'ರಾಮನಗರ ಸ್ವಚ್ಛ ಮಾಡಲಿ ಬಿಡಿ, ಆಲ್‌ ದಿ ಬೆಸ್ಟ್‌' - ಡಿಕೆ ಶಿವಕುಮಾರ್

•   Sun, Dec 08 2019 03:51:51 PM



• ಬೆಂಗಳೂರು, ಡಿ 08 (Daijiworld News/MB) : ರಾಮನಗರವನ್ನು ಸ್ವಚ್ಛ ಮಾಡುವುದಾಗಿ ಹೇಳಿಕೆ ನೀಡಿದ ಉಪ ಮುಖ್ಯಮಂತ್ರಿ ಡಾ. ಸಿ. ಎನ್. ಅಶ್ವಥ್ ನಾರಾಯಣ ಅವರಿಗೆ ಕಾಂಗ್ರೆಸ್ ಮುಖಂಡ, ಮಾಜಿ ಸಚಿವ ಡಿಕೆ ಶಿವಕುಮಾರ್ " ನಮ್ಮಿಂದ ಇಷ್ಟರವರೆಗೆ ಆಗದನ್ನು ಅವರು ಮಾಡು‌ತ್ತಾರಂತೆ. ಮಾಡಲಿ ಬಿಡಿ ಆಲ್‌ ದಿ ಬೆಸ್ಟ್‌" ಎಂದು ವ್ಯಂಗ್ಯ ಮಾಡಿದ್ದಾರೆ.

  

  ಬೆಂಗಳೂರಿನ ಸದಾಶಿವನಗರದಲ್ಲಿರುವ ತಮ್ಮ ನಿವಾಸದಲ್ಲಿ ಭಾನುವಾರ ಮಾಧ್ಯಮದವರೊಂದಿಗೆ ಮಾತಾನಾಡಿದ ಅವರು, "ಸ್ವಚ್ಛತೆ ಮಾಡುವುದು ಬಹಳ ಒಳ್ಳೆಯ ಕೆಲಸ. ಅಶ್ವಥ್ ನಾರಾಯಣ ಅವರು ಬಹಳ ಉತ್ಸಾಹದಿಂದಿದ್ದಾರೆ. ನಾವು ಯಾಕೆ ಅವರ ಉತ್ಸಾಹಕ್ಕೆ ಬೇಡ ಎಂದು ಹೇಳುವುದು. ಮಾಡಲಿ ಬಿಡಿ ಆಲ್‌ ದಿ ಬೆಸ್ಟ್‌" ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.

  "ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ, ಮಾಜಿ ಮುಖ್ಯಮಂತ್ರಿ ಎಚ್.ಡಿ. ಕುಮಾರಸ್ವಾಮಿ, ತಾವು, ಸಿಂಧ್ಯಾ ಎಲ್ಲರೂ ಈ ರಾಮನಗರ ಕ್ಷೇತ್ರದಿಂದಲೇ ಜಯ ಗಳಿಸಿ ಬಂದವರು. ನಮ್ಮಿಂದ ಯಾರಿಂದಲೂ ಆಗದ ಕೆಲಸವನ್ನು ಉಪಮುಖ್ಯಮಂತ್ರಿ ಮಾಡಲಿ ಬಿಡಿ. ಅವರ ಉತ್ಸಾವಕ್ಕೆ ನಾವು ಯಾವುದೇ ತೊಂದರೆ ಕೊಡುವುದಿಲ್ಲ" ಎಂದು ಹೇಳಿದ್ದಾರೆ.

  ಹಾಗೆಯೇ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪರವರು ಬಿಜೆಪಿ 13 ಸ್ಥಾನಗಳಲ್ಲಿ ಗೆಲ್ಲುತ್ತದೆ ಎಂದು ಹೇಳಿಕೆಗೆ ಪ್ರತಿಕ್ರಿಯೆ ನೀಡಿದ ಅವರು, "ಅವರು ೧೫ರಲ್ಲೂ ಗೆಲ್ಲುತ್ತಾರೆ. ಯಾಕೆ 2 ಕ್ಷೇತ್ರಗಳಲ್ಲಿ ಸೋಲುತ್ತಾರೆ? ಆ ಕ್ಷೇತ್ರಗಳಲ್ಲೂ ಗೆಲ್ಲಲಿ. ಪಾಪ ಎರಡು ಕ್ಷೇತ್ರಗಳಲ್ಲಿ ಸೋತು ಯಾಕೆ ಅವರಿಗೆ ಅನ್ಯಾಯ ಮಾಡಬೇಕು? ಈಗಾಗಲೇ ಇಬ್ಬರಿಗೆ ಅನ್ಯಾಯ ಮಾಡಿಯಾಗಿದೆ. ಈಗ ಪುನಃ ಇಬ್ಬರಿಗೆ ಯಾಕೆ ಅನ್ಯಾಯ ಮಾಡುವುದು. 13 ಕ್ಷೇತ್ರಗಳಲ್ಲಿ ಬಿಜೆಪಿ ಗೆಲ್ಲುತ್ತದೆ ಎಂಬುದು ಅವರ ಭ್ರಮೆ" ಎಂದರು.