UPSC ಪರೀಕ್ಷೆಯಲ್ಲಿ ಅಖಿಲ ಭಾರತ 14ನೇ ರ್ಯಾಂಕ್ ಪಡೆದ ಸುರಭಿ ಯಾದವ್‌

•   Sat, Aug 01 2026 08:17:00 AM



• ಅಮ್ರೋಹಾ, ಆ. 01 (DaijiworldNews/AA): ದೊಡ್ಡ ಕನಸುಗಳನ್ನು ನನಸಾಗಿಸಲು ನಗರಪ್ರದೇಶದಲ್ಲೇ ಹುಟ್ಟಿರಬೇಕೆಂಬುದು ಅನಿವಾರ್ಯವಲ್ಲ ಎಂಬುದನ್ನು ಉತ್ತರ ಪ್ರದೇಶದ ಅಮ್ರೋಹಾ ಜಿಲ್ಲೆಯ ಸಣ್ಣ ಹಳ್ಳಿಯ ಯುವತಿ ಸುರಭಿ ಯಾದವ್ ಸಾಬೀತುಪಡಿಸಿದ್ದಾರೆ. ಅವರು 2025ರ UPSC ಪರೀಕ್ಷೆಯಲ್ಲಿ ಅಖಿಲ ಭಾರತ ಮಟ್ಟದಲ್ಲಿ 14ನೇ ರ್ಯಾಂಕ್‌ ಗಳಿಸಿ ಗಮನಾರ್ಹ ಸಾಧನೆ ಮಾಡಿದ್ದಾರೆ.

  

  ಪೊಲೀಸ್ ಇನ್ಸ್‌ಪೆಕ್ಟರ್‌ ರಾಕೇಶ್ ಕುಮಾರ್ ಯಾದವ್ ಅವರ ಪುತ್ರಿಯಾಗಿರುವ ಸುರಭಿಯ ಈ ಸಾಧನೆ ಕುಟುಂಬದಷ್ಟೇ ಅಲ್ಲದೆ ಅವರ ಊರು ಹಾಗೂ ಜಿಲ್ಲೆಯ ಹೆಮ್ಮೆಯಾಗಿದೆ. ಅವರು ಅಮ್ರೋಹಾ ಜಿಲ್ಲೆಯ ನೌಗವಾನ್ ಸದಾತ್ ಪೊಲೀಸ್ ಠಾಣೆ ವ್ಯಾಪ್ತಿಯ ನಾಸಿರ್ ನಂಗ್ಲಾ ಗ್ರಾಮದ ನಿವಾಸಿ. ಪ್ರಸ್ತುತ ಅವರ ತಂದೆ ಬರೇಲಿಯಲ್ಲಿ ಪೊಲೀಸ್ ಇನ್ಸ್‌ಪೆಕ್ಟರ್‌ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ. ತಂದೆಯಿಂದ ಪ್ರೇರಿತರಾದ ಸುರಭಿ ಬಾಲ್ಯದಲ್ಲಿಯೇ ನಾಗರಿಕ ಸೇವೆಗೆ ಸೇರುವ ಗುರಿ ಹೊಂದಿದ್ದರು. ತಂದೆಯೊಂದಿಗೆ ಬರೇಲಿಯಲ್ಲಿ ವಾಸಿಸುತ್ತಲೇ ಅವರು UPSC ಪರೀಕ್ಷೆಗೆ ಸಿದ್ಧತೆ ನಡೆಸಿದ್ದರು.

  ಸುರಭಿ ಶಾಲಾ ದಿನಗಳಿಂದಲೇ ಪ್ರತಿಭಾವಂತ ವಿದ್ಯಾರ್ಥಿನಿಯಾಗಿದ್ದರು. ಅವರು ಬರೇಲಿಯ ಎಸ್‌ಆರ್ ಇಂಟರ್‌ನ್ಯಾಷನಲ್ ಇಂಟರ್ ಕಾಲೇಜಿನಲ್ಲಿ 10ನೇ ತರಗತಿ ಪೂರ್ಣಗೊಳಿಸಿದರು. ಬಳಿಕ ಆರ್ಮಿ ಪಬ್ಲಿಕ್ ಸ್ಕೂಲ್‌ನಲ್ಲಿ ಮಾನವಿಕ ವಿಭಾಗದಲ್ಲಿ 12ನೇ ತರಗತಿಯಲ್ಲಿ ಶೇ.96 ಅಂಕಗಳನ್ನು ಗಳಿಸಿದರು.

  ಉನ್ನತ ಶಿಕ್ಷಣಕ್ಕಾಗಿ ದೆಹಲಿಗೆ ತೆರಳಿದ ಅವರು, ದೆಹಲಿ ವಿಶ್ವವಿದ್ಯಾಲಯದ ಪ್ರತಿಷ್ಠಿತ ಲೇಡಿ ಶ್ರೀರಾಮ್ ಕಾಲೇಜಿನಲ್ಲಿ ಇತಿಹಾಸ ವಿಷಯದಲ್ಲಿ ಬಿಎ (ಆನರ್ಸ್) ಪದವಿ ಪಡೆದರು. ನಂತರ ಜಾಮಿಯಾ ಮಿಲಿಯಾ ಇಸ್ಲಾಮಿಯಾ ವಿಶ್ವವಿದ್ಯಾಲಯದಿಂದ ಇತಿಹಾಸದಲ್ಲೇ ಸ್ನಾತಕೋತ್ತರ ಪದವಿಯನ್ನು ಪೂರ್ಣಗೊಳಿಸಿದರು.

  ಸುರಭಿಯ ಯಶಸ್ಸಿನ ಹಾದಿ ಸುಲಭವಾಗಿರಲಿಲ್ಲ. ಅವರು 2023ರಲ್ಲಿಯೂ UPSC ಪರೀಕ್ಷೆಗೆ ಹಾಜರಾಗಿದ್ದರು. ಸಾಕಷ್ಟು ಶ್ರಮಪಟ್ಟಿದ್ದರೂ ಅಂತಿಮ ಆಯ್ಕೆಗೆ ಕೇವಲ 10 ಅಂಕಗಳ ಅಂತರದಿಂದ ಅವಕಾಶ ತಪ್ಪಿಸಿಕೊಂಡಿದ್ದರು.

  ಆದರೆ ಆ ಸೋಲು ಅವರನ್ನು ಹತಾಶರನ್ನಾಗಿಸಲಿಲ್ಲ. ಮತ್ತಷ್ಟು ದೃಢಸಂಕಲ್ಪ ಮತ್ತು ಪರಿಶ್ರಮದೊಂದಿಗೆ ತಯಾರಿ ಮುಂದುವರಿಸಿದ ಅವರು, ಈ ಬಾರಿ ಅಖಿಲ ಭಾರತ ಮಟ್ಟದಲ್ಲಿ 14ನೇ ರ್ಯಾಂಕ್‌ ಪಡೆದು ದೇಶದ ಅತ್ಯುತ್ತಮ ಸಾಧಕರಲ್ಲಿ ಒಬ್ಬರಾಗಿ ಹೊರಹೊಮ್ಮಿದ್ದಾರೆ. ಅವರ ಈ ಸಾಧನೆ ಅನೇಕ UPSC ಆಕಾಂಕ್ಷಿಗಳಿಗೆ ಪ್ರೇರಣೆಯಾಗಿದೆ.