ಪೊಲೀಸರ ಮೇಲೆ ಹಲ್ಲೆಗೆ ಮುಂದಾದ ವ್ಯಕ್ತಿಯ ವಿರುದ್ದ ಎಫ್‌ಐಆರ್‌ ದಾಖಲು

•   Sat, Mar 28 2020 02:51:29 PM



• ಹಾಸನ, ಮಾ.28 (DaijiworldNews/PY) : ಪೊಲೀಸರ ಮೇಲೆ ಹಲ್ಲೆಗ ಮುಂದಾದ ವ್ಯಕ್ತಿಗೆ ಪೊಲೀಸ್‌ ಪೇದೆ ಮನಬಂದತೆ ಥಳಿಸಿದ್ದು, ಹಲ್ಲೆಗೆ ಮುಂದಾಗಿದ್ದ ವ್ಯಕ್ತಿಯ ವಿರುದ್ದ ದೂರು ದಾಖಲಾದ ಘಟನೆ ಹಾಸನ ಪೆನ್ಶನ್ ಮೊಹಲ್ಲಾ‌ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.

  

  ಹಾಸನದ ಮಟನ್‌ ಮಾರ್ಕೆಟ್‌ ಸರ್ಕಲ್‌ನಲ್ಲಿ ವ್ಯಕ್ತಿಯೋರ್ವ ಮಗನೊಂದಿಗೆ ರಸ್ತೆಯಲ್ಲಿ ಸ್ಕೂಟರ್‌ನಲ್ಲಿ ತಿರುಗಾಡುತ್ತಿದ್ದ ಸಂದರ್ಭ, ರಸ್ತೆಯಲ್ಲಿ ಈ ರೀತಿ ಸುಮ್ಮನೆ ಓಡಾಡುತ್ತಿದ್ದದ್ದನ್ನು ಗಮನಿಸಿದ ಪೊಲೀಸ್‌ ಪೇದೆ ಪ್ರಶ್ನಿಸಿದ್ದು, ಬಳಿಕ ಪೊಲೀಸ್‌ ಹಾಗೂ ವ್ಯಕ್ತಿಯ ನಡುವೆ ಮಾತಿನ ಚಕಮಕಿ ಉಂಟಾಗಿದೆ.

  ನಂತರ ಪೊಲೀಸ್‌ ಹಾಗೂ ವ್ಯಕ್ತಿಯ ನಡುವೆ ಜಗಳ ಪ್ರಾರಂಭವಾಗಿದ್ದು, ಇವರಿಬ್ಬರ ಜಗಳ ಬಿಡಿಸಲು ಬಂದ ಮತ್ತೊಬ್ಬ ಪೇದೆಯ ಲಾಠಿ ಕಿತ್ತುಕೊಂಡು ಪೊಲೀಸ್‌ ಪೇದೆ ವ್ಯಕ್ತಿಗೆ ಲಾಠಿ ಪ್ರಹಾರ ಮಾಡಿದ್ದಾರೆ. ವ್ಯಕ್ತಿಯನ್ನು ರಸ್ತೆಯಲ್ಲಿ ಓಡಾಡಿಸಿಕೊಂಡು ಲಾಠಿಯಿಂದ ಬಾರಿಸುತ್ತಿರುವ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗುತ್ತಿದೆ.

  ಆ ವ್ಯಕ್ತಿಯನ್ನು ನಂತರ ಪೊಲೀಸರು ಠಾಣೆಗೆ ಕರೆದೊಯ್ದು ಆತನ ವಿರುದ್ದ ಎಫ್‌ಐಆರ್‌ ದಾಖಲಿಸಿದ್ದು, ಮ್ಯಾಜಿಸ್ಟ್ರೇಟ್‌ ಸಮ್ಮುಖದಲ್ಲಿ ಆರೋಪಿಯನ್ನು ಹಾಜರು ಪಡಿಸಿದ್ದಾರೆ. ಆರೋಪಿಗೆ ಮ್ಯಾಜಿಸ್ಟ್ರೇಟರ್‌ ಜಾಮೀನು ನೀಡಿದ್ದಾರೆ ಎಂದು ವರದಿಯಾಗಿದೆ.