ಗೋ ಕಳ್ಳರ ಬೆನ್ನಟ್ಟಿದ ಬಜರಂಗದಳ ಮುಖಂಡನ ಮೇಲೆ ಗುಂಡಿನ ದಾಳಿ

•   Fri, Oct 11 2019 06:50:59 PM



• ಗುರುಗ್ರಾಮ,ಅ 11 (Daijiworld News/MSP): ಗೋ ಕಳ್ಳರನ್ನು ಬೆನ್ನಟ್ಟುತ್ತಿದ್ದ ಭಜರಂಗದಳದ ಜಿಲ್ಲಾ ಸಂಚಾಲಕನ ಎದೆಗೆ ಗೋ ಕಳ್ಳರು ಗುಂಡಿಕ್ಕಿದ್ದ ಘಟನೆ ಗುರಗಾಂವ್‌ನಲ್ಲಿ ಮಾನೇಸರ್ ಜಿಲ್ಲೆಯಲ್ಲಿ ನಡೆದಿದೆ.

  

  ಪೊಲೀಸರ ಪ್ರಕಾರ "ಬುಧವಾರ ಮುಂಜಾನೆ 3 ಗಂಟೆ ಸುಮಾರಿಗೆ ಈ ಘಟನೆ ನಡೆದಿದ್ದು, ಸಂಯೋಜಕ ಮೋಹಿತ್ ಅಲಿಯಾಸ್ ಮೋನು ಸೇರಿದಂತೆ ನಾಲ್ಕು ಗೋ ರಕ್ಷಕರು, ಬಿಳಿ ಬಣ್ಣದ ಬೊಲೆರೊ ಪಿಕ್ ಅಪ್ ವಾಹನದಲ್ಲಿ ಗೋವುಗಳನ್ನು ಕಳ್ಳಸಾಗಣೆ ಮಾಡುವುದನ್ನು ಗಮನಿಸಿ ಬೆನ್ನಟ್ಟಿದ್ದಾರೆ ಎಂದು ತಿಳಿಸಿದ್ದಾರೆ.

  ಭಜರಂಗದಳದ ಗುರುಗ್ರಾಮ ಜಿಲ್ಲಾಧ್ಯಕ್ಷ ಅಭಿಷೇಕ್ ಗೌರ್ ಅವರ ಪ್ರಕಾರ, “ಗೋವುಗಳನ್ನು ಅಕ್ರಮವಾಗಿ ಸಾಗಿಸುತ್ತಿರುವ ಬಗ್ಗೆ ಅನುಮಾನ ಬಂದು ಮೋಹಿತ್ ಹಾಗೂ ತಂಡ ಗೋಕಳ್ಳರ ವಾಹನವನ್ನು ತಡೆದು ನಿಲ್ಲಿಸಲು ಪ್ರಯತ್ನಿಸಿದರು.ಆದರೆ ಚಾಲಕ ವಾಹನವನ್ನು ನಿಲ್ಲಿಸದೇ ವೇಗವಾಗಿ ಗುರುಗ್ರಾಮದ ಕಡೆಗೆ ತಿರುಗಿದ್ದಾನೆ. ಈ ವೇಳೆ ವಾಹನವನ್ನು ತಂಡವು ಒಂದು ಗಂಟೆಗೂ ಹೆಚ್ಚು ಕಾಲ ಬೆನ್ನಟ್ಟಿದ್ದು, ಈ ವೇಳೆ ಕದಿಪುರ ಗ್ರಾಮದ ಬಳಿ, ಗೋಕಳ್ಳರು ಗುಂಡು ಹಾರಿಸಿದ್ದಾರೆ " ಎಂದು ಗೌರ್ ಹೇಳಿದ್ದಾರೆ.

  ಗುರುಗ್ರಾಮದ ಪೊಲೀಸ್ ಇಲಾಖೆ ಪಿಆರ್ ಓ ಸುಭಾನ್ ಬೋಕನ್ ಅವರು, ಮೋಹಿತ್ ಅಲಿಯಾಸ್ ಮೋನು ಆಸ್ಪತ್ರೆಗೆ ದಾಖಲಾದ ಬಳಿಕ ಈ ವಿಚಾರ ಪೊಲೀಸರಿಗೆ ತಿಳಿದುಬಂದಿದ್ದು, ಕಳ್ಳಸಾಗಾಣಿಕೆದಾರರು ಪ್ರಯಾಣಿಸುತ್ತಿದ್ದ ವಾಹನ ಟೌರು ಬಳಿ ಪತ್ತೆಯಾಗಿದೆ. ವಾಹನದಲ್ಲಿದ್ದ ಆರು ಜನರಲ್ಲಿ ಐವರನ್ನು ಗುರುತಿಸಲಾಗಿದೆ ಈ ಬಗ್ಗೆ ಎಫ್ಐಆರ್ ದಾಖಲಿಸಲಾಗಿದೆ" ಎಂದು ತಿಳಿಸಿದ್ದಾರೆ.