'ಜಿಲ್ಲೆಯ ಯುವಕರಿಗೆ ರೇವಣ್ಣನಿಂದಾಗಿ ಹೆಣ್ಣು ಸಿಗುತ್ತಿಲ್ಲ' -ಎ.ಮಂಜು

•   Sun, Mar 08 2020 06:27:55 PM



• ಹಾಸನ‌, ಮಾ.08 (DaijiworldNews/PY) : "ರೇವಣ್ಣನಿಂದ ಈ ಭಾಗದಲ್ಲಿ ಯುವಕರಿಗೆ ಹೆಣ್ಣು ಸಿಗದಂತಾಗಿದೆ. ಅವರ ಜೊತೆ ಸೇರಿ ಆ ಕೇಸ್, ಈ ಕೇಸ್ ಅಂತಾ ಆಗಿ ಯಾರೂ ಯುವಕರಿಗೆ ಹೆಣ್ಣು ಕೊಡುತ್ತಿಲ್ಲ. ಹೀಗಾಗಿ ಜನರಿಗೆ ಒಳ್ಳೆಯದಾಗಲು ನಮ್ಮ ಜೊತೆ ಬನ್ನಿ" ಎಂದು ಎ.ಮಂಜು ಹೇಳಿದ್ದಾರೆ.

  

  ಹಾಸನದ ಶಾಂತಿಗ್ರಾಮದಲ್ಲಿ ನೂತನ ಮಂಡಲ ಅಧ್ಯಕ್ಷ ಮೋಹನ್‍ಕುಮಾರ್ ಗೆ ಅಭಿನಂದನೆ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, "ರೇವಣ್ಣ ಅವರು ಪೊಲೀಸರ ಮೂಲಕ ಕೇಸ್ ಹಾಕಿಸುತ್ತೇನೆ ಎಂದು ಹೆದರಿಸಿ ಪಕ್ಷ ಹಾಗೂ ಮನೆಯನ್ನು ಸಂಘಟನೆ ಮಾಡಿಕೊಂಡಿದ್ದಾರೆ. ಪ್ರೀತಿಯಿಂದ ಅವರು ಜಿಲ್ಲೆಯನ್ನು ಹಿಡಿತದಲ್ಲಿ ಇಟ್ಟುಕೊಂಡಿಲ್ಲ" ಎಂದು ತಿಳಿಸಿದರು.

  "ರೇವಣ್ಣ ಅವರು ಯಾರಾದರು ಸತ್ತರೆ ತನ್ನ ಸ್ವಂತ ಕಾರ್‌‌ನಲ್ಲಿ ಹೋಗುವುದಿಲ್ಲ. ಯಾವುದೋ ಮಂತ್ರ ಮಾಡಿಸಿಕೊಂಡು ಬಂದಿದ್ದಾರೆ ಎಂದು ಶರ್ಟ್‌‌ ಗುಂಡಿ ಬಿಚ್ಚಿಕೊಂಡು ಏಲಕ್ಕಿ ಹಾರ ತೋರಿಸುತ್ತಾರೆ. ಅವರು ಮಾಡಿರುವ ಕೆಲಸದಿಂದ ಹಿಂದೆ ಮುಂದೆ ಪೊಲೀಸರು ಇಲ್ಲದೇ ಊರಿಗೆ ಬರಲು ಆಗುವುದಿಲ್ಲ. ಜನ ಅವರಿಗೆ ಒಂದು ದಿನ ಪಾಠ ಕಲಿಸುತ್ತಾರೆ. ಈ ಭಾಗದಲ್ಲಿ ರೇವಣ್ಣ ಅವರಿಂದ ಯುವಕರಿಗೆ ಹೆಣ್ಣು ಸಿಗದಂತಾಗಿದೆ. ಆ ಕೇಸ್‌, ಈ ಕೇಸ್‌ ಎಂದಾಗಿ ಅವರ ಜೊತೆ ಸೇರಿ ಯಾರೂ ಯುವಕರಿಗೆ ಹೆಣ್ಣ ಕೊಡುತ್ತಿಲ್ಲ. ಹಾಗಾಗಿ ಜನರಿಗೆ ಒಳ್ಳೆಯದಾಗಲು ನಮ್ಮ ಜೊತೆ ಬನ್ನಿ" ಎಂದು ಹೇಳಿದರು.

  ನೂತನ ಮಂಡಲ ಅಧ್ಯಕ್ಷ ಮೋಹನ್ ಕುಮಾರ್ ಅವರು ಎ.ಮಂಜು ಅವರ ಮಾತನ್ನು ಬೆಂಬಲಿಸಿ, "ಯುವಕರ ಮೇಲೆ ರೇವಣ್ಣ ಅವರಿಂದಾಗಿ ಕೇಸ್‌‌ ಬೀಳುತ್ತಿರುವುದು ಅಧಿಕವಾಗಿದೆ. ಯುವಕರಿಗೆ ಹೆಣ್ಣು ಸಿಗದಿರುವ ವಿಚಾರ ಕೂಡಾ ಸತ್ಯ" ಎಂದರು.