ಸಿಯಾಚಿನ್‌ನಲ್ಲಿ ಇತಿಹಾಸ ನಿರ್ಮಿಸಿದ ಭಾರತೀಯ ಸೇನೆಯ ಮೊದಲ ಮಹಿಳಾ ಅಧಿಕಾರಿ ಕ್ಯಾಪ್ಟನ್ ಶಿವಾ ಚೌಹಾಣ್

•   Wed, Jul 29 2026 08:23:06 AM



• ಉದಯಪುರ, ಜು. 29 (DaijiworldNews/AA): ಭಾರತೀಯ ಸೇನೆಯ ಕ್ಯಾಪ್ಟನ್ ಶಿವಾ ಚೌಹಾಣ್ ಅವರು 2023ರ ಜನವರಿಯಲ್ಲಿ ವಿಶ್ವದ ಅತಿ ಎತ್ತರದ ಯುದ್ಧಭೂಮಿಯಾದ ಸಿಯಾಚಿನ್ ಹಿಮನದಿಯ ಕುಮಾರ್ ಪೋಸ್ಟ್ ನಲ್ಲಿ ನಿಯೋಜನೆಗೊಂಡ ಮೊದಲ ಮಹಿಳಾ ಅಧಿಕಾರಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಈ ಸಾಧನೆ ಮಾಡುವ ಮೂಲಕ ಅವರು, ಸೇನೆ ಸೇರುವ ಕನಸು ಕಾಣುವ ಸಾವಿರಾರು ಯುವತಿಯರಿಗೆ ಸ್ಫೂರ್ತಿಯಾಗಿದ್ದಾರೆ.

  

  ರಾಜಸ್ಥಾನದ ಉದಯಪುರ ಮೂಲದ ಶಿವಾ ಚೌಹಾಣ್ ಅವರು ಕೇವಲ 11ನೇ ವಯಸ್ಸಿನಲ್ಲಿ ತಂದೆಯನ್ನು ಕಳೆದುಕೊಂಡರು. ತಾಯಿ ಹಾಗೂ ಹಿರಿಯ ಸಹೋದರಿಯ ಬೆಂಬಲದಲ್ಲಿ ಬೆಳೆದ ಅವರು, ಆರ್ಥಿಕ ಹಾಗೂ ವೈಯಕ್ತಿಕ ಸಂಕಷ್ಟಗಳ ನಡುವೆಯೂ ಬಾಲ್ಯದಿಂದಲೇ ಕಂಡಿದ್ದ ಭಾರತೀಯ ಸೇನೆ ಸೇರುವ ಕನಸನ್ನು ಕೈಬಿಡಲಿಲ್ಲ.

  ಉದಯಪುರದ ಟೆಕ್ನೋ ಎನ್‌ಜೆಆರ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯಿಂದ ಸಿವಿಲ್ ಎಂಜಿನಿಯರಿಂಗ್‌ನಲ್ಲಿ ಬಿ.ಟೆಕ್ ಪದವಿ ಪಡೆದ ಬಳಿಕ, ಭಾರತೀಯ ಸೇನೆಯ ಶಾರ್ಟ್ ಸರ್ವಿಸ್ ಕಮಿಷನ್ (ತಾಂತ್ರಿಕ ವಿಭಾಗ) ಪ್ರವೇಶಕ್ಕಾಗಿ ಸಿದ್ಧತೆ ನಡೆಸಿದರು.

  2020ರಲ್ಲಿ ನಡೆದ ಸರ್ವಿಸಸ್ ಸೆಲೆಕ್ಷನ್ ಬೋರ್ಡ್ (ಎಸ್‌ಎಸ್‌ಬಿ) ಸಂದರ್ಶನದಲ್ಲಿ ಅಖಿಲ ಭಾರತ ಪ್ರಥಮ ಸ್ಥಾನ ಪಡೆದು, ಚೆನ್ನೈನ ಆಫೀಸರ್ಸ್ ಟ್ರೈನಿಂಗ್ ಅಕಾಡೆಮಿ (ಒಟಿಎ)ಗೆ ಆಯ್ಕೆಯಾದರು. 2021ರ ಮೇ ತಿಂಗಳಲ್ಲಿ ಕಾರ್ಪ್ಸ್ ಆಫ್ ಎಂಜಿನಿಯರ್ಸ್ ವಿಭಾಗದಲ್ಲಿ ಅಧಿಕಾರಿಯಾಗಿ ಸೇವೆಗೆ ಸೇರ್ಪಡೆಯಾದರು.

  ಲಡಾಖ್‌ನ ಎತ್ತರದ ಪ್ರದೇಶಗಳಲ್ಲಿ ಸೇವೆ ಸಲ್ಲಿಸುವ ವೇಳೆ ಶಿವಾ ಚೌಹಾಣ್ ಕಠಿಣ ಪರಿಸ್ಥಿತಿಗಳಲ್ಲೂ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದರು. 2022ರಲ್ಲಿ ಅವರು 'ಸುರಾ ಸೋಯಿ ಸೈಕ್ಲಿಂಗ್ ಎಕ್ಸ್ಪಿಡಿಷನ್'ಗೆ ನೇತೃತ್ವ ನೀಡಿ, ಸಿಯಾಚಿನ್ ಯುದ್ಧ ಸ್ಮಾರಕದಿಂದ ಕಾರ್ಗಿಲ್ ಯುದ್ಧ ಸ್ಮಾರಕದವರೆಗೆ 500 ಕಿ.ಮೀ.ಗೂ ಅಧಿಕ ದೂರವನ್ನು ಸೈಕಲ್ ಮೂಲಕ ಕ್ರಮಿಸಿ ತಮ್ಮ ಸಾಮರ್ಥ್ಯ ಹಾಗೂ ನಾಯಕತ್ವವನ್ನು ಪ್ರದರ್ಶಿಸಿದರು.

  ಸಿಯಾಚಿನ್‌ಗೆ ನಿಯೋಜನೆಯಾಗುವ ಮೊದಲು ಅವರು ಸಿಯಾಚಿನ್ ಬ್ಯಾಟಲ್ ಸ್ಕೂಲ್ ನಲ್ಲಿ ವಿಶೇಷ ತರಬೇತಿ ಪಡೆದರು. ಹಿಮನದಿಯಲ್ಲಿ ಸಂಚರಿಸುವುದು, ಹಿಮಕುಸಿತಕ್ಕೆ ಪ್ರತಿಕ್ರಿಯೆ ನೀಡುವುದು, ಎತ್ತರದ ಪ್ರದೇಶಗಳಲ್ಲಿ ಬದುಕುಳಿಯುವ ತಂತ್ರಗಳು ಹಾಗೂ ರಕ್ಷಣಾ ಕಾರ್ಯಾಚರಣೆಗಳ ಬಗ್ಗೆ ಅವರು ಪರಿಣತಿ ಗಳಿಸಿದರು.

  2023ರ ಜನವರಿ 2ರಂದು, ಸುಮಾರು 15,632 ಅಡಿ ಎತ್ತರದಲ್ಲಿರುವ ಕುಮಾರ್ ಪೋಸ್ಟ್ ಗೆ ಕ್ಯಾಪ್ಟನ್ ಶಿವಾ ಚೌಹಾಣ್ ಅವರನ್ನು ನಿಯೋಜಿಸಲಾಯಿತು. ಈ ಪ್ರದೇಶದಲ್ಲಿ ಸೈನಿಕರು ಮೈನಸ್ 50 ಡಿಗ್ರಿ ಸೆಲ್ಸಿಯಸ್‌ವರೆಗಿನ ತಾಪಮಾನ, ಕಡಿಮೆ ಆಮ್ಲಜನಕ, ಭಾರೀ ಹಿಮಪಾತ ಹಾಗೂ ಆಗಾಗ ಸಂಭವಿಸುವ ಹಿಮಕುಸಿತದಂತಹ ಅತ್ಯಂತ ಕಠಿಣ ಪರಿಸ್ಥಿತಿಗಳನ್ನು ಎದುರಿಸುತ್ತಾರೆ. ಕಾರ್ಪ್ಸ್ ಆಫ್ ಎಂಜಿನಿಯರ್ಸ್ ಅಧಿಕಾರಿಯಾಗಿ ಅವರು ಸೇನಾ ಮೂಲಸೌಕರ್ಯ, ಹೆಲಿಪ್ಯಾಡ್‌ಗಳ ನಿರ್ವಹಣೆ, ಕಾರ್ಯಾಚರಣೆಯ ಲಾಜಿಸ್ಟಿಕ್ಸ್ ಹಾಗೂ ಸೈನಿಕರ ಸನ್ನದ್ಧತೆಯನ್ನು ಖಚಿತಪಡಿಸುವ ಜವಾಬ್ದಾರಿಯನ್ನು ಯಶಸ್ವಿಯಾಗಿ ನಿರ್ವಹಿಸಿದರು.

  ಕ್ಯಾಪ್ಟನ್ ಶಿವಾ ಚೌಹಾಣ್ ಅವರು ಸೈನಿಕ ಸಾಮರ್ಥ್ಯವನ್ನು ನಿರ್ಧರಿಸುವುದು ಕೌಶಲ್ಯ, ತರಬೇತಿ ಮತ್ತು ನಾಯಕತ್ವ. ಬದಲಾಗಿ ಹೆಣ್ಣು ಅಥವಾ ಗಂಡು ಎಂಬುದಲ್ಲ ಎಂದು ಸಾಬೀತುಪಡಿಸಿದರು. ವಿಶ್ವದ ಅತಿ ಎತ್ತರದ ಯುದ್ಧಭೂಮಿಯಲ್ಲಿ ದೇಶಸೇವೆ ಮಾಡುವ ಮೂಲಕ ಶಿವಾ ಅವರು ಇಂದು ಭಾರತೀಯ ಸಶಸ್ತ್ರ ಪಡೆ ಸೇರುವ ಕನಸು ಕಾಣುತ್ತಿರುವ ಯುವಜನತೆಗೆ, ವಿಶೇಷವಾಗಿ ಮಹಿಳೆಯರಿಗೆ, ಪ್ರೇರಣೆಯಾಗಿದ್ದಾರೆ.