ಮೈಸೂರು, ನ.13 (DaijiworldNews/TA): ಅರಮನೆ, ಅಂಬಾರಿ, ದಸರಾ ಹಾಗೂ ಚಾಮುಂಡಿ ಬೆಟ್ಟದ ಮೂಲಕ ವಿಶ್ವಪ್ರಸಿದ್ಧಿ ಪಡೆದಿರುವ ಸಾಂಸ್ಕೃತಿಕ ನಗರಿ ಮೈಸೂರು ಇದೀಗ ಬಾಹ್ಯಾಕಾಶ ವಿಜ್ಞಾನ ಕ್ಷೇತ್ರದಲ್ಲೂ ಹೊಸ ಇತಿಹಾಸ ಸೃಷ್ಟಿಸಲು ಸಜ್ಜಾಗಿದೆ. ಭಾರತದ ಮೊದಲ ಎಲ್ಇಡಿ ಡೋಮ್ ತಾರಾಲಯ ಎನಿಸಿಕೊಂಡಿರುವ ಅತ್ಯಾಧುನಿಕ ‘ಕಾಸ್ಮೋಸ್ ಮೈಸೂರು’ ಇಂದು ದೇಶದ ಗಮನ ಸೆಳೆಯುತ್ತಿದೆ. ಬರೋಬ್ಬರಿ 8K ರೆಸಲ್ಯೂಶನ್ನಲ್ಲಿ ನಕ್ಷತ್ರಗಳು, ಗ್ರಹಗಳು, ನಕ್ಷತ್ರಪುಂಜಗಳು ಹಾಗೂ ಬ್ರಹ್ಮಾಂಡದ ಅದ್ಭುತಗಳನ್ನು ಕಣ್ಣಮುಂದೆ ತೆರೆದಿಡುವ ಈ ತಾರಾಲಯವನ್ನು ನವೆಂಬರ್ 13ರಂದು ಪ್ರಧಾನಿ ನರೇಂದ್ರ ಮೋದಿ ಉದ್ಘಾಟಿಸಲಿದ್ದಾರೆ.

ಮೈಸೂರು ವಿಶ್ವವಿದ್ಯಾನಿಲಯದ ಜಯಚಾಮರಾಜೇಂದ್ರ ಕ್ಯಾಂಪಸ್ನಲ್ಲಿ ಭಾರತೀಯ ಖಗೋಳ ಭೌತಶಾಸ್ತ್ರ ಸಂಸ್ಥೆ ನಿರ್ಮಿಸಿರುವ ಈ ಕೇಂದ್ರಕ್ಕೆ COSMOS-Mysuru ಎಂದು ಹೆಸರಿಡಲಾಗಿದೆ. COSMOS ಎಂದರೆ Cosmology Education and Research Training Centre. ಅಂದರೆ ಖಗೋಳಶಾಸ್ತ್ರ ಶಿಕ್ಷಣ ಮತ್ತು ಸಂಶೋಧನಾ ತರಬೇತಿ ಕೇಂದ್ರ. ಸುಮಾರು 116 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗಿರುವ ಈ ಯೋಜನೆಗೆ ಕೇಂದ್ರ ಸರ್ಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ, ಅಣುಶಕ್ತಿ ಇಲಾಖೆ, ಪ್ರಧಾನ ವೈಜ್ಞಾನಿಕ ಸಲಹೆಗಾರರ ಕಚೇರಿ ಹಾಗೂ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರ ಸಂಸದರ ಸ್ಥಳೀಯ ಪ್ರದೇಶಾಭಿವೃದ್ಧಿ ನಿಧಿಯ ಸಹಕಾರ ದೊರೆತಿದೆ. ಮೈಸೂರು ವಿಶ್ವವಿದ್ಯಾನಿಲಯ ಮತ್ತು ಭಾರತೀಯ ಖಗೋಳ ಭೌತಶಾಸ್ತ್ರ ಸಂಸ್ಥೆಯ ಸಹಯೋಗದಲ್ಲಿ ಈ ಯೋಜನೆ ಸಾಕಾರಗೊಂಡಿದೆ.
ಸಾಮಾನ್ಯ ತಾರಾಲಯಗಳಲ್ಲಿ ಪ್ರೊಜೆಕ್ಟರ್ ಮೂಲಕ ಗುಮ್ಮಟದ ಮೇಲೆ ನಕ್ಷತ್ರಗಳು ಮತ್ತು ಗ್ರಹಗಳ ಚಿತ್ರಗಳನ್ನು ಪ್ರದರ್ಶಿಸಲಾಗುತ್ತದೆ. ಆದರೆ ಕಾಸ್ಮೋಸ್ ಮೈಸೂರಿನಲ್ಲಿ ತಂತ್ರಜ್ಞಾನವೇ ವಿಭಿನ್ನವಾಗಿದೆ. ಇಲ್ಲಿ ಗುಮ್ಮಟವೇ ಬೃಹತ್ ಎಲ್ಇಡಿ ಪರದೆಯಾಗಿ ಕಾರ್ಯನಿರ್ವಹಿಸಲಿದೆ. ಸುಮಾರು 15 ಮೀಟರ್ ಗಾತ್ರದ ಈ ಗುಮ್ಮಟವನ್ನು 15 ಡಿಗ್ರಿ ಓರೆಯಾಗಿ ವಿನ್ಯಾಸಗೊಳಿಸಲಾಗಿದೆ. ಇದರಿಂದ ಪ್ರೇಕ್ಷಕರು ಬಾಹ್ಯಾಕಾಶದ ಮಧ್ಯೆಯೇ ಕುಳಿತಿರುವಂತಹ ನೈಜ ಅನುಭವ ಪಡೆಯಲಿದ್ದಾರೆ. ಇಲ್ಲಿ ಬರೋಬ್ಬರಿ 6,150 ಎಲ್ಇಡಿ ಪ್ಯಾನೆಲ್ಗಳನ್ನು ಅಳವಡಿಸಲಾಗಿದ್ದು, ಒಟ್ಟು 4.2 ಕೋಟಿ ಪ್ರತ್ಯೇಕ ಎಲ್ಇಡಿ ದೀಪಗಳಿವೆ. ಅತ್ಯಾಧುನಿಕ 8K ರೆಸಲ್ಯೂಶನ್ ತಂತ್ರಜ್ಞಾನದ ಮೂಲಕ ಬಾಹ್ಯಾಕಾಶದ ಪ್ರತಿಯೊಂದು ಸೂಕ್ಷ್ಮ ವಿವರಗಳನ್ನೂ ಅತ್ಯಂತ ಸ್ಪಷ್ಟವಾಗಿ ವೀಕ್ಷಿಸಬಹುದು. ಕಂಪ್ಯೂಟರ್ ನಿಯಂತ್ರಿತ ವ್ಯವಸ್ಥೆಯ ಮೂಲಕ ನೈಜ ಸಮಯದಲ್ಲೇ ದೃಶ್ಯಾವಳಿಗಳನ್ನು ಬದಲಾಯಿಸುವ ಸೌಲಭ್ಯವೂ ಇದರಲ್ಲಿದೆ.
ಕಾಸ್ಮೋಸ್ ಮೈಸೂರಿನ ಸ್ಕೈ ಥಿಯೇಟರ್ನಲ್ಲಿ ವೃತ್ತಿಪರವಾಗಿ ನಿರ್ಮಿಸಲಾದ ಖಗೋಳಶಾಸ್ತ್ರದ ವಿಶೇಷ ಕಾರ್ಯಕ್ರಮಗಳನ್ನು ಪ್ರದರ್ಶಿಸಲಾಗುತ್ತದೆ. ಕನ್ನಡ, ಇಂಗ್ಲಿಷ್ ಮತ್ತು ಹಿಂದಿ ಭಾಷೆಗಳಲ್ಲಿ ಕಾರ್ಯಕ್ರಮಗಳನ್ನು ವೀಕ್ಷಿಸಬಹುದು. ಇದರ ಜತೆಗೆ ಮೈಸೂರಿನ ಇತಿಹಾಸ ಮತ್ತು ಖಗೋಳಶಾಸ್ತ್ರದ ನಡುವಿನ ಸಂಬಂಧವನ್ನು ಪರಿಚಯಿಸುವ ವಿಶೇಷ ಚಲನಚಿತ್ರ ಪ್ರದರ್ಶಿಸುವ ಯೋಜನೆಯೂ ಇದೆ. ಖಗೋಳಶಾಸ್ತ್ರದ ಪ್ರದರ್ಶನ ಮಳಿಗೆಗಳು, ವಿಜ್ಞಾನ ಮಾದರಿಗಳು, ಪುರಾತನ ಕಲಾಕೃತಿಗಳ ಮ್ಯೂಸಿಯಂ, ಉಪನ್ಯಾಸ ಸಭಾಂಗಣ, ತರಗತಿ ಕೊಠಡಿಗಳು, ತರಬೇತಿ ಪ್ರಯೋಗಾಲಯಗಳು ಹಾಗೂ ಹೊರಾಂಗಣ ಸಂವಾದಾತ್ಮಕ ವಿಜ್ಞಾನ ಪ್ರದರ್ಶನಗಳು ಇಲ್ಲಿನ ಇತರ ಆಕರ್ಷಣೆಗಳಾಗಿವೆ.
ಕಾಸ್ಮೋಸ್ ಮೈಸೂರು ಕೇವಲ ಪ್ರವಾಸಿ ತಾಣವಾಗಿ ರೂಪುಗೊಂಡಿಲ್ಲ. ವಿದ್ಯಾರ್ಥಿಗಳು, ಶಿಕ್ಷಕರು ಹಾಗೂ ಯುವ ಸಂಶೋಧಕರಿಗೆ ಖಗೋಳಶಾಸ್ತ್ರದ ಬಗ್ಗೆ ಪ್ರಾಯೋಗಿಕ ಜ್ಞಾನ ಮತ್ತು ತರಬೇತಿ ನೀಡುವ ಉದ್ದೇಶವನ್ನೂ ಹೊಂದಿದೆ. ಭಾರತದ ವಿವಿಧ ಭಾಗಗಳಲ್ಲಿರುವ ದೂರದರ್ಶಕ ಕೇಂದ್ರಗಳು ಹಾಗೂ ಬಾಹ್ಯಾಕಾಶದ ಖಗೋಳ ವೀಕ್ಷಣಾ ವ್ಯವಸ್ಥೆಗಳಿಂದ ಸಂಗ್ರಹವಾಗುವ ದತ್ತಾಂಶಗಳನ್ನು ವಿಶ್ಲೇಷಿಸಲು ಇಲ್ಲಿ ಅವಕಾಶ ಕಲ್ಪಿಸುವ ಯೋಜನೆಯಿದೆ. ಗ್ರಹಗಳು, ನಕ್ಷತ್ರಗಳು ಮತ್ತು ದೂರದ ಆಕಾಶಕಾಯಗಳ ಬಗ್ಗೆ ಪುಸ್ತಕಗಳಲ್ಲಿ ಓದುವುದಕ್ಕಿಂತಲೂ ಮಿಗಿಲಾಗಿ ವೈಜ್ಞಾನಿಕ ದತ್ತಾಂಶಗಳ ಮೂಲಕ ಅರಿತುಕೊಳ್ಳಲು ವಿದ್ಯಾರ್ಥಿಗಳಿಗೆ ಇದು ನೆರವಾಗಲಿದೆ. ಕಳೆದ ನಾಲ್ಕು ವರ್ಷಗಳಲ್ಲಿ ಭಾರತೀಯ ಖಗೋಳ ಭೌತಶಾಸ್ತ್ರ ಸಂಸ್ಥೆಯು ಮೈಸೂರು ನಗರ ಹಾಗೂ ಜಿಲ್ಲೆಯ ವಿವಿಧೆಡೆ 170ಕ್ಕೂ ಹೆಚ್ಚು ಖಗೋಳ ವಿಜ್ಞಾನ ಜಾಗೃತಿ ಕಾರ್ಯಕ್ರಮಗಳನ್ನು ಆಯೋಜಿಸಿದ್ದು, ಸುಮಾರು 45,000 ಜನರನ್ನು ತಲುಪಿದೆ.
ಮೈಸೂರಿಗೆ ಭೇಟಿ ನೀಡುವ ಪ್ರವಾಸಿಗರ ಪಟ್ಟಿಯಲ್ಲಿ ಅರಮನೆ, ಚಾಮುಂಡಿ ಬೆಟ್ಟ, ಮೃಗಾಲಯ, ಕಾರಂಜಿ ಕೆರೆ ಸೇರಿದಂತೆ ಹಲವು ತಾಣಗಳಿವೆ. ಇದೀಗ ಈ ಪಟ್ಟಿಗೆ ಕಾಸ್ಮೋಸ್ ಮೈಸೂರು ಹೊಸ ಸೇರ್ಪಡೆಯಾಗಲಿದೆ. ವಿಶೇಷವಾಗಿ ಮಕ್ಕಳಲ್ಲಿ ವಿಜ್ಞಾನಾಸಕ್ತಿ ಬೆಳೆಸಲು, ವಿದ್ಯಾರ್ಥಿಗಳಲ್ಲಿ ಬಾಹ್ಯಾಕಾಶದ ಬಗ್ಗೆ ಕುತೂಹಲ ಮೂಡಿಸಲು ಹಾಗೂ ಯುವ ಸಂಶೋಧಕರಿಗೆ ಹೊಸ ಅವಕಾಶಗಳನ್ನು ಕಲ್ಪಿಸಲು ಈ ಕೇಂದ್ರ ಮಹತ್ವದ ಪಾತ್ರ ವಹಿಸುವ ನಿರೀಕ್ಷೆಯಿದೆ.
ಒಟ್ಟಿನಲ್ಲಿ ಸಾಂಸ್ಕೃತಿಕ ನಗರಿ ಮೈಸೂರು ಇದೀಗ ವಿಜ್ಞಾನ ಮತ್ತು ಖಗೋಳಶಾಸ್ತ್ರದ ಪ್ರಮುಖ ಕೇಂದ್ರವಾಗಿಯೂ ಗುರುತಿಸಿಕೊಳ್ಳುವತ್ತ ಹೆಜ್ಜೆ ಇಟ್ಟಿದೆ. 8K ದೃಶ್ಯಾನುಭವ, 4.2 ಕೋಟಿ ಎಲ್ಇಡಿ ದೀಪಗಳು ಹಾಗೂ ಅತ್ಯಾಧುನಿಕ ಸಂಶೋಧನಾ ಸೌಲಭ್ಯಗಳೊಂದಿಗೆ ಸಜ್ಜಾಗಿರುವ ಕಾಸ್ಮೋಸ್ ಮೈಸೂರು, ಪ್ರವಾಸಿಗರು ಮತ್ತು ವಿಜ್ಞಾನಾಸಕ್ತರಿಗೆ ಹೊಸ ಅನುಭವ ನೀಡಲು ಸಿದ್ಧವಾಗಿದೆ. ಇನ್ನು ಬಾಹ್ಯಾಕಾಶದ ವಿಸ್ಮಯಗಳನ್ನು ಕಣ್ತುಂಬಿಕೊಳ್ಳಲು ರಾತ್ರಿ ಆಕಾಶದತ್ತ ನೋಡುವ ಅಗತ್ಯವಿಲ್ಲ. ಚಾಮುಂಡಿ ಬೆಟ್ಟದ ತಪ್ಪಲಿನಲ್ಲೇ ಕುಳಿತು ಬ್ರಹ್ಮಾಂಡದೊಳಗೆ ಪಯಣಿಸಬಹುದು.