275 ಭಾರತೀಯರು ಇರಾನ್‌ನಿಂದ ವಾಪಾಸ್‌ - ರಾಜಸ್ತಾನದಲ್ಲಿ ಕ್ವಾರೆಂಟೈನ್‌

•   Sun, Mar 29 2020 03:53:24 PM



• ಜೋಧಪುರ, ಮಾ.29 (Daijiworld News/MB) : ಕೊರೊನಾ ಸೋಂಕಿನಿಂದ ತತ್ತರಿಸಿ ಹೋಗಿರುವ ಇರಾನ್‌ನಿಂದ 275 ಭಾರತೀಯರನ್ನು ವಾಪಾಸ್‌ ಕರೆದುಕೊಂಡು ಬರಲಾಗಿದ್ದು ಅವರಿಂದು ರಾಜಸ್ಥಾನದ ಜೋಧಪುರ ತಲುಪಿದ್ದಾರೆ. ಅವರು ದೆಹಲಿ ಮೂಲಕ ಜೋಧಪುರಕ್ಕೆ ಬಂದಿದ್ದು ಅವರನ್ನು ಈಗ ಕ್ವಾರಂಟೈನ್‌ನಲ್ಲಿ ಇರಿಸಲಾಗಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

  

  ಅವರ ಸ್ಕ್ರೀನಿಂಗ್‌ ಮಾಡಲಾಗಿದ್ದು ಆ ಬಳಿಕ ಜೋಧಪುರದಲ್ಲಿರುವ ಸೇನಾ ಸ್ವಾಸ್ಥ್ಯ ಕೇಂದ್ರಕ್ಕೆ ಕಳುಹಿಸಲಾಗಿದೆ.

  275 ಜನರ ಪೈಕಿ ನಾಲ್ವರು ಮಕ್ಕಳು, ಎರಡು ಶಿಶುಗಳು ಸೇರಿದಂತೆ 133 ಮಹಿಳೆಯರು ಮತ್ತು 142 ಮಂದಿ ಪುರುಷರು ಇದ್ದಾರೆ ಎಂದು ರಾಜಸ್ಥಾನದ ಆರೋಗ್ಯ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ರೋಹಿತ್ ಕುಮಾರ್ ಸಿಂಗ್ ಮಾಹಿತಿ ನೀಡಿದ್ದಾರೆ.

  ಈ ಕುರಿತಾಗಿ ಟ್ವೀಟ್‌ ಮಾಡಿರುವ ನಾಗರಿಕ ವಿಮಾನಯಾನ ಸಚಿವ ಹರ್‌ದೀಪ್ ಸಿಂಗ್ ಪುರಿ ಸ್ಪೈಸ್‌ಜೆಟ್ ಮತ್ತು ಇಂಡಿಗೊ ವಿಮಾನಗಳಲ್ಲಿ ಇರಾನ್‌ನಲ್ಲಿದ್ದ ಈ ಭಾರತೀಯರನ್ನು ಜೋಧಪುರಕ್ಕೆ ಕರೆದು ಕೊಂಡು ಹೋಗಲಾಗಿದೆ. ಆಪರೇಷನ್ ನಮಸ್ತೆ! ಕೋವಿಡ್–19 ನಿಂದ ಭಾರತೀಯರನ್ನು ರಕ್ಷಿಸುವ ಕಾರ್ಯ ಪ್ರಗತಿಯಲ್ಲಿದೆ ಎಂದು ಹೇಳಿದ್ದಾರೆ.