ಗೆಳತಿಯ ಮುಖಕ್ಕೆ ಸ್ಯಾನಿಟೈಸರ್‌ ಎರಚಿ, ಬೆಂಕಿ ಹಚ್ಚಿದ ಯುವಕ

•   Tue, Jul 28 2020 10:28:53 AM



• ಚಂಡೀಗಢ, ಜು 28 (Daijiworld News/MSP): ಹಣ ಕೊಡಲು ನಿರಾಕರಿಸಿದ ಗೆಳತಿ ಮೇಲೆ ಸಿಟ್ಟಿಗೆದ್ದ ಯುವಕ ಆಕೆಯ ಮುಖಕ್ಕೆ ಸ್ಯಾನಿಟೈಸರ್‌ ಎರಚಿ, ಬೆಂಕಿ ಹಚ್ಚಿದ ಘಟನೆ ಚಂಡೀಗಢದಲ್ಲಿ ನಡೆದಿದೆ.

  
  

  ಕೆಲಸ ಅರಸಿ ಚಂಡೀಗಢಕ್ಕೆ ಬಂದಿದ್ದ ಶಿಲ್ಲಾಂಗ್​ ಮೂಲದ 22 ವರ್ಷದ ಯುವತಿಗೆ ನರೇಶ್ ಎಂಬ ಯುವಕನ ಪರಿಚಯವಾಗಿತ್ತು. ಪರಿಚಯ ಸ್ನೇಹಕ್ಕೆ ತಿರುಗಿ ಇಬ್ಬರೂ ಲಿವ್‌ ಇನ್‌ ರಿಲೇಷನ್‌ನಲ್ಲಿ ಜೊತೆಯಾಗಿ ವಾಸಿಸತೊಡಗಿದ್ದರು.

  ಆದರೆ ಈ ನಡುವೆ ಕೆಲಸವಿಲ್ಲದ ನರೇಶ ಗೆಳತಿಯನ್ನು ಪದೇ ಪದೇ ಹಣಕ್ಕಾಗಿ ಪೀಡಿಸುತ್ತಿದ್ದ. ಹಲವು ಬಾರಿ ರೋಸಿಹೋದ ಯುವತಿ ಅವನು ಬೇಡಿಕೆ ಒಡ್ಡಿದ್ದ ಎರಡು ಸಾವಿರ ರೂಪಾಯಿ ನೀಡಲು ನಿರಾಕರಿಸಿದ್ದಾಳೆ. ಇದೇ ಕಾರಣಕ್ಕೆ ರೊಚ್ಚಿಗೆದ್ದಿರುವ ನರೇಶ್‌, ಆಕೆಯ ಮೇಲೆ ಸ್ಯಾನಿಟೈಸರ್‌ ಎಸೆದು ಲೈಟರ್‌ನಿಂದ ಬೆಂಕಿ ಹಚ್ಚಿದ್ದಾನೆ.

  ಬೆಂಕಿಯಿಂದ ಆಕೆಯ ಮುಖ ಸುಟ್ಟು ಹೋಗಿದ್ದು, ನರಳಾಡುತ್ತಿದ್ದ ಯುವತಿಯನ್ನು ಸ್ಥಳೀಯರು ಆಸ್ಪತ್ರೆಗೆ ಸೇರಿದ್ದಾರೆ. ಬಳಿಕ ಯುವತಿಯ ದೂರಿನ ಆಧಾರದ ಮೇಲೆ ನರೇಶ್‌ ವಿರುದ್ಧ ಪೊಲೀಸರು ಪ್ರಕರಣ ದಾಖಲು ಮಾಡಿಕೊಂಡಿದ್ದಾರೆ.