಕ್ ಅವರ ಕುಟುಂಬಕ್ಕೆ ನೀಡಲಾಗಿತ್ತು. ಅವರ ಕುಟುಂಬವೂ ಅದನ್ನು ತಮ್ಮ ಸಂಬಂಧಿಯ ದೇಹವೆಂದು ಭಾವಿಸಿ ಮನೆಗೆ ಕೊಂಡೊಯ್ದಿತ್ತು. ಘಟನೆ ತಿಳಿಯುತ್ತಿದ್ದಂತೆ ಆಸ್ಪತ್ರೆ ಅಧಿಕಾರಿಗಳು ಎರಡೂ ಕುಟುಂಬಗಳೊಂದಿಗೆ ಸಂಪರ್ಕ ಸಾಧಿಸಿ, ಶವಗಳನ್ನು ಮತ್ತೆ ದಿಬ್ರುಗಢಕ್ಕೆ ಕರೆಸಿಕೊಂಡರು. ಬಳಿಕ ಸರಿಯಾದ ಗುರುತಿನ ಪರಿಶೀಲನೆ ನಡೆಸಿ, ಶವಗಳನ್ನು ಆಯಾ ಕುಟುಂಬಗಳಿಗೆ ಮರು ಹಸ್ತಾಂತರಿಸಲಾಯಿತು. ಈ ಎಡವಟ್ಟಿನಿಂದ ಈಗಾಗಲೇ ಆರ್ಥಿಕ ಹಾಗೂ ಮಾನಸಿಕ ಸಂಕಷ್ಟದಲ್ಲಿದ್ದ ಮನೋಜ್ ಬೌರಿ ಅವರ ಕುಟುಂಬ ಮತ್ತಷ್ಟು ತೊಂದರೆ ಅನುಭವಿಸಬೇಕಾಯಿತು. ಆಸ್ಪತ್ರೆಯ ನಿರ್ಲಕ್ಷ್ಯದ ವಿರುದ್ಧ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದು, ಇಂತಹ ಘಟನೆಗಳು ಮರುಕಳಿಸದಂತೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ.

  ಗಮನಾರ್ಹ ಸಂಗತಿಯೆಂದರೆ, ಇದೇ ಪ್ರದೇಶದಲ್ಲಿ ಈ ಹಿಂದೆ ಸಹ ಶವ ಗುರುತಿನ ಗೊಂದಲದ ಪ್ರಕರಣ ವರದಿಯಾಗಿತ್ತು. ತಪ್ಪಾಗಿ ಹೂಳಲಾದ ಶವವನ್ನು ನಂತರ ಹೊರತೆಗೆದು ನಿಜವಾದ ಕುಟುಂಬಕ್ಕೆ ಹಸ್ತಾಂತರಿಸಬೇಕಾದ ಘಟನೆ ನಡೆದಿತ್ತು. ಇತ್ತೀಚಿನ ಪ್ರಕರಣದ ಕುರಿತು ಆಸ್ಪತ್ರೆ ಆಡಳಿತ ಅಥವಾ ಸಂಬಂಧಿತ ಅಧಿಕಾರಿಗಳು ಇನ್ನೂ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.