ನಟಿ ಮೀರಾ ಚೋಪ್ರಾಗೆ ಸಾಮೂಹಿಕ ಅತ್ಯಾಚಾರದ ಬೆದರಿಕೆ ಹಾಕಿದ ಜೂ. ಎನ್‌ಟಿಆರ್‌ ಅಭಿಮಾನಿಗಳು

•   Wed, Jun 03 2020 02:48:39 PM



• ಹೈದರಾಬಾದ್‌, ಜೂ. 03 (Daijiworld News/MB) : ನಟಿ ಮೀರಾ ಚೋಪ್ರಾರ ಮೇಲೆ ಸಾಮೂಹಿಕ ಅತ್ಯಾಚಾರ ಮಾಡುವುದಾಗಿ ಸಾಮಾಜಿಕ ಜಾಲತಾಣದಲ್ಲಿ ಬೆದರಿಕೆ ಹಾಕಲಾಗಿದೆ.

  

  ಸಾಮಾಜಿಕ ಜಾಲತಾಣದಲ್ಲಿ ಸಕ್ರಿಯವಾಗಿರುವ ಮೀರಾ ಅವರು ಮಂಗಳವಾರ ಸಂಜೆ #askmeera ಹ್ಯಾಷ್‌ಟ್ಯಾಗ್‌ ಮೂಲಕ ಟ್ವಿಟರ್‌ನಲ್ಲಿ ಅಭಿಮಾನಿಗಳೊಟ್ಟಿಗೆ ಸಂವಾದ ನಡೆಸುತ್ತಿದ್ದು ಈ ಸಂದರ್ಭದಲ್ಲಿ ಜೂನಿಯರ್‌ ಎನ್‌ಟಿಆರ್‌ ಅಭಿಮಾನಿಯೊಬ್ಬ ತೆಲುಗುವಿನಲ್ಲಿ ನಿಮ್ಮ ನೆಚ್ಚಿನ ನಟ ಯಾರು? ಎಂದು ‌ಪ್ರಶ್ನಿಸಿದ್ದಾನೆ. ಬಳಿಕ ‘ನಿಮಗೆ ಜೂನಿಯರ್‌ ಎನ್‌ಟಿಆರ್‌ ಇಷ್ಟವೇ ಎಂದು ಕೂಡಾ ಪ್ರಶ್ನಿಸಿದ್ದಾರೆ.

  ಈ ಸಂದರ್ಭದಲ್ಲಿ ನಟಿ ಮೀರಾ ಚೋಪ್ರಾ, ನನಗೆ ಅವರು ಯಾರೆಂದು ತಿಳಿದಿಲ್ಲ. ನಾನು ಆ ನಟನ ಅಭಿಮಾನಿಯೂ ಅಲ್ಲ ಎಂದು ಹೇಳಿದ್ದಾರೆ.

  ಇದಕ್ಕೆ ಆಕ್ರೋಶಗೊಂಡ ಜೂನಿಯರ್‌ ಎನ್‌ಟಿಆರ್‌ ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ನಟಿ ವಿರುದ್ಧ ಆಂದೋಲನ ಆರಂಭಿಸಿದ್ದು ಈ ವೇಳೆ ಕೆಲವರು ಅಶ್ಲೀಲ ಶಬ್ದಗಳಲ್ಲಿ ನಿಂದನೆ ಮಾಡಿ ಅತ್ಯಾಚಾರ ಮಾಡುವ ಹಾಗೂ ಆಸಿಡ್‌ ಹಾಕಿ ಹತ್ಯೆ ಮಾಡುತ್ತೇವೆ ಎಂದೂ ಬೆದರಿಸಿದ್ದಾರೆ.

  ಈ ಬಗ್ಗೆ ಟ್ವೀಟ್‌ ಮೂಲಕ ತಿಳಿಸಿರುವ ನಟಿ ಮೀರಾ ಚೋಪ್ರಾ, ಸಂವಾದದ ಸಂದರ್ಭದಲ್ಲಿ ಟಾಲಿವುಡ್‌ ನಟ ಮಹೇಶ್‌ಬಾಬು ನನಗಿಷ್ಟ ಎಂದು ಹೇಳಿದ ಕಾರಣದಿಂದಾಗಿ ನಿಮ್ಮ ಅಭಿಮಾನಿಗಳು ನನ್ನ ವಿರುದ್ಧವಾಗಿ ಸುಳ್ಳು ಆರೋಪಗಳನ್ನು ಮಾಡುತ್ತಿದ್ದಾರೆ. ಅಷ್ಟೇ ಅಲ್ಲದೇ ನನ್ನ ಪೋಷಕರಿಗೂ ಅಶ್ಲೀಲ ಸಂದೇಶಗಳನ್ನು ಕಳುಹಿಸುತ್ತಿದ್ದಾರೆ. ನಿಮಗೆ ಇಂತಯಹ ಅಭಿಮಾನಿಗಳು ಬೇಕೆ. ನನ್ನ ಟ್ವೀಟ್‌ ಅನ್ನು ಇನ್ನಾದರೂ ನಿರ್ಲಕ್ಷಿಸುತ್ತೀರಿ ಎಂದು ಭಾವಿಸುತ್ತೇನೆ ಎಂದು ಜೂನಿಯರ್‌ ಎನ್‌ಟಿಆರ್‌ಗೆ ಮನವಿ ಮಾಡಿದ್ದಾರೆ.

  ಇನ್ನು ಮೀರಾ ಬೆಂಬಲಕ್ಕೆ ನಿಂತಿರುವ ಗಾಯಕಿ ಚಿನ್ಮಯಿ ಶ್ರೀಪಾದ, ಅಶ್ಲೀಲ ಟ್ವೀಟ್‌ಗಳ ಸ್ಕ್ರೀನ್‌ ಶಾಟ್‌ಗಳ ಜೊತೆಗೆ ರಾಷ್ಟ್ರೀಯ ಮಹಿಳಾ ಆಯೋಗಕ್ಕೆ ದೂರು ಸಲ್ಲಿಸುವಂತೆ ಅವರು ಸಲಹೆ ನೀಡಿದ್ದು ಮೀರಾ ಅವರು ಅಶ್ಲೀಲ ಟ್ವೀಟ್‌ಗಳ ಸ್ಕ್ರೀನ್‌ ಶಾಟ್‌ಗಳನ್ನು ಹೈದರಾಬಾದ್‌ನ ಸೈಬರ್‌ ಪೊಲೀಸ್‌ ವಿಭಾಗಕ್ಕೆ ಕಳುಹಿಸಿ ತಪ್ಪಿತಸ್ಥರ ವಿರುದ್ಧ ಕ್ರಮಕೈಗೊಳ್ಳುವಂತೆ ವಿನಂತಿಸಿದ್ದಾರೆ.